തിരുവനന്തപുരം: കോവിഡില് പിതാവ് നഷ്ടമായ കുടുംബത്തിലെ നാലു പെണ്കുട്ടികളെയും ദത്തെടുത്ത് കുട്ടികള് പഠിക്കുന്ന സ്കൂളിലെ അദ്ധ്യാപകര്. കോവിഡില് മാതാപിതാക്കള് നഷ്ടമായ അനേകം കുട്ടികള് വിവിധ സംസ്ഥാനങ്ങളില് ദുരിതം അനുഭവിക്കുമ്പോള് കരുണയുടെ കുട നിവര്ത്തി മാതൃകയായിരിക്കുന്നത് തിരുവനന്തപുരം കോട്ടന്ഹില് ഗവണ്മെന്റ് എല്പി സ്കൂള് അദ്ധ്യാപകരാണ്. മൂന്ന്, ആറ്, എട്ട്, പത്ത് ക്ലാസ്സുകളില് പഠിക്കുന്ന കുട്ടികളെയും അവരുടെ മാതാവിനെയും എല്പി സ്കൂള് അദ്ധ്യാപകരാണ് ദത്തെടുക്കാന് തീരുമാനിച്ചത്.
'കൂടെയുണ്ട് കോട്ടന്ഹില്' എന്ന ബാനറിന് കീഴില് സ്കൂളിലെ ഹെഡ്മാസ്റ്റര് കെ ബുഹാരിയുടെ നേതൃത്വത്തില് 27 സ്ഥിരാദ്ധ്യാപകരാണ് ഇവര്ക്ക് തുണയായിരിക്കുന്നത്. സ്കൂളിലെ മൂന്നാംക്ലാസ്സ് വിദ്യാര്ത്ഥിനി അനീഷയ്ക്കും ചേച്ചിമാര്ക്കും വീടിന്റെ അത്താണിയായിരുന്ന ഓട്ടോറിക്ഷ തൊഴിലാളിയുമായ പിതാവിനെ നഷ്ടമായത്. ഇവരുടെ മാതാവ് രോഗിയുമായതോടെയാണ് അഞ്ചംഗ കുടുംബത്തെ ഏറ്റെടുക്കാന് അദ്ധ്യാപകര് തീരുമാനിച്ചത്. പിതാവ് മരിച്ച ശേഷം കുടുംബം കടുത്ത ദാരിദ്ര്യത്തിലായിരുന്നു.
ഹെഡ്മാസ്റ്റര് ബുഹാരി ഇവരുടെ വീട് സന്ദര്ശിച്ചതോടെയാണ് കുടുംബത്തിന്റെ നിസ്സഹായതയും ദുരിതവും ബോദ്ധ്യപ്പെട്ടത്. തുടര്ന്ന് അദ്ധ്യാപകരും പിടിഎ അംഗങ്ങളും വിഷയം ചര്ച്ച ചെയ്യുകയും കുടുംബത്തെ ഏറ്റെടുക്കാന് തീരുമാനം ഉണ്ടാകുകയുമായിരുന്നു. മാസം തോറും കുടുംബത്തിന് 5000 രൂപ നല്കാനാണ് സ്കൂളിന്റെ പദ്ധതി. ഇത് പച്ചക്കറി ഉള്പ്പെടെ കുടുംബത്തിന് അവശ്യവസ്തുക്കള് വാങ്ങാന് തുണയാകുമെന്നാണ് കരുതുന്നത്. ഇവര്ക്ക് ഇഷ്ടമുള്ള കടയില് നിന്നും സാധനം വാങ്ങാം. സ്കൂള് കടയിലെ പറ്റ് നല്കും. ശമ്പളത്തിന്റെ ഒരുഭാഗം അദ്ധ്യാപകര് ഇതിനായി മാറ്റി വെയ്ക്കും. പഠിക്കാനാവശ്യമായ വസ്തുക്കള് സ്കൂള് നല്കും.
ഈ കുടുംബത്തെ നോക്കുന്നത് തങ്ങള്ക്ക് ഒരു ഭാരമല്ലെന്നാണ് അദ്ധ്യാപകര് പറയുന്നത്. സ്വന്തമായി വീട് പോലും ഇല്ലാത്ത കുടുംബത്തിന് വീട് നിര്മ്മിച്ചു കൊടുക്കാനും സ്കൂളിന് പദ്ധതിയുണ്ട്. പിതാവിന്റെ മരണത്തോടെ കുടുംബം കാട്ടാക്കടയിലെ അമ്മാവന്റെ വീട്ടിലേക്ക് മാറിയിരുന്നു. കൂലിപ്പണിക്കാരനായ ദിലീപ് എന്ന സഹോദരനാണ് ഇപ്പോള് കുടുംബത്തെ നോക്കുന്നത്. ദീലീപിനും ഭാര്യയും രണ്ടു മക്കളുമുണ്ട്. കുടുംബത്തിന് വീട് വെയ്ക്കാനായി സുമനസുകളായ ആരെങ്കിലും വസ്തു തന്ന് കനിയുമെന്ന പ്രതീക്ഷയിലാണ് അദ്ധ്യാപകര്.
60 വിദ്യാര്ത്ഥികള്ക്ക് സ്മാര്ട്ട്ഫോണ് കൈമാറുന്ന കൂടെയുണ്ട് കോട്ടന് ഹില് എന്ന പരിപാടി വെള്ളിയാഴ്ച നടത്തിയാകും കുടുംബത്തെ സ്കൂള് ഏറ്റെടുക്കുക. സ്മാര്ട്ട്ഫോണുകളില് 25 എണ്ണം അദ്ധ്യാപകര് സംഭാവന ചെയ്തതാണ്.
