ന്യൂഡല്ഹി: പ്രധാനമന്ത്രി നരേന്ദ്ര മോദിക്കു നന്ദി പറഞ്ഞ് ബാനറുകള് സ്ഥാപിക്കാന് നിര്ദേശിച്ച യുജിസിക്കെതിരെ ശിവസേന. 18 വയസ്സിനു മുകളിലുള്ളവര്ക്ക് സൗജന്യ വാക്സിനേഷന് ഏര്പ്പെടുത്തിയതില് മോദിക്കു നന്ദി പറയുന്ന ബാനറുകളും ബോര്ഡുകളും കോളജുകളിലും സര്വകലാശാലകളിലും സ്ഥാപിക്കാനായിരുന്നു നിര്ദേശം.
18 വയസ്സിനു മുകളിലുള്ള എല്ലാവര്ക്കും സൗജന്യ വാക്സിനേഷന് എന്ന, കേന്ദ്രത്തിന്റെ പുതുക്കിയ വാക്സീന് നയം തിങ്കളാഴ്ച പ്രാബല്യത്തില് വന്നിരുന്നു. ഇതിനു തൊട്ടുമുമ്പായി ഞായറാഴ്ചയാണ് ബാനറുകള് സ്ഥാപിക്കണമെന്ന യുജിസി സെക്രട്ടറി രജ്നിഷ് ജെയ്നിന്റെ സന്ദേശം സര്വകലാശാലാ അധികൃതര്ക്ക് ലഭിച്ചത്. സ്ഥാപനങ്ങളിലെ ബാനറുകളുടെ ചിത്രം സമൂഹമാധ്യമത്തില് പോസ്റ്റ് ചെയ്യാനും ആവശ്യപ്പെട്ടിട്ടുണ്ട്.
ഇതില് ശക്തമായ പ്രതിഷേധവുമായി ശിവസേനയുടെ രാജ്യസഭാ എംപി പ്രിയങ്ക ചതുര്വേദി രംഗത്തുവന്നു. 'സൗജന്യ വാക്സീന് ലഭ്യമാക്കിയതിന് പ്രധാനമന്ത്രിക്ക് നന്ദി അറിയിച്ച്, സര്ക്കാര് ധനസഹായം നല്കുന്ന സര്വകലാശാലകള് ബാനറുകള് സ്ഥാപിക്കണമെന്ന് യുജിസി നിര്ദേശിച്ചിരിക്കുന്നു. ഒന്നാമത്, ജനങ്ങളുടെ നികുതിപ്പണം കൊണ്ടാണ് വാക്സീന് വാങ്ങിയത്. രണ്ടാമത്, വിദ്യാര്ഥികള്ക്കായി ഇതേ ഉത്സാഹത്തോടെ യുജിസി പ്രവര്ത്തിക്കുകയും യുവജനങ്ങള്ക്കിടയിലെ തൊഴിലില്ലായ്മയെക്കുറിച്ച് ചര്ച്ച നടത്തുകയും ചെയ്യുമെന്ന് പ്രതീക്ഷിക്കട്ടെ'- എന്നായിരുന്നു പ്രിയങ്കയുടെ ട്വീറ്റ്.
