പാറ്റ്ന: ബീഹാര് തെരഞ്ഞെടുപ്പില് 243 സീറ്റില് ഒരെണ്ണം മാത്രമാണ് കിട്ടിയതെങ്കിലും താന് ഉദ്ദേശിച്ച കാര്യം നേടിയെന്ന് എല്ജെപി നേതാവ് ചിരാഗ് പസ്വാന്. എന്ഡിഎയില് ഏറ്റവും വലിയ ഒറ്റക്കക്ഷിയായി ബിജെപി യുടെ വന് വിജയത്തിന് കാരണമായി ചൂണ്ടിക്കാണിക്കുന്നത് എല്ജെപിയുടെ ഇടപെടലാണ്. ബിജെപിയെ കൂടുതല് കരുത്തരാക്കുക എന്ന ഒറ്റ ലക്ഷ്യത്തിലായിരുന്നു തെരഞ്ഞെടുപ്പിന് ഇറങ്ങിയത്. അക്കാര്യത്തില് തന്റെ പാര്ട്ടി വലിയ ഇംപാക്ട് ഉണ്ടാക്കിയതില് ചിരാഗ് സന്തോഷിക്കുകയാണ്.
''എല്ലാ പാര്ട്ടികളെയും പോലെ കഴിയുന്ന എല്ലാ സീറ്റുകളിലും ജയിക്കാനായിരുന്നു താനും ശ്രമിച്ചത്. എന്നാല് തന്റെ ലക്ഷ്യം ഈ സംസ്ഥാനത്ത് ബിജെപിയെ കൂടുതല് കരുത്താര്ജ്ജിപ്പിക്കുക എന്നതായിരുന്നു. അക്കാര്യം നേടാനായതില് സന്തോഷമുണ്ട്'' ഫലം പ്രഖ്യാപിക്കപ്പെട്ടതിന്റെ പിറ്റേന്ന് പുലര്ച്ചെ മാധ്യമങ്ങള്ക്ക് മുന്നിലെത്തിയ ചിരാഗ് വ്യക്തമാക്കി. നിതീഷ്കുമാറിനെയും അദ്ദേഹത്തിന്റെ പാര്ട്ടിയേയും ഭരണത്തില് നിന്നും ഇറക്കി ബിജെപിയ്ക്ക് തനിയെ സര്ക്കാര് ഉണ്ടാക്കാന് സഹായിക്കുക എന്നത് ലക്ഷ്യമിട്ടാണ് എന്ഡിഎ വിട്ട് തനിയെ മത്സരിക്കാന് എല്ജെപി തുനിഞ്ഞതെന്നും പറഞ്ഞു. നിതീഷ്കുമാറിന്റെ ജെഡിയു മത്സരിച്ച ഇടങ്ങളിലായിരുന്നു എല്ജെപിയും സ്ഥാനാര്ത്ഥികളെ നിര്ത്തിയത്്. പസ്വാന് ഫാക്ടറില് 20 സീറ്റിലെങ്കിലും ജെഡിയു തോല്ക്കാന് കാരണമായെന്ന് ബിജെപി നേതാവ് സുശീല്കുമാര് മോഡിയും പറഞ്ഞു.
ഏകദേശം 40 സീറ്റിലോളമാണ് ജെഡിയുവിന് എല്ജെപി ശല്യമുണ്ടാക്കിയത്. 2015 തെരഞ്ഞെടുപ്പില് 71 സീറ്റുകള് നേടിയ സ്ഥാനത്താണ് ഇത്തവണ ജെഡിയു 43 ല് ഒതുങ്ങിയത്. അതേസമയം കഴിഞ്ഞ തവണ 53 സീറ്റുകള് നേടിയ ബിജെപി 74 ലേക്ക് ഉയരുകയും ചെയ്തു. വന് തോല്വി ഏറ്റുവാങ്ങിയെങ്കിലും തന്റെ പാര്ട്ടിയുടെ വോട്ടു ഷെയര് കൂടിയെന്നും ചിരാഗ് പസ്വാന് പറയുന്നു.
അതേസമയം തോല്വിയില് ജെഡിയു ബിജെപിയ്ക്കെതിരേ തിരിഞ്ഞിട്ടുണ്ട്. ചിരാഗിനെ തുടക്കത്തില് തന്നെ നിയന്ത്രിക്കേണ്ടതായിരുന്നു എന്നാണ് ഒരു സീനിയര് നേതാവിന്റെ പ്രതികരണം. ബിജെപി നേതൃത്വവും പ്രത്യേകിച്ച് അമിത്ഷായും ജെപി നദ്ദയുമായും ചര്ച്ചകള് നടത്തിയ ശേഷമാണ് താന് സ്ഥാനാര്ത്ഥികളെ ഇറക്കിയതെന്ന് കഴിഞ്ഞമാസം ചിരാഗ് പസവാന് പ്രതികരിച്ചിരുന്നു. തനിക്ക് എന്ഡിഎയില് സീറ്റ് നല്കിയില്ലെങ്കില് ജെഡിയുവിന് എതിരേ സ്ഥാനാര്ത്ഥികളെ ഇറക്കുമെന്ന് പറഞ്ഞപ്പോള് അവര് ഒന്നും പറഞ്ഞില്ലെന്നും നിശബ്ദമായി ഇരുന്ന് താന് പറയുന്നത് കേള്ക്കുക മാത്രമാണ് ചെയ്തതെന്നും പസ്വാന് ദേശീയ മാധ്യമത്തോട് പറഞ്ഞു.
