ഭോപ്പാല്: മധ്യപ്രദേശില് അടുത്ത കാലത്ത് കൊല്ലപ്പെട്ട നാല് സെക്യുരിറ്റി ജീവനക്കാരുടെ കൊലയാളികളെ തേടിനടന്ന പോലീസ് പ്രതിയെ കണ്ട് ഞെട്ടി. വെറും 19 വയസ്സ് മാത്രം പ്രായമുള്ള യുവാവ്. ഭോപ്പാല് സ്വദേശിയാണ് സാഗറില് നാല് പേരെ വധിച്ചത്. ഇന്നു പുലര്ച്ചെ 3.30നാണ് പോലീസ് ഇയാളെ പിടികൂടിയത്. ഇയാളുടെ പേരോ മറ്റ് വിവരങ്ങളോ പോലീസ് പുറത്തുവിട്ടിട്ടില്ല.
കൊലപാതകത്തിന്റെ കാരണം കേട്ടപ്പോള് പോലീസിന്റെ ഞെട്ടല് ഇരട്ടിയായി. വെറും പ്രശസ്തിക്ക് വേണ്ടിയാണത്രേ വെറുതെ ആളുകളെ കൊന്നുതള്ളിയത്. നാലു പേരെയല്ല, ആറു പേരെ വധിച്ചുവെന്നാണ് ഇയാളുടെ മൊഴിയില് പറയുന്നത്. നേരത്തെ ഭോപ്പലിനെ ഖജുറിയില് ഒരു സെക്യുരിറ്റി ജീവനക്കാരനെ വധിച്ചു. ഏതാനും വര്ഷം മുന്പ് പുനെയിലൂം ഒരാളെ വധിച്ചുവെന്ന് ഇയാള് പറയുന്നു.
നേരത്തെ കൊലപാതകം നടന്ന സ്ഥലത്തുനിന്ന് കണ്ടെടുത്ത മൊബൈല് ഫോണ് കേന്ദ്രീകരിച്ച് നടത്തിയ അന്വേഷണമാണ് പ്രതിയിലേക്ക് എത്തിയത്. പ്രതിയെ ചോദ്യം ചെയ്തുവരികയാണെന്ന് ഡിജിപി സുധീന് സക്സേന അറിയിച്ചു.
ചൊവ്വാഴ്ച സാഗറില് ആക്രമണത്തിന് ഇരയായ മംഗള് അഹിര്വാള് ബുധനാഴ്ചയാണ് ചികിത്സയിലിരിക്കേ മരിച്ചത്. ഇതിനകം മംഗള് നല്കിയ സൂചനകളുടെ അടിസ്ഥാനത്തില് പോലീസ് പ്രതിയുടെ രേഖാചിത്രം തയ്യാറാക്കി. പ്രതിയെ കുറിച്ച് സൂചന നല്കുന്നവര്ക്ക് പോലീസ് 30,000 രൂപ പാരിതോഷികവും പ്രഖ്യാപിച്ചു.
സെക്യുരിറ്റി ജീവനക്കാരെ മാത്രമാണ് പ്രതി ലക്ഷ്യമിട്ടിരുന്നത്. ഉറങ്ങുന്നവരെ ആക്രമിച്ചുകൊലപ്പെടുത്തുകയാണ് ഇയാളുടെ രീതി. ഉത്തം രജക്, കല്യാണ് ലോധി, സുബ്രഹ്മണ്യം ദുബെ എന്നിവരെയാണ് മൂന്പ് കൊലപ്പെടുത്തിയത്. ഉത്തം രജകിനെ മേയ് മാസത്തിലും മറ്റു രണ്ടു പേരെയും ഞായറാഴ്ചയും തിങ്കളാഴ്ചയുമായിരുന്നു കൊലപ്പെടുത്തിയത്.
