ന്യുഡല്ഹി: ഡല്ഹി രോഹിണി കോടതിയില് ഈ മാസം ആദ്യമുണ്ടായ സ്ഫോടനവുമായി ബന്ധപ്പെട്ട് അറസ്റ്റിലായ സീനിയര് ഡിഫന്സ് റിസര്ച് ആന്റ് ഡവലപ്േെന്റ് ഓര്ഗനൈസേഷന് (ഡി.ആര്.ഡി.ഒ) ശാസ്ത്രജ്ഞന് ഭരത് ഭൂഷണ് കട്ടാരിയ (47) പോലീസ് കസ്റ്റഡിയില് ആത്മഹത്യക്ക് ശ്രമിച്ചു. വാഷ്റൂമില് വച്ചിരുന്ന ഹാന്ഡ് വാഷ് എടുത്ത് കുടിച്ചാണ് ആത്മഹത്യാശ്രമം. ഞായറാഴ്ചയായിരുന്നു സംഭവം.
അബോധാവസ്ഥയില് കിടക്കുന്നത് കണ്ടാണ് ഇദ്ദേഹത്തെ വിളിച്ചേല്പ്പിച്ചത്. ഇതോടെ ശര്ദ്ദിക്കാനും തുടങ്ങി. വയറിന് കടുത്ത വേദനയും അനുഭവപ്പെടുന്നതായി പറഞ്ഞു. ഉടന്തന്നെ ബാബ സഹേബ് അംബേദ്കര് ആശുപത്രിയിലേക്ക് കൊണ്ടുപോയി. നിലവില് ഡല്ഹി എയിംസ് ആശുപത്രിയില് ചികിത്സയിലായിരിക്കുന്ന ഇദ്ദേഹത്തിന്റെ ആരോഗ്യനില തൃപ്തികരമാണെന്ന് പോലീസ് അറിയിച്ചു.
ഡിസംബര് ഒമ്പതിനാണ് ഡല്ഹി രോഹിണി കോടതി 102ാം മുറിയില് ഇദ്ദേഹം ടിഫിന് ബോക്സിനുള്ളില് ഐഇഡി സ്ഫോടകവസ്തു ഉപയോഗിച്ചത്. തനിക്കെതിരെ നിരന്തരം കേസ് കൊടുക്കുന്ന അയല്വാസിയെ കൊലപ്പെടുത്തുക എന്ന ലക്ഷ്യത്തോടെയായിരുന്നു ഇത്. സ്ഫോടനം നടക്കുന്ന സമയം അയല്വാസിയും ഈ കോടതിയിലുണ്ടായിരുന്നു. സ്ഫോടനത്തില് ഒരു ഹെഡ് കോണ്സ്റ്റബിളിന് പരിക്കേറ്റിരുന്നു.
വെള്ളിയാഴ്ച കസ്റ്റഡിയിലെടുത്ത ഇദ്ദേഹത്തെ േചാദ്യം ചെയ്യലിനു ശേഷം അന്നുതന്നെ അറസ്റ്റു ചെയ്തിരുന്നു. തുടര്ന്ന് ഡല്ഹി സ്പെഷ്യല് പോലീസ് സെല് കസ്റ്റഡിയില് വാങ്ങുകയായിരുന്നു.
താന് ഒന്നും കഴിച്ചിട്ടില്ലെന്നാണ് ഇയാള് പോലീസിനോട് പറഞ്ഞത്. എന്നാല് ഹാന്ഡ് വാഷ് കഴിച്ചതായി ഡോക്ടര്മാരോട് സമ്മതിച്ചു. ആരോഗ്യനില മെച്ചപ്പെട്ടാല് ഇന്ന് ഡിസ്ചാര്ജ് ചെയ്യാന് കഴിയുമെന്നും ചോദ്യം ചെയ്യല് തുടരുമെന്നും പോലീസ് അറിയിച്ചു.
പിടിക്കപ്പെട്ടാല് ചോദ്യം ചെയ്യല് നേരിടാന് ഇയാള് നേരത്തെതന്നെ തയ്യാറെടുപ്പുകള് നടത്തിയിരുന്നുവെന്ന് പോലീസ് പറയുന്നു. ചോദ്യങ്ങളില് നിന്ന് ഒഴിഞ്ഞുമാറി ഇയാള് അന്വേഷണ സംഘത്തെ തെറ്റിദ്ധരിപ്പിക്കുകയും തെറ്റായ വിവരങ്ങള് നല്കുകയുമാണ്. അന്വേഷണവുമായി ഒരുവിധത്തിലും സഹകരിക്കുന്നില്ലെന്നും പോലീസ് പറയുന്നു.
