പാസിംഗ് ഔട്ട് കഴിഞ്ഞിട്ടും സ്റ്റാർ ഇല്ലാത്ത യൂണിഫോം അണിഞ്ഞ് ആനിയുടെ കാത്തിരിപ്പിനൊടുവില് ഷാജിച്ചേട്ടന് എത്തി. ആനിയുടെ തോളിൽ നക്ഷത്രങ്ങൾ ചാർത്തി നൽകി. ഒടുവില് സ്നേഹത്തോടെ കവിളില് ഒരു മുത്തവും. ഏതാനും ദിവസമായി വലിയ പ്രചോദനവുമായി കേരളം ചര്ച്ച ചെയ്തു കൊണ്ടിരിക്കുന്ന എസ്പി ആനിയുടെ ജീവിതത്തിലെ ഏറ്റവും വലിയ പ്രചോദനമായ കെഎസ്ആർടിസി ബസ് ഡ്രൈവർ ആണ് ഷാജി.
ആനിയുടെ ജീവിതത്തിൽ ഷാജി എന്താണെന്ന് ചോദിച്ചാല് അച്ഛനോ ചേട്ടനോ അങ്ങനെ ജീവിതത്തിൽ ആരെല്ലാമുണ്ടോ അതെല്ലാമാണ് ഈ മനുഷ്യനെന്ന് ആനിയുടെ അഭിമാനത്തോടെയുള്ള മറുപടി. എല്ലാറ്റിനും താങ്ങും തണലും ആയി നിന്നയാളും സ്വപ്നം കാണാന് പഠിപ്പിച്ചതുമായ ആനി മുമ്പ് പറഞ്ഞ മനുഷ്യനാണ് ഷാജി. എസ്ഐ പരീക്ഷ അടക്കം എഴുതാൻ പ്രേരിപ്പിച്ചതും ഇദ്ദേഹമായിരുന്നു. പാസിങ് ഔട്ട് കഴിഞ്ഞിട്ടും സ്റ്റാർ ഇല്ലാത്ത യൂണിഫോം അണിഞ്ഞ് ആനി കാത്തിരുന്നതും ഷാജി ചേട്ടന് വേണ്ടിയായിരുന്നു. ഒടുവിൽ ഷാജി എത്തി യൂണിഫോമില് സ്റ്റാര് പതിപ്പിച്ചു.
ആനി തന്നെ ഫെയ്സ്ബുക്കിൽ പങ്കുവച്ച വിഡിയോ ഇപ്പോൾ സമൂഹമാധ്യമങ്ങളിൽ വൈറലാണ്. ജീവിതത്തില് പ്രതിസന്ധികളോട് പൊരുതി ജയിച്ചയാള് എന്ന പരിവേഷമാണ് ആനിക്കിപ്പോള്. താന് നാരങ്ങാവെള്ളം വിറ്റു നടന്ന നഗരത്തില് തന്നെ എസ്ഐ ആയി എത്തിയ ആനിയുടെ കഥ കഴിഞ്ഞ ദിവസമാണ് പുറത്തു വന്നത്. സാമൂഹ്യമാധ്യമങ്ങളില് ഇവരുടെ കഥയും ചിത്രങ്ങളുമെല്ലാം വൈറലായിരുന്നു.
ആനിയുടെ കുറിപ്പ്:
പാസിങ് ഔട്ടിന്റെ പിറ്റെ ദിവസവും സ്റ്റാർ ഇല്ലാത്ത യൂണിഫോം ഇട്ടു KEPA യിൽ കറങ്ങി നടക്കുന്നത് കണ്ടപ്പോൾ പലരും ചോദിച്ചു സ്റ്റാർ വെക്കാതെ എന്താ ഇങ്ങനെ നടക്കുന്നതെന്ന്..ദാ ഇങ്ങേർക്ക് വേണ്ടിയുള്ള കാത്തിരിപ്പ് അല്ലായിരുന്നോ... ഈ മനുഷ്യന് അല്ലാതെ വേറെ ആർക്കാ എനിക്ക് സ്റ്റാർ വച്ച് തരാനുള്ള അർഹത ഉള്ളത്..സർവീസിന്റെ അവസാന നാൾ വരെ ഒരു അപാകതയും പറ്റാതിരിക്കട്ടെ എന്നും പറഞ്ഞു തന്ന മുത്തം ഉണ്ടല്ലോ അതാണ് എന്റെ ഊർജം. ഈ ഒരു നിമിഷത്തിന് വേണ്ടി ആയിരുന്നില്ലേ എല്ലാ കഷ്ടപ്പാടുകളും..’
