ദോഹ: ഇന്ത്യന് ഫുട്ബോള് ടീമിന്റെ നായകന് സുനില് ഛേത്രിയുടെ കിരീടത്തില് മറ്റൊരു പൊന്തൂവല് കൂടി. അന്താരാഷ്ട്ര മത്സരങ്ങളില് ഏറ്റവും കൂടുതല് ഗോള് നേടിയ കാര്യത്തില് ഇന്ത്യന് നായകന് പിന്നിലാക്കിയത് ഫുട്ബോളിലെ ഇതിഹാസതാരം ലിയോണേല് മെസ്സിയെ. ഇന്നലെ ലോകകപ്പ് യോഗ്യതാ മത്സരത്തില് ബംഗ്ളാദേശിനെതിരേ രണ്ടു ഗോള് നേടിയപ്പോഴായിരുന്നു ഇന്ത്യന് നായകന് ഈ നേട്ടം സ്വന്തമാക്കിയത്.
മത്സരത്തിന്റ 79 ാം മിനിറ്റില് ഹെഡ്ഡറിലൂടെയും 92 ാം മിനിറ്റില് സുരേഷിന്റെ പാസില് നിന്നും ഇന്ത്യന് നായകന് ഗോള് കുറിച്ചപ്പോള് അദ്ദേഹം നിലവില് കളിച്ചുകൊണ്ടിരിക്കുന്നവരില് രാജ്യാന്തര മത്സരങ്ങളില് ഏറ്റവും കൂടുതല് ഗോള് നേടുന്ന രണ്ടാമനായി. ഇനി മുന്നിലുള്ളത് ഫുട്ബോളിലെ മറ്റൊരു ഇതിഹാസതാരം പോര്ച്ചുഗലിന്റെ ക്രിസ്ത്യാനോ റൊണാള്ഡോയാണ്. മത്സരത്തിന് മുമ്പ് തന്നെ രാജ്യാന്തര ഗോളുകളുടെ കാര്യത്തില് മെസ്സിയുമായി ഒപ്പമായിരുന്ന താരം ഇപ്പോള് മെസ്സിയേക്കാള് രണ്ടു ഗോളുകള് മുന്നിലായി.
ഇന്ത്യയിലെ എക്കാലത്തെയും മികച്ച താരമായ ഛേത്രി ഇതുവരെ 74 ഗോളുകള് നേടിക്കഴിഞ്ഞു. 103 ഗോളുകള് പേരിലുള്ള ക്രിസ്ത്യാനോ റൊണാള്ഡോയാണ് പട്ടികയില് ഒന്നാമന്. അതേസമയം ലോകകപ്പ് യോഗ്യതയ്ക്ക് വേണ്ടിയുള്ള മത്സരത്തില് ഇന്ത്യ ഏറെക്കുറെ പുറത്തായെങ്കിലും ഏഷ്യാക്കപ്പിനുള്ള യോഗ്യതനേടി. ബംഗ്ളാദേശിനെ തോല്പ്പിച്ചതോടെ ഇ ഗ്രൂപ്പില് ഏഴു മത്സരങ്ങളില് നിന്നും ആറുപോയിന്റുമായി ഇന്ത്യയുടെ അടുത്ത മത്സരം ജൂണ് 15 ന് അഫ്ഗാനിസ്ഥാന് എതിരേയാണ്.
കളിയുടെ 79 ാം മിനിറ്റില് മലയാളിതാരം ആഷിക് കുരുണിയന് നല്കിയ ഒരു മികച്ച ക്രോസില് തലവെച്ചാണ് ഛേത്രി ആദ്യഗോള് നേടിയത്. പിന്നാലെ ഇഞ്ചുറി സമയത്ത് ലിസ്റ്റണ് കൊളാക്കോയും സുരേഷും ചേര്ന്നൊരു നീക്കത്തിനൊടുവില് ബോക്സില് നിന്നും പന്ത് വലയുടെ ഇടതുഭാഗത്തേക്ക് കോരിയിട്ട് സുനില് ഛേത്രി രണ്ടാം ഗോളും നേടി. അതേസമയം അന്താരാഷ്ട്ര മത്സരങ്ങളില് യുറോക്കപ്പും കോപ്പാ അമേരിക്ക ഫുട്ബോള് ടൂര്ണമെന്റും തൊട്ടടുത്ത് നില്ക്കേ ക്രിസ്ത്യനാ റൊണാള്ഡോയ്ക്കും മെസ്സിക്കും കൂടുതല് ഗോളുകള് സ്കോര് ചെയ്യാന് അവസരമുണ്ട്. കോപ്പയിലെ ഗോളടി മികവ് മെസ്സിക്ക് ഛേത്രിയെ മറികടക്കാന് അവസരം നല്കും.
