കൊച്ചി : സെയ്ഫ് ആന്റ് സ്ട്രോങ് സാമ്പത്തിക തട്ടിപ്പ് കേസില് അറസ്റ്റിലായ പ്രവീണ് റാണ പോലീസ് കസ്റ്റഡിയില്. പോലീസ് പിടികൂടുന്ന സമയം സന്യാസി വേഷത്തിലായിരുന്നു. പ്രവിണ് റാണ ഒളിവില് കഴിഞ്ഞ പൊള്ളാച്ചിയിലെ വീടിന്റെ ദൃശ്യങ്ങള് പോലീസി പുറത്തു വിട്ടു. ദേവരായപുരത്തെ കരിങ്കല് ക്വാറിയിലായിരുന്നു റാണ ഒളിവില് കഴിഞ്ഞത് .
കോയമ്പത്തൂരിനും പൊള്ളാച്ചിക്കും ഇടയിലാണ് ഈ സ്ഥലം. ഒളിസങ്കേതത്തിലേക്ക് അന്വേഷണ സംഘം എത്തിയപ്പോള് പട്ടിയെ അഴിച്ചു വിട്ടു. അതിസാഹസികമായാണ് റാണയെ പോലീസ് കീഴ്പ്പെടുത്തിയത്. പെരുമ്പാവൂര് സ്വദേശിയാണ് റാണയ്ക്ക് ഒളിവില് താമസിക്കാന് അവസരം ഒരുക്കി നല്കിയത്. ഒളിത്താവളത്തില് നിന്നും അതിഥി തൊഴിലാളിയുടെ ഫോണ് ഉപയോഗിച്ച് വീട്ടിലേക്ക് വിളിച്ചതാണ് അന്വേഷണ സംഘത്തെ റാണയിലേക്ക് നയിച്ചത്. ഒപ്പം ഉണ്ടായിരുന്ന മൂന്ന് അംഗരക്ഷകരെയും പോലീസ് കീഴടക്കിയിരുന്നു.
ഉന്നത ഉദ്യോഗസ്ഥരുടെ നേതൃത്വത്തില് പ്രതിയെ ചോദ്യം ചെയ്ത് വരുകയാണ്. അന്വേഷണത്തോട് റാണ പൂര്ണ്ണമായും സഹകരിക്കുന്നതായി പോലീസ്സംഘം അറിയിച്ചു. റാണയെ ഇന്ന് തൃശൂരിലെത്തിക്കും. അതേ സമയം തനിക്ക് ഒമ്പത് മാസം കൊണ്ട് മുഴുവന് പണം തിരികെ നല്കാന് കഴിയുമെന്നും അതില് ആത്മവിശ്വാസം ഉണ്ടെന്നും റാണ പറഞ്ഞു.
സേഫ് ആന്റ് സ്ട്രാങ് നിധി എന്ന പേരില് സ്ഥാപനം ഉണ്ടാക്കി ജനങ്ങളില് നിന്നും 100 കോടി തട്ടിയെടുത്തെന്നതാണ് റാണയ്ക്കെതിരെയുള്ള കേസ്. 18 കേസുകളാണ് റാണയുടെ പേരില് രജിസ്റ്റര് ചെയ്തിരിക്കുന്നത്.
