ന്യുഡല്ഹി: ഉത്തര്പ്രദേശില് ജില്ലാ പഞ്ചായത്ത് അധ്യക്ഷന്മാരുടെ തിരഞ്ഞെടുപ്പില് പാര്ട്ടി അംഗങ്ങള്ക്ക് മനസാക്ഷി വോട്ട് ചെയ്യാന് അനുമതി നല്കിയ ബി.എസ്.പി നേതാവ് മായാവതിക്കെതിരെ വിമര്ശനവുമായി കോണ്ഗ്രസും സമാജ്വാദി പാര്ട്ടിയും. ബി.ജെ.പിയുടെ വിജയം ഉറപ്പാക്കാന് മാത്രമല്ല, പ്രതിപക്ഷ കക്ഷികളെ തകര്ക്കാന് കൂടിയാണ് ഈ നീക്കമെന്നും മായാവതി ബി.ജെ.പിയുമായി കൈകോര്ത്തിരിക്കുകയാണെന്നും പ്രതിപക്ഷ കക്ഷികള് ആരോപിക്കുന്നു.
പല ജില്ലകളിലും ബി.എസ്.പി അംഗങ്ങളുടെ വോട്ട് മറിയുന്നത് രാഷ്ട്രീയ സാഹചര്യം തന്നെ മാറ്റിമറിക്കുമെന്നും പ്രതിപക്ഷം ആരോപിക്കുന്നു. യു.പി ജില്ലാ പഞ്ചായത്ത് അധ്യക്ഷന്മാരുടെ തിരഞ്ഞെടുപ്പില് 18 പേര് എതിരില്ലാതെ തിരഞ്ഞെടുക്കപ്പെട്ടിട്ടുണ്ട്. അവശേഷിക്കുന്ന 57 സീറ്റുകളിലാണ് ജൂലായ് 3ന് തിരഞ്ഞെടുപ്പ് നിശ്ചയിച്ചിരിക്കുന്നത്.
