കൊച്ചി: ലൈഫ് മിഷന് കേസില് ഡോളര് കടത്ത് അന്വേഷണം കൂടി ഉള്പ്പെടുത്തി എന്ഫോഴ്സ്മെന്റ് ഡയറക്ടറേറ്റ് (ഇ.ഡി) പുതിയ കേസ് രജിസ്റ്റര് ചെയ്തു. വടക്കാഞ്ചേരിയില് െലെഫ് പാര്പ്പിടസമുച്ചയ നിര്മാണത്തിനു കരാര് ലഭിച്ച യൂണിടാക് ഉടമ സന്തോഷ് ഈപ്പനാണ് ഒന്നാം പ്രതി. ലൈഫ് മിഷന് കേസില് സാക്ഷിയാണു സന്തോഷ്.
ഡോളര് കടത്തിലെ എല്ലാ ഇടപാടുകളും ഈ കേസിന്റെ പരിധിയില് വരുമെന്ന് ഇ.ഡി. കേന്ദ്രങ്ങള് അറിയിച്ചു. എം. ശിവശങ്കര് ഉള്പ്പെടെയുള്ളവരെ ചോദ്യംചെയ്യലിനായി വിളിപ്പിക്കും. സ്പീക്കര് പി. ശ്രീരാമകൃഷ്ണനെ ചോദ്യംചെയ്യുന്നതിനു നിയമോപദേശം തേടിയിരിക്കുകയാണ്.
വിദേശത്തേക്കു ഡോളര്കടത്തിയ കേസില് സംശയനിഴലിലുള്ള നിയമസഭാ സ്പീക്കര് പി. ശ്രീരാമകൃഷ്ണനെ ചോദ്യംചെയ്യുന്ന കാര്യത്തില് അന്വേഷണസംഘം ഡല്ഹിയിലെത്തി മേലുദ്യോഗസ്ഥരുമായി ചര്ച്ച നടത്തി. കസ്റ്റംസും എന്ഫോഴ്സ്മെന്റ് ഡയറക്ടറേറ്റുമാണു സ്പീക്കറെ ചോദ്യംചെയ്യാന് തയാറെടുക്കുന്നത്.
സ്പീക്കറെ ചോദ്യംചെയ്യാന് നേരത്തേ തീരുമാനിച്ചിരുന്നെങ്കിലും സഭാസമ്മേളനത്തിനു മുമ്പും ശേഷവും ഒരു മാസം അദ്ദേഹത്തിനു നിയമപരമായ പരിരക്ഷയുള്ളതിനാല് മാറ്റിവച്ചിരിക്കുകയായിരുന്നു. നിയമസഭയുടെ ബജറ്റ് സമ്മേളനം പിരിഞ്ഞിട്ട് ഇന്നലെ ഒരു മാസം തികഞ്ഞു.
നിയമസഭാ തെരഞ്ഞെടുപ്പിനു വിജ്ഞാപനം ഇറങ്ങുന്നതോടെ സ്പീക്കറെന്ന നിലയിലുള്ള അവകാശങ്ങള് നാമമാത്രമാകും. ഭരണഘടനാ പദവി മാനിച്ചാണു ചോദ്യംചെയ്യാന് തിടുക്കം കാണിക്കാതിരുന്നത്. പരിരക്ഷയുള്ള സമയത്തു സമന്സ് നല്കിയാല് അദ്ദേഹം കോടതിയെ സമീപിക്കാനുള്ള സാധ്യതയും കണക്കിലെടുത്തു.
പ്രതികളായ സ്വപ്ന സുരേഷിന്റെയും പി.എസ്. സരിത്തിന്റെയും രഹസ്യമൊഴികളല്ലാതെ മറ്റു തെളിവുകള് ലഭിച്ചിട്ടുണ്ടോ എന്ന് അന്വേഷണ ഏജന്സികള് വെളിപ്പെടുത്തിയിട്ടില്ല. മറ്റു തെളിവുകളില്ലെങ്കിലും സംശയനിഴലിലുള്ള ഉന്നതനെയടക്കം പ്രതിചേര്ക്കുന്ന കാര്യത്തില് ഉന്നതോദ്യോഗസ്ഥരുടെ അഭിപ്രായം തേടി.
അന്വേഷണ ഉദ്യോഗസ്ഥന് ഉചിതമായ തീരുമാനമെടുക്കാമെന്നു മറുപടി ലഭിച്ചതായാണു സൂചന. യു.എ.ഇ. കോണ്സുലേറ്റ് ജനറല് അടക്കമുള്ളവര് വഴി പ്രതികള് വിദേശത്തേക്കു ഡോളര് കടത്തിയെന്നു വ്യക്തമായിരുന്നു. ആറു കോടി രൂപയുടെ ഡോളര് കടത്തിയെന്നു കണ്ടെത്തിയിട്ടുണ്ട്.
സ്വപ്നയെയും സരിത്തിനെയും കൂടാതെ, കോണ്സുലേറ്റിലെ ചീഫ് അക്കൗണ്ടന്റ് ഖാലിദ്, മുഖ്യമന്ത്രി പിണറായി വിജയന്റെ പ്രിന്സിപ്പല് സെക്രട്ടറിയായിരുന്ന എം. ശിവശങ്കര്, യൂണിടാക് ഉടമ സന്തോഷ് ഈപ്പന് എന്നിവരെയാണു പ്രതി ചേര്ത്തിട്ടുള്ളത്.
