മലപ്പുറം: സി.പി.എമ്മും മുസ്ലിം ലീഗും കൈകോര്ത്ത് സഹകരണവകുപ്പിന്റെ എല്ലാ അന്വേഷണങ്ങളെയും അട്ടിമറിച്ച് സുരക്ഷിത കോട്ടയായി കാത്ത എ.ആര്. നഗര് സഹകരണബാങ്കിലെ കള്ളപ്പണ നിക്ഷേപത്തിന്റെ ഉള്ളുകളി പുറത്തായത് ആദായനികുതി വകുപ്പിന്റെ റെയ്ഡിലൂടെ. 2021 മാര്ച്ച് 26, 27, 28 തീയതികളിലാണ് 30 അംഗ ആദായനികുതി വകുപ്പ് സംഘം ബാങ്കിലും മുന് സെക്രട്ടറിയും നിലവിലെ അഡ്മിനിസ്ട്രേറ്റീവ് ഓഫീസറുമായ വി.കെ. ഹരികുമാറിന്റെ വീട്ടിലും റെയ്ഡ് നടത്തിയത്. 53 പേരുടെ അക്കൗണ്ടുകളിലെ 103 ലക്ഷം രൂപയാണ് അന്ന് ആദായനികുതിവകുപ്പ് കണ്ടുകെട്ടിയത്.
കെ.വൈ.സി രേഖകളില്ലാത്ത, സംശയാസ്പദമായ 257 കസ്റ്റമര് ഐ.ഡി. പരിശോധിക്കാന് ആദായനികുതിവകുപ്പ് സഹകരണ രജി സ്ട്രാര്ക്ക് കത്ത് നല്കി. തുടര്ന്ന് സഹകരണവകുപ്പിലെപ്രത്യേകസംഘം ബാങ്കില് അന്വേഷണം നടത്തി സമര്പ്പിച്ച റിപ്പോര്ട്ടിലാണ് തട്ടിപ്പിന്റെ വലിയ ചിത്രം പുറത്തുവന്നത്.
ആദായനികുതിവകുപ്പ് ചൂണ്ടിക്കാട്ടിയ 257 അക്കൗണ്ട് ഉടമകള്ക്കും നേരിട്ട് ഹാജരായി രേഖകള് സമര്പ്പിക്കാന് രജിസ്ട്രേഡ് തപാലില് കത്തയച്ചെങ്കിലും ഉടമസ്ഥനെ കണ്ടെത്താനാവാതെ കത്തുകള് മടങ്ങി. ഇവരുടെ വിലാസമോ ഫോണ്നമ്പറോ ബാങ്കിലുണ്ടായിരുന്നില്ല. ഇവര്ക്ക് ബാങ്കില് അംഗത്വം ഉള്ളതായും കണ്ടെത്തിയില്ല. ഒരു കസ്റ്റമര് ഐ.ഡിയില് ഒരു അക്കൗണ്ടേ പാടുള്ളൂ എങ്കിലും 257 ഐ.ഡികളില് 862 അക്കൗണ്ടുകളാണ് ഉണ്ടായിരുന്നത്. കഴിഞ്ഞ 10 വര്ഷം 110 കോടി രൂപയുടെ ഇടപാടുകളാണ് ആളറിയാത്ത ബിനാമി അക്കൗണ്ടുകള് വഴി നടത്തിയത്.
