ബോളിവുഡിലെ പ്രശസ്തനായ നടനാണ് വിവേക് ഒബ്റോയ്. രാം ഗോപാൽ വർമ്മയുടെ സൂപ്പർഹിറ്റ് കമ്പനിയിലൂടെയാണ് താരത്തിന്റെ ഹിന്ദി സിനിമയിലെ അരങ്ങേറ്റം. പിന്നീട് ഒരുപാട് നല്ല സിനിമകളുടെ ഭാഗമായി താരം. ‘ലൂസിഫര്’ എന്ന സിനിമയിലെ വില്ലന് കഥാപാത്രത്തിലൂടെ മലയാള സിനിമാപ്രേക്ഷകരുടെ മനസ്സിലും താരം ഇടം നേടിയെടുത്തു. സോഷ്യല് മീഡിയയില് സജീവമായ താരം ഇപ്പോള് പങ്കുവച്ചിരിക്കുന്നത് സ്മൂത്തി തയാറാക്കുന്ന വീഡിയോയാണ്. ചിലപ്പോൾ സന്തോഷത്തിനുവേണ്ടി, മറ്റു ചിലപ്പോൾ വിരസതയകറ്റാനായി ഒക്കെ പലരും പാചക പരീക്ഷണങ്ങൾ നടത്താറുണ്ട്. വിജയിച്ച ഒരു പാചകപരീക്ഷണമാണ് വിവേക് ഒബ്റോയ് പങ്കുവച്ചിരിക്കുന്നത്. സ്വന്തം അടുക്കളയിൽ തനിയെ സ്മൂത്തിയുണ്ടാക്കുന്നതിന്റെ ദൃശ്യങ്ങളാണ് താരം ഷെയര് ചെയ്തിരിക്കുന്നത്. ‘‘എന്റെ അടുക്കളയിൽ സ്മൂത്തികൾ ഉണ്ടാക്കുന്നത് വളരെ രസകരമായ അനുഭവമാണ്’’ എന്ന ക്യാപ്ഷനും നല്കിയാണ് താരത്തിന്റെ പോസ്റ്റ്.
വിവിധതരത്തിലുള്ള പഴങ്ങളരിഞ്ഞെടുത്ത് യോഗർട്ടും സിറപ്പും ചേർത്ത് ഭംഗിയായി ബ്ലെൻഡ് ചെയ്ത സ്മൂത്തി സർവിങ് ഗ്ലാസിലാക്കുന്ന വീഡിയോയാണ് വിവേക് പങ്കുവച്ചിരിക്കുന്നത്. ഒരുപാട് പഴങ്ങള്ക്കിടയില് കുറെയധികം ആപ്പിളുകള് മുറിച്ചു വച്ചിരിക്കുന്നത് കാണാം. പക്ഷേ സ്മൂത്തിയില് ആപ്പിളിടുന്നത് കാണുന്നതേയില്ല. അതുകൊണ്ട് തന്നെ ആപ്പിളില്ലാത്ത സ്മൂത്തി തയാറാക്കാൻ എന്തിനാണ് അത്രയധികം ആപ്പിൾ അരിഞ്ഞു വച്ചിരിക്കുന്നത് എന്നാണ് ആളുകള് കമന്റിലൂടെ ചോദിച്ചിട്ടുണ്ട്.. വിവേക് തയാറാക്കിയ സ്മൂത്തി സൂപ്പര് എന്നതടക്കമുള്ള കമന്റുകളുമുണ്ട്.
