ലോകകപ്പില് അര്ജന്റീനയെ ആദ്യ മത്സരത്തില് വിറപ്പിച്ചുവിട്ട സൗദി അറേബ്യ ടീമിന്റെ ഗോള്നേട്ടക്കാരന് അല് ദവ്സാരി ഇത്തവണ ഞെട്ടിച്ചത് ബ്രസീലിനെ. ഫിഫ ക്ലബ്ബ് ലോകകപ്പ് സെമിയില് ബ്രസീലിയന് ടീം ഫ്ളെമെംഗോയെ അട്ടിമറിച്ച് സൗദി ലീഗിലെ വമ്പന്മാരായ അല് ഹിലാല് ഫൈനലില് കടന്നു.
ചൊവ്വാഴ്ച നടന്ന സെമിയില് 3-2 നായിരുന്നു അല് ഹിലാലിന്റെ ജയം. സ്പാനിഷ് ക്ലബ്ബ് റയല് മാഡ്രിഡോ ഈജിപ്ഷ്യന് ക്ലബ്ബ് അല് അഹ്ളിയോ കലാശപ്പോരില് ഹിലാലിന് എതിരാളിയാകും. ഈ ക്ലബ്ബുകള് തമ്മിലാണ് രണ്ടാം സെമിഫൈനലില് ഏറ്റുമുട്ടുന്നത്. ഇതോടെ ക്ലബ്ബ് ലോകകപ്പ് ഫൈനലില് എത്തുന്ന ആദ്യ സൗദി അറേബ്യന് ക്ലബ്ബ് എന്ന നേട്ടത്തിലേക്കും അല് ഹിലാല് എത്തിച്ചേര്ന്നു.
ഖത്തറില് കഴിഞ്ഞ വര്ഷം നടന്ന ലോകകപ്പ് ഫുട്ബോളില് അര്ജന്റീനയെ ആദ്യ മത്സരത്തില് അട്ടിമറിച്ച സൗദി ദേശീയ ടീമിന്റെ സ്ട്രൈക്കര് സാലേം അല് ദാവ്സാരിയാണ് ഫ്ളെമെംഗോയ്ക്ക് എതിരേ വിജയഗോള് നേടിയത്. 2019 ലും ഫ്ളെമെംഗോയ്ക്ക് എതിരേ സാലേം സ്കോര് ചെയ്തിരുന്നു. ക്ലബ്ബ് ലോകകപ്പ് ടൂര്ണമെന്റില് ഒരേ എതിരാളികള്ക്ക് എതിരേ തുടര്ച്ചയായി രണ്ടു തവണ സ്കോര് ചെയ്ത താരമാകാനും ഇതോടെ അല് ദാവ്സാരിയ്ക്ക് കഴിഞ്ഞു.
രണ്ടാം പകുതിയില് മിഡ്ഫീല്ഡര് ജെര്സണ് രണ്ടാം മഞ്ഞക്കാര്ഡും വാങ്ങി പുറത്തുപോയത് സൗദി ക്ലബ്ബിന് അഡ്വാന്റേജ് ആയി മാറി. സൗദി ക്ലബ്ബിന്െ വീറ്റോയെ വീഴ്ത്തിയതിനായിരുന്നു രണ്ടാം മഞ്ഞക്കാര്ഡ്. ആദ്യ പകുതിയില് 15 ാം മിനിറ്റില് ബോക്സില് അഭിനയിച്ചതിനായിരുന്നു ആദ്യ കാര്ഡ്.