ആദായനികുതി വകുപ്പ് സെക്ഷന് 269 ടി പാലിക്കാതെ പത്തുവര്ഷം ബാങ്കില് 1021.53 കോടിയുടെ ഇടപാടുകളും നടത്തിയതായി അന്വേഷണത്തില് കണ്ടെത്തിയിട്ടുണ്ട്.കണ്ണമംഗലം പഞ്ചായത്തിലെ അംഗന്വാടി ടീച്ചറായിരുന്ന ദേവി അംഗന്വാടിക്ക് അടുക്കള നിര്മിക്കാന് ബ്ലോക്ക് പഞ്ചായത്ത് ഫണ്ടില് എ.ആര്. നഗര് ബാങ്കില് ജോയിന്റ് അക്കൗണ്ട് തുറന്നിരുന്നു. വര്ഷങ്ങള്ക്ക് മുമ്പ് തുറന്ന് ഈ അക്കൗണ്ടില് കാര്യമായ ഇടപാടൊന്നും നടത്തിയിരുന്നില്ല. ബാങ്കിലെ 80 ലക്ഷം രൂപ നിക്ഷേപത്തിന്റെ സാമ്പത്തിക സ്രോതസ് കാണിക്കണമെന്നാവശ്യപ്പെട്ട് ആദായനികുതിവകുപ്പിന്റെ കത്ത് ലഭിച്ചപ്പോഴാണ് ദേവി ഞെട്ടിയത്. ഇവര്പോലും അറിയാതെയാണ് ഇവരുടെ വിലാസത്തില് 80ലക്ഷം രൂപ ബാങ്കില് നിക്ഷേപിച്ചത്. തനറിയാതെയാണ് തന്റെ പേരില് മുന് ബാങ്ക് സെക്രട്ടറി ഹരികുമാര് കള്ളപ്പണം നിക്ഷേപിച്ചതായി ദേവി തിരൂരങ്ങാടി പോലീസില് പരാതിയും നല്കി.
മോനു, അമ്മുശ്രീ, സെക്രട്ടറി സസ്പെന്സ് ഓഫ് ഇന്കം ആന്ഡ് എക്സ്പെന്റിച്ചര് എന്നീ അക്കൗണ്ടുകളിലൂടെ കഴിഞ്ഞ 10 വര്ഷം കൊണ്ട് 12 കോടിയോളം രൂപയാണ് ഹരികുമാര് കൈക്കലാക്കിയത്. മോനു സി, അമ്മുശ്രീ എന്നീ അക്കൗണ്ട് ഉടമകളുടെ വിലാസത്തില് അന്വേഷണസംഘം കത്തയച്ചെങ്കിലും ആളെ അറിയില്ലെന്ന് പറഞ്ഞ് കത്ത് മടങ്ങുകയായിരുന്നു. ഗഹാന് ഫീസായി ബാങ്കിലേക്ക് വരേണ്ട പണവും ബാങ്കിലെ മറ്റ് നിക്ഷേപകരുടെ പലിശയടക്കം ഈ അക്കൗണ്ടുകളിലേക്ക് വകമാറ്റിയിട്ടുണ്ട്.
എ.ആര് നഗര് പഞ്ചായത്ത് മാത്രം പ്രവര്ത്തനപരിധിയുള്ള എ.ആര്. നഗര് സഹകരണബാങ്കില് മുസ്ലിം ലീഗ് സംസ്ഥാന വൈസ് പ്രസിഡന്റ് കണ്ണൂര് സ്വദേശിയായ വി.കെ. അബ്ദുള് ഖാദര് മൗലവിയുടെ പേരില് വിവിധ കസ്റ്റമര് ഐ.ഡികളില് വിവിധ അക്കൗണ്ടുകളിലായി രണ്ട് കോടിയോളം രൂപയുടെ നിക്ഷേപമാണുള്ളത്. മുന് എം.എല്.എ: അബ്ദുറഹിമാന് രണ്ടത്താണിക്ക് 20 ലക്ഷം, 30 ലക്ഷം എന്നിങ്ങനെ 50 ലക്ഷം രൂപയുടെ വായ്പയാണ് വഴിവിട്ട് നല്കിയത്. ഒരു രൂപ അടയ്ക്കാതെയാണ് ആദ്യവായ്പ തീര്ത്തത്. ആദ്യ വായ്പതുക മുഴുവന് പലിശ റിബേറ്റും നല്കി. ഇത്തരത്തില് ഞെട്ടിക്കുന്ന തട്ടിപ്പുകളാണ് ബാങ്കില് നടന്നിട്ടുള്ളത്.
