കോപ്പന്ഹേഗന്: കളിക്കിടയില് കുഴഞ്ഞുവീണ് ആശുപത്രിയിലായ മദ്ധ്യനിരക്കാരന് ക്രിസ്ത്യന് ഐറിക്സണ് വേണ്ടി ഒടുവില് അര്ഹിച്ച പ്രകടനം നടത്തി ഡന്മാര്ക്ക് യൂറോപ്യന് കപ്പ് ഫുട്ബോളില് പ്രീക്വാര്ട്ടറില് എത്തി. റഷ്യയെ ഒന്നിനെതിരേ നാലു ഗോളുകള്ക്ക് തകര്ത്തായിരുന്നു ഡന്മാര്ക്ക് ആദ്യ 16 ല് എത്തിയത്. മൂന്ന് മത്സരവും ജയിച്ച് ബല്ജിയവും നെതര്ലന്റും രണ്ടു മത്സങ്ങള് ജയിച്ച് ഓസ്ട്രിയയും നോക്കൗട്ട് ഘട്ടത്തിലെത്തി.
ഗ്രൂപ്പ് ബിയിലായിരുന്നു ഡന്മാര്ക്കും ബല്ജിയവും വിജയം നേടിയതെങ്കില് ഗ്രൂപ്പ് സിയിലായിരുന്നു നെതര്ലന്റിന്റെയും ഓസ്ട്രിയയുടെയും ജയം. റഷ്യയെ ഒന്നിനെതിരേ നാലുഗോളുകള്ക്ക് തകര്ത്തായിരുന്നു ഡന്മാര്ക്ക് മുമ്പോട്ട് പോയത്. ആദ്യപകുതിയില് ഒരു ഗോളിന് മുന്നില് നിന്ന അവര് രണ്ടാം പകുതിയില് നേടിയത് മൂന്ന് ഗോളുകളാണ്. ഡംസ്ഗാര്ഡ്, പോള്സണ്, ക്രിസ്റ്റൈന്സണ്, മീഹള് എന്നിവര് ഡാനിഷ് ടീമിനായി ഗോളുകള് നേടിയപ്പോള് പെനാല്റ്റിയില് നിന്നും സ്യൂബയായിരുന്നു റഷ്യയുടെ ഗോള് നേടിയത്. കോപ്പന്ഹേഗനില് ക്രിസ്ത്യന് എറിക്സണ് ആദ്യ മത്സരത്തില് കുഴഞ്ഞുവീണ അതേ മൈതാനത്ത് നാട്ടുകാര്ക്ക് മുന്നിലായിരുന്നു ഡാനിഷ്പട ജയിച്ചത്.
എറിക്സണ് ആശുപത്രി വിട്ട ശേഷം വീട്ടില് വിശ്രമിക്കുന്നതിന്റെ ആശ്വാസത്തില് ഡെന്മാര്ക്കില് നിന്നും ഇതാദ്യമായിട്ടാണ് ഈ ടൂര്ണമെന്റില് കരുത്തുറ്റ പ്രകടനം വന്നത്. ഈ ജയത്തോടെ ഗ്രൂപ്പില് രണ്ടാമതാകാന് ഡന്മാര്ക്കിനായി.
ഇതേ ഗ്രൂപ്പില് മൂന്നാമത്തെ മത്സരവും ജയിച്ചു കൊണ്ട് ബല്ജിയം അപ്രമാദിത്യം തുടര്ന്നു. സെന്റ് പീറ്റേഴ്സ്ബര്ഗില് ഫിന്ലന്റിനെ രണ്ടുഗോളുകള്ക്കായിരുന്നു ബല്ജിയം വീഴ്ത്തിയത് ഫിന്ലന്റിന്റെ ഹ്രാഡെക്കിയുടെ സെല്ഫ് ഗോളില് മുന്നിലെത്തിയ ബല്ജിയം 81 ാം മിനിറ്റില് ലൂക്കാക്കുവിലൂടെ ഗോള്നില വര്ദ്ധിപ്പിച്ചു. ജയം ബല്ജിയത്തെ ഗ്രൂപ്പ് ചാംപ്യന്മാരാക്കിയപ്പോള് ഫിന്ലന്റ് മൂന്നാം സ്ഥാനത്തേക്ക് വീണു. ഇതോടെ രണ്ടാം റൗണ്ടില് എത്താന് ഫിന്ലന്റിന് കാത്തിരിക്കേണ്ട സ്ഥിതിയായി.
ഗ്രൂപ്പ് സിയില് നെതര്ലന്റും കളിച്ച മുന്ന് മത്സരങ്ങളും ജയിച്ചു രണ്ടാം റൗണ്ടിലേക്ക് കടന്നു. ദുര്ബലരായ നോര്ത്ത് മാസിഡോണിയയെ 3-0 ന് തകര്ത്തു. മെംഫിസ് ഡീപേയുടെ ഗോളിന് പിന്നാലെ വിജിനാള്ഡത്തിന്റെ ഇരട്ടഗോളുകളും ആയിരുന്നു നെതര്ലന്റിന്റെ വിജയത്തിന് പിന്നില്. ആംസ്റ്റര്ഡാമിലെ യോഹാന് ക്രൈഫ് സ്റ്റേഡിയത്തില് 12,000 കാണികള്ക്ക് മുന്നിലായിരുന്നു ഓറഞ്ചുപടയുടെ വിജയം.
കഴിഞ്ഞ പത്തു മത്സരങ്ങളിലായി ഒമ്പത് ഗോളുകളും മൂന്ന് അസിസ്റ്റുകളും പേരിലുള്ള ഡീപേ ഡോണ്യലില് നിന്നും വന്ന ഒരു പാസ് ഫസ്റ്റ്ടൈം ഷോട്ടിലൂടെ വലിയിലാക്കിയാണ് ഡീപേ ആദ്യഗോള് നേടിയത്. രണ്ടാം പകുതിയില് ഏഴു മിനിറ്റുകളുടെ വ്യത്യാസത്തില് വിജിനാള്ഡം രണ്ടുഗോളുകള് നേടി. 51 ാം മിനിറ്റില് ഡീപേ നല്കിയ പന്ത് മാസിഡോണിയന് കീപ്പറിനെ മറികടന്ന വിജിനാള്ഡം 58 ാം മിനിറ്റില് ക്ളോസ് റേഞ്ച് ഷോട്ടിലൂടെ രണ്ടാം ഗോളും നേടി. ബൗംഗാര്ഡ്നറിന്റെ ഏകഗോളില് ഓസ്ട്രിയ ഉക്രെയിനെ കീഴ്പ്പെടുത്തി മുമ്പോട്ട് പോയി. ഗ്രൂപ്പില് ഒരു മത്സരം മാത്രം തോറ്റ ഓസ്ട്രിയ ഇതാദ്യമായിട്ടാണ് യൂറോയില് നോക്കൗട്ട് സ്റ്റേജില് എത്തുന്നത്.
