ക്യാമ്പ് ന്യൂ: അത്ലറ്റിക്കോ മാഡ്രിഡിനെ വീഴ്ത്തിയതോടെ സ്പാനിഷ് ലീഗില് റയല്മാഡ്രിഡിനെ പിന്തള്ളി ബാഴ്സിലോണ തലപ്പത്തേക്ക്. അത്ലറ്റിക്കോ മാഡ്രിഡിനെ ഇന്നലെ നടന്ന മത്സരത്തില് 1-0 നായിരുന്നു കാറ്റലൂണിയന് ടീം വീഴ്ത്തിയത്.
ആദ്യപകുതിയില് ഫ്രഞ്ച് താരം ഒസ്മാന ഡെംബലേ നേടിയ ഗോളിലായിരുന്നു വിജയം. ഇരുടീമും പത്തു പേരുമായാണ് കളി പൂര്ത്തിയാക്കിയത്. 22 ാം മിനിറ്റില് ഗാവി നല്കിയ പന്ത് ഡെംബലേ വലയിലാക്കുകയായിരുന്നു. കളിയുടെ അവസാന ഇഞ്ചുറി ടൈമില് വഴക്കടിച്ചതിന് അത്ലറ്റിക്കോയുടെ സ്റ്റീഫന് സെവിക്കും ബാഴ്സിലോണയുടെ ഫെറന് ടോറസും ചുവപ്പ് കാര്ഡ് കണ്ട് പുറത്തായി. ഈ വിജയത്തോടെ സാവിയുടെ ടീമിന് 16 കളികളില് 41 പോയിന്റായി. അത്രയും മത്സരത്തില് നിന്നും റയലിന് 38 പോയിന്റ് നേടാനേ കഴിഞ്ഞിട്ടുള്ളൂ.
റയല്മാഡ്രിഡ് രണ്ടാം സ്ഥാനത്താണ്. വിയ്യാ റയലിനോട് കഴിഞ്ഞ ദിവസം തോല്വി ഏറ്റതാണ് റയലിന് തിരിച്ചടിയായത്. വിയ്യാ റയലിനും അത്ലറ്റിക്കോ മാഡ്രിഡിനും 27 പോയിന്റുകളാണ്. അത്ലറ്റിക്കോ അഞ്ചാമതും വിയ്യാ റയല് ആറാം സ്ഥാനത്തുമാണ്. ഏഴു കളികള് കൂടി ബാക്കി നില്ക്കേ ലാലിഗയില് ചാംപ്യന്മാരാകാന് ഇഞ്ചോടിഞ്ച് പോരാട്ടമാണ് നടക്കുന്നത്.
