തിരുവനന്തപുരം: ഉമ്മന്ചാണ്ടിയ്ക്ക് ജര്മ്മനിയില് സര്ജറിക്ക് ശേഷം തുടര്റിവ്യു ബംഗ്ളൂരിലാണ് നടത്തി വരുന്നതെന്നും ചികിസ്തയുടെ വിവരം മുതിര്ന്ന കോണ്ഗ്രസ് നേതാക്കള് ഉള്പ്പെടെയുള്ളവരെ അപ്പപ്പോള് തന്നെ അറിയിക്കുന്നുണ്ടെന്നും മകനും യൂത്ത്കോണ്ഗ്രസ് നേതാവുമായ ചാണ്ടി ഉമ്മന്.
പിതാവിന്റെ ആരോഗ്യകാര്യത്തില് നടക്കുന്നതെല്ലാം അനാവശ്യ പ്രചരണങ്ങളാണെന്നും ഉമ്മന്ചാണ്ടിയ്ക്ക് മരുന്നൊന്നും നല്കാതെ പ്രാര്ത്ഥിക്കുകയാണെന്ന ചിലരുടെ പ്രചാരണം തെറ്റാണെന്നും പറഞ്ഞു. തുടര്ചികിത്സയുടെ ഭാഗമായി തിങ്കളാഴ്ച ബംഗലുരുവിലേക്ക് പോകാനിരുന്നതാണ് വിശ്രമം വേണമെന്ന് തോന്നിയതിനാലാണ് മാറ്റിയതെന്നും ഇപ്പോള് അദ്ദേഹത്തെ നിംസില് പ്രവേശിപ്പിച്ചിരിക്കുകയാണെന്നും പറഞ്ഞു.
ഒരു ചാനലിന് നല്കിയ വാര്ത്താപരിപാടിയിലാണ് ചാണ്ടി ഉമ്മന്റെ പ്രതികരണം. നല്ല ചികിത്സ ലഭിക്കുന്നുണ്ടെന്ന് കഴിഞ്ഞ ദിവസം പിതാവ് തന്നെ തന്റെ മാതാവിന്റെയും മുതിര്ന്ന കോണ്ഗ്രസ് നേതാക്കളുടെയും സാന്നിദ്ധ്യത്തില് മറുപടി നല്കിയതാണ്. അത്തരത്തില് ഒരു വീഡിയോ ഇടേണ്ടി വന്നത് തന്റെ ഗതികേടാണെന്നും അത്തരത്തില് ഒരു മകന്റെ ഗതികേട് മറ്റാര്ക്കും വരാതിരിക്കട്ടേയെന്നും പറഞ്ഞു.
ചികിത്സയുടെ വിവരങ്ങള് രാഹുല്ഗാന്ധിയേയും എ.കെ.ആന്റണി സാറിനെയും സുധീരന് സാറിനെയും അപ്പായുമായി വളരെ അടുപ്പമുള്ളവരെയും ധരിപ്പിക്കുന്നുണ്ട്. കഴിഞ്ഞ ഏഴെട്ടു വര്ഷമായി പിതാവിന്റെ ആരോഗ്യം സംരക്ഷിക്കാന് താന് പെടാപ്പാട് പെടുകയാണെന്നും ഒരു മകന്റെ ധര്മ്മം നന്നായി നിര്വഹിക്കുന്നുണ്ടെന്നും അപ്പായുടെ ജീവന് വച്ച് വില പേശരുതെന്നേ വിമര്ശകരോട് പറയാനുള്ളെന്നും പറഞ്ഞു.
കഴിഞ്ഞ ഡിസംബറില് റിവ്യു നടത്തിയപ്പോള് നല്ല കുറവുണ്ടായിരുന്നു.എന്നാല് അടുത്ത റിവ്യുവില് അഞ്ചു ശതമാനം കൂടി.അപ്പോള് ബംഗ്ളൂരുവിലെ ഡോക്ടറുമായി ആലോചിച്ചു. രണ്ടാഴ്ച മരുന്ന് കഴിച്ചിട്ട് നോക്കാമെന്ന് കൂട്ടായ തീരുമാനമാണ് അന്ന് ഡോക്ടറുമായി ചര്ച്ച ചെയ്തെടുത്തതെന്നും പറഞ്ഞു.
