കോട്ടയം: മെട്രോമാന് എന്ന് രാജ്യം വിശേഷിപ്പിച്ച ഇ ശ്രീധരന് പോയത് രാഷ്ട്രീയത്തില് തന്നെ വളരെ വിലകുറഞ്ഞ 'സ്കില്' ഉള്ള പാര്ട്ടയിലേക്കെന്ന സിപിഐ നേതാവ് ബിനോയ് വിശ്വം. ബിജെപിയില് ചേരാനുള്ള ശ്രീധരന്റെ ന്യായങ്ങള് അദ്ദേഹത്തിന്റെ ബൗദ്ധീക നിലവാരവുമായി ചേര്ന്നു പോകുന്നതല്ലെന്നും ബിനോയ് വിശ്വം പറഞ്ഞു. എല്ഡിഎഫ് തെക്കന് മേഖലാ വികസന മുന്നേറ്റ ജാഥയുടെ ഭാഗമായി കോട്ടയത്ത് വാര്ത്താസമ്മേളനത്തില് സംസാരിക്കുകയായിരുന്നു.
ഇന്ത്യയുടെ ആകാശവും ഭൂമിയും വിദേശ ശക്തികള്ക്ക് പണയപ്പെടുത്താന് തീരുമാനിച്ച പാര്ട്ടിയിലേക്കാണ് ദേശസ്നേഹം പറഞ്ഞ് ശ്രീധരന് പോയത് ദു:ഖവും ആശങ്കയും ഉണ്ടാക്കുന്നു. ദേശസ്നേഹമാണോ ബിജെപിയെ നയിക്കുന്നത് എന്ന് ചോദിച്ച ബിനോയ് വിശ്വം അക്കാര്യത്തില് ഇടതുപക്ഷം വിയോജിക്കുന്നതായും പറഞ്ഞു. അദ്ദേഹത്തെപോലെ ആദരണീയനും കഴിവുള്ളവനും രാജ്യം അംഗീകരിക്കുകയും ചെയ്തയാള് വ്യക്തിയാണ് വിലകുറഞ്ഞ പാര്ട്ടിയില് പോയതെന്നും പറഞ്ഞു.
കഴിഞ്ഞ ദിവസമാണ് മെട്രോമന് ഇ ശ്രീധരന് ബിജെപിയുടെ ഭാഗമാകുന്നതായി ബിജെപി സംസ്ഥാന അദ്ധ്യക്ഷന് കെ സുരേന്ദ്രന് പറഞ്ഞത്. ബിജെപിയുടെ വിജയ യാത്രയ്ക്കിടയില് അദ്ദേഹം പാര്ട്ടിയില് ചേരുമെന്നും പറഞ്ഞു. ഇതിന് പിന്നാലെ ബിജെപി അദ്ധ്യക്ഷന്റെ പ്രഖ്യാപനം അംഗീകരിച്ച് ശ്രീധരനും എത്തി. പിണറായി സര്ക്കാരിനെ രൂക്ഷമായി വിമര്ശിച്ച് രംഗത്ത വരികയും ചെയ്തു. പാര്ട്ടി നിര്ദേശിച്ചാല് മത്സരിക്കുമെന്നും മുഖ്യമന്ത്രിയാകാന് ആഗ്രഹമുണ്ടെന്നും പറഞ്ഞിരുന്നു.
