ന്യൂഡല്ഹി: ഇന്ത്യയെ ഞെട്ടിച്ച അഗസ്റ്റാവെസ്റ്റ്ലാന്റ് അഴിമതിക്കേസില് ഇടനിലക്കാരന്റെ ഡയറി പുറത്ത്. ഒരു രാഷ്ട്രീയ കുടുംബത്തിന് 120 കോടി നല്കിയെന്നത് ഉള്പ്പെടെ 450 കോടി രാഷ്ട്രീയ നേതാക്കള്ക്ക് കൈക്കൂലി നല്കിയതായിട്ടുള്ള വിവരമാണ് ഇതിലുള്ളത്.
പാര്ലമെന്റില് പ്രധാനമന്ത്രി നരേന്ദ്രമോഡിക്കെതിരേ അഴിമതി ആരോപണം ഉന്നയിച്ച് പ്രതിപക്ഷം വന് ആക്രമണത്തിന് തയ്യാറെടുപ്പ് നടത്തിയിരിക്കെ അതിന്റെ മുനയൊടിച്ചുകൊണ്ടാണ് പുതിയ വിവരം എത്തിയിരിക്കുന്നത്. പുറത്തുവന്നിരിക്കുന്ന തെളിവുകള് ഗൗരവതരമാണെന്നും അത് പാര്ലമെന്റില് ചര്ച്ച ചെയ്യണമെന്നും നഗരവികസന മന്ത്രി വെങ്കയ്യനായിഡു പ്രതികരിച്ചു. തെളിവുകള് ഉണ്ടെങ്കില് ഹാജരാക്കാനാണ് കോണ്ഗ്രസിന്റെ ആരോപണം.
യുപിഎ സര്ക്കാരിന്റെ കാലത്ത് നടന്ന അഴിമതിയില് സോണിയഗാന്ധി ഉള്പ്പെടെയുള്ള കോണ്ഗ്രസ് നേതാക്കള്ക്കെതിരേ ആരോപണം ഉയര്ന്ന കേസാണിത്. നോട്ട് പ്രതിസന്ധിയുമായി ബന്ധപ്പെട്ട കേസില് നരേന്ദ്രമോഡി അഴിമതി കാണിച്ചെന്ന ആരോപണം കഴിഞ്ഞ ദിവസം കോണ്ഗ്രസ് നേതാവ് രാഹുല്ഗാന്ധി ഉയര്ത്തിയിരുന്നു. ഇക്കാര്യത്തില് തന്റെ കയ്യില് തെളിവുണ്ടെന്ന് പറഞ്ഞ് രാഹുല് എത്തിയിരുന്നു.
