തിരുവനന്തപുരം: നിയമനവിവാദത്തില് പ്രതിഷേധം സെക്രട്ടറിയേറ്റിന്റെ മതിലിനുള്ളില് എത്തിച്ച യുവമോര്ച്ച. പിന്വാതില് നിയമനങ്ങള്ക്കെതിരേ യുവമോര്ച്ച സെക്രട്ടറിയേറ്റിന് മുന്നില് നടത്തിയ പ്രതിഷേധത്തില് പ്രവര്ത്തകര് മതില് ചാടിക്കടന്ന് അകത്ത് കയറി. പോലീസിന്റെ കണ്ണുവെട്ടിച്ച് മതില് ചാടിക്കടന്ന വനിതകള് അടക്കമുള്ള പ്രവര്ത്തകരെ പോലീസ് തടഞ്ഞു.
ഇവരെ അറസ്റ്റ് ചെയ്ത് നീക്കാന് ശ്രമിച്ചത് പോലീസുമായി ഉന്തും തള്ളിലും കലാശിച്ചു. തുടര്ന്ന് സമരനേതാക്കളെ പോലീസ് കസ്റ്റഡിയില് എടുത്തു. സെക്രട്ടറിയേറ്റിന് മുന്നില് പ്രതിഷേധം നടത്തുന്ന റാങ്ക് ഹോള്ഡേഴ്സിന് പിന്തുണയുമായിട്ടാണ് യുവമോര്ച്ച പ്രകടനവുമായി എത്തിയത്.
സെക്രട്ടറിയേറ്റിനുള്ളില് മന്ത്രിസഭാ യോഗം നടക്കുന്നതിനിടയിലായിരുന്നു പ്രതിഷേധം. പോലീസിനും പിണറായി വിജയനുമെതിരേ മുദ്രാവാക്യം വിളികളുമായി എത്തിയ യുവമോര്ച്ചാ പ്രവര്ത്തകര് പോലീസ് റാങ്കഹോള്ഡേഴ്സിന്റെ സമരത്തില് ശ്രദ്ധ ചെലുത്തിയിരുന്ന സാഹചര്യം മുതലാക്കിയാണ് മതില് ചാടിക്കടന്നത്. കണ്ണു വെട്ടിച്ചു കടന്ന യുവമോര്ച്ചാ പ്രവര്ത്തകരെ തടയാന് പോലീസ് ഓടിയെത്തുകയും അറസ്റ്റ് ചെയ്ത് നീക്കാന് ശ്രമിച്ചതോടെ ഉന്തും തള്ളുമാകുകയും ചെയ്തു. പിന്നീട് ഇവരെ കസ്റ്റഡിയില് എടുത്തു.
നിയമന വിവാദവുമായി ബന്ധപ്പെട്ട കാലടി സര്വകലാശാലയിലേക്കും ബിജെപിയുടെ പ്രതിഷേധം നടന്നു. പ്രവര്ത്തകര് ക്യാമ്പസിനുള്ളില് കടന്ന് സമരം നടത്തി. റാങ്ക് ലിസ്റ്റ് അട്ടിമറിച്ച് മുന് എംപി എം ബി രാജേഷിന്റെ ഭാര്യ നിനിത കണിച്ചേരിക്ക് നിയമനം നല്കിയെന്ന ആരോപണമാണ് കാലടി സര്വകലാശാലയെ വിവാദത്തിലാക്കിയത്.
മലയാളം വിഭാഗം അസിസ്റ്റന്റ് പ്രൊഫസര് തസ്തികയില് മൂന്നാം റാങ്ക് നേടിയ വി ഹിക്മത്തുള്ള, സേവ് യൂണിവേഴ്സിറ്റി ഫോറം എന്നിവര് നല്കിയ പരാതിയുടെ അടിസ്ഥാനത്തില് ഗവര്ണര് ആരിഫ് മുഹമ്മദ് ഖാന് വൈസ് ചാന്സലറില് നിന്ന് വിശദീകരണം തേടിയിരുന്നു.
