കോട്ടയം: നിയമസഭാ തെരഞ്ഞെടുപ്പില് എസ്.ഡി.പി.ഐയുടെ പിന്തുണ ഇരുകൈയും നീട്ടി സ്വീകരിക്കുന്ന സി.പി.എമ്മിന്റെ ഇരട്ടത്താപ്പ് തുറന്നുകാട്ടുന്ന പാര്ട്ടി രേഖ പുറത്ത്. 2025 ഏപ്രിലില് നടന്ന, 24-ാം പാര്ട്ടി കോണ്ഗ്രസിന്റെ രാഷ്ട്രീയപ്രമേയത്തില് എസ്.ഡി.പി.ഐയെ തീവ്രവാദസംഘടനയായാണ് വിലയിരുത്തുന്നത്. എം.എ. ബേബി സി.പി.എം. ജനറല് സെക്രട്ടറിയായി തെരഞ്ഞെടുക്കപ്പെട്ടതും ഇതേ പാര്ട്ടി കോണ്ഗ്രസിലാണ്.
പോപ്പുലര് ഫ്രണ്ടിന്റെ രാഷ്ട്രീയവിഭാഗമായ എസ്.ഡി.പി.ഐയെ രാഷ്ട്രീയമായി നേരിടണമെന്നു പാര്ട്ടി കോണ്ഗ്രസ് അംഗീകരിച്ച പ്രമേയത്തിന്റെ 54-ാം പേജില് പറയുന്നു. ജമാഅത്തെ ഇസ്ലാമി, എസ്.ഡി.പി.ഐ. തുടങ്ങിയ മുസ്ലിം മൗലികവാദികളും തീവ്രവാദസംഘടനകളും മുസ്ലിം ജനവിഭാഗങ്ങള്ക്കിടയില് സ്വാധീനം വ്യാപിപ്പിക്കാനും ഹിന്ദുത്വശക്തികളുടെ നിരന്തര ആക്രമണങ്ങള്ക്കു വിധേയമാകുന്ന ന്യൂനപക്ഷസമുദായങ്ങളുടെ അകല്ച്ചയും ഭയവും മുതലെടുക്കാനും ശ്രമിക്കുന്നുവെന്നാണ് പാര്ട്ടി രേഖ.
എസ്.ഡി.പി.ഐയുടെ വോട്ട് അഭ്യര്ഥിച്ച് സി.പി.എം. ചര്ച്ച നടത്തിയിട്ടില്ലെന്നും എന്നാല്, സ്വഭാവ സര്ട്ടിഫിക്കറ്റ് നോക്കി വോട്ട് വാങ്ങാന് കഴിയില്ലെന്നുമാണ് ഇതേ പാര്ട്ടി കോണ്ഗ്രസില് ജനറല് സെക്രട്ടറിയായി തെരഞ്ഞെടുക്കപ്പെട്ട എം.എ. ബേബി കഴിഞ്ഞദിവസം പ്രതികരിച്ചത്. ഒരാളുടെയും വോട്ട് വേണ്ടെന്നു പറയില്ലെന്ന് സംസ്ഥാന സെക്രട്ടറി എം.വി. ഗോവിന്ദനും വ്യക്തമാക്കി.
കേരളത്തില് ന്യൂനപക്ഷങ്ങള്ക്കിടയിലുള്ള സി.പി.എമ്മിന്റെ സ്വാധീനം നിയന്ത്രിക്കാന് എസ്.ഡി.പി.ഐ. ലക്ഷ്യമിടുന്നതായും രാഷ്ട്രീയപ്രമേയം വിലയിരുത്തുന്നു. അധികാരത്തിലുള്ള ഹിന്ദുത്വ വര്ഗീയശക്തികളുമായി ന്യൂനപക്ഷവര്ഗീയതയെ തുലനം ചെയ്യാന് കഴിയില്ല. എന്നാല്, ഭൂരിപക്ഷവര്ഗീയശക്തികളെ മാത്രമേ ന്യൂനപക്ഷ തീവ്രവാദപ്രവര്ത്തനങ്ങള് ശക്തിപ്പെടുത്തൂവെന്ന് മനസിലാക്കണമെന്നും പ്രമേയത്തില് പറയുന്നു.
ഷാലു മാത്യു
