ന്യൂഡല്ഹി: വരാനിരിക്കുന്ന തെരഞ്ഞെടുപ്പ് ലക്ഷ്യമിട്ട് കേന്ദ്ര ബജറ്റില് കേരളത്തിനും ബംഗാളിനും തമിഴ്നാടിനും അസമിനും വന് പ്രഖ്യാപനം. കേരളത്തിന് ദേശീയപാത വികസനവും കൊച്ചി മെട്രോയും കൊച്ചി ഹാര്ബറുമെല്ലാം ബജറ്റില് ഉള്പ്പെടുത്തിയപ്പോള് ബംഗാളിനും ആസാമിനും ദേശീയപാതാ വികസനത്തിനു പുറമേ തേയില മേഖല ഉള്പ്പെടെയുള്ള തോട്ടം തൊഴിലാളികള്ക്ക് സഹായവും ബജറ്റില് ധനമന്ത്രി പ്രഖ്യാപിച്ചു.
കേരളത്തിന് ബജറ്റ് സമ്മാനിച്ചത് വന് നേട്ടമാണ്. മുംബൈ കന്യാകുമാരി വാണിജ്യ ഇടനാഴി ഉള്പ്പെടെ വാരിക്കോരി നല്കിയപ്പോള് കൊച്ചി മെട്രോ 11 കിലോമീറ്റര് കൂടി നീട്ടാനും സഹായം കിട്ടും. കേരളത്തില് ദേശീയപാതാ വികസനത്തിന് 65,000 കോടി രുപയാണ് പ്രഖ്യാപനത്തിലുള്ളത്. 1,100 കി.മീറ്റര് ദേശീയപാത പദ്ധതിയില് കേരളത്തിന് നേട്ടമാകും. മുംബൈ- കന്യാകുമാരി വാണിജ്യ ഇടനാഴി അടക്കമാണ് തുക.
ഇതിന് പുറമേയാണ് കൊച്ചി മെട്രോ രണ്ടാം ഘട്ടത്തിന് 1957 കോടി കൂടി അനുവദിച്ചിരിക്കുന്നത്. ഇതിലൂടെ കൊച്ചി മെട്രോയ്ക്ക് 11.5 കിലോമീറ്റര് കൂടി നീട്ടാനാകും. രാജ്യത്തെ തുറമുഖ വികസനങ്ങളില് കൊച്ചിയെയും ഉള്പ്പെടുത്തിയിട്ടുണ്ട്. കൊച്ചിയിലെ മത്സ്യബന്ധന തുറമുഖത്തെ വാണിജ്യതുറമുഖമായി വികസിപ്പിക്കുമെന്നും പ്രഖ്യാപിച്ചു. കേരളത്തിനൊപ്പം തെരഞ്ഞെടുപ്പ് നടക്കുന്ന തമിഴ്നാട്ടില് 1.03 ലക്ഷം കോടിയാണ് ദേശീയപാതാവികസനത്തിന് പ്രഖ്യാപിച്ചിരിക്കുന്നത്. 3500 കി.മീ. ദേശീയപാതാ നിര്മ്മാണത്തിനാണ് തമിഴ്നാടിന് തുക പ്രഖ്യാപിച്ചത്. ഇതില് അടുത്ത വര്ഷം നിര്മ്മാണം തുടങ്ങുന്ന മധുര-കൊല്ലം ഇടനാഴി കൂടി ഉള്പ്പെടുന്നുണ്ട്.
ചെന്നൈ മെട്രോയ്ക്കും ബജറ്റില് പരാമര്ശം ഉണ്ടായിരുന്നു. രണ്ടാം ഘട്ടത്തിന് 63246 കോടിയും ബംഗലുരു മെട്രോയ്ക്ക് 58.19 കി.മീ. വികസനത്തിനായി 40,700 കോടിയും നാഗ്പൂര് മെട്രോയ്ക്ക് 5900 കോടിയും അനുവദിച്ചിട്ടുണ്ട്്. കേരളത്തിനൊപ്പം ബിജെപി ലക്ഷ്യമിട്ടിരിക്കുന്ന ബംഗാളിനും വന് സഹായം പ്രഖ്യാപിച്ചിട്ടുണ്ട്. പശ്ചിമ ബംഗാളില് 675 കി.മീ. റോഡ് വികസനത്തിന് 95,000 കോടി രൂപയും അസമില് 1300 കി.മീ. റോഡ് നിര്മ്മാണത്തിന് 34,000 കോടിയും പ്രഖ്യാപിച്ചു. ഇതിന് പുറമേ അസമിലെയും ബംഗാളിലെയും തേയില തൊഴിലാളികള്ക്കായി 1000 കോടി രൂപയും പ്രഖ്യാപിച്ചു. അസമിലെയും ബംഗാളിലെയും വനിതാ ശിശു ക്ഷേമത്തിന് പ്രത്യേക പദ്ധതി നടപ്പാക്കുമെന്നും പറഞ്ഞിട്ടുണ്ട്.
