തെന്നിന്ത്യ മുഴുവന് ആരാധകരുള്ള താരമാണ് മഹേഷ് ബാബു. തെലുങ്ക് സൂപ്പര്താരമായ മഹേഷ് ബാബു സംവിധായകന് ത്രിവിക്രമിന്റെ വരാനിരിക്കുന്ന പേരിടാത്ത പ്രോജക്ടിന്റെ തിരക്കിലാണിപ്പോള്. ഇപ്പോഴിതാ ജിമ്മില് നിന്നുള്ള തന്റെ വര്ക്കൗട്ട് ചിത്രങ്ങള് പങ്കുവച്ച് ഇന്സ്റ്റഗ്രാമില് എത്തിയിരിക്കുകയാണ് താരം. ഒറ്റയ്ക്കുള്ളതും പരിശീലകനൊപ്പം ഉള്ളതുമായ രണ്ട് വര്ക്കൗട്ട് ചിത്രങ്ങളാണ് താരം പങ്കുവച്ചിരിക്കുന്നത്. നീല സ്ലീവ്ലെസ് ടീ ഷര്ട്ടും, ചാര നിറമുള്ള ഷോര്ട്ടും, മെറൂണ് നിറമുള്ള ഷൂസുമാണ് മഹേഷ് ധരിച്ചിരിക്കുന്നത്. ആദ്യ ചിത്രത്തില് തന്റെ ബൈസെപ്സ് കാണിച്ച് ഫോട്ടോയ്ക്ക് പോസ് ചെയ്യുന്ന താരത്തെ കാണാം, രണ്ടാമത്തെ ചിത്രം വര്ക്കൗട്ടിനിടെ തന്റെ പരിശീലകനും ഫിസിയോ തെറാപിസ്റ്റുമായ ഡോക്ടര് മിനാഷ് ഗബ്രിയേലിനൊപ്പമുള്ളതാണ്. ‘ആം ഡേ’ എന്ന ക്യാപ്ഷനും ബൈസെപ്സിന്റെ ഇമോജിയും നല്കിയാണ് താരം ചിത്രം ഷെയര് ചെയ്തിരിക്കുന്നത്. ചിത്രങ്ങള് കണ്ടിട്ട് മഹേഷിന്റെ ഭാര്യ നമ്രത ശിരോദ്കറും ഒരുകൂട്ടം ഫയര് ഇമോജികള് കമന്റായി നല്കിയിട്ടുണ്ട്.
തന്റെ വിവാഹ വാര്ഷികം ആഘോഷിക്കാനായി രണ്ടാഴ്ച മുമ്പ് മഹേഷ് സ്വിറ്റ്സര്ലന്ഡിലേയ്ക്ക് പോയിരുന്നു. ബ്രഹ്മാണ്ഡ സംവിധായകന് എസ് എസ് രാജമൗലിയുടെ സംവിധാനത്തിലൊരുങ്ങുന്ന പുതിയ പ്രോജക്ടിനെ കുറിച്ചുള്ള പ്രഖ്യാപനവും മഹേഷ് ബാബു നടത്തിയിരുന്നു. രാജമൗലിയുമായി മഹേഷ് ബാബു ഒന്നിക്കുന്നതിന്റെ സന്തോഷം ആരാധകര് പങ്കുവച്ചതിന്റെ പിന്നാലെയാണ് താരത്തിന്റെ വര്ക്കൗട്ട് ചിത്രങ്ങളും വൈറലാകുന്നത്. ബൈസെപ്സ് ചിത്രങ്ങള് പ്രത്യക്ഷപ്പെട്ടതോടെ മഹേഷ് ബാബു ബോളിവുഡിനായി ഒരുങ്ങി കഴിഞ്ഞുവെന്നാണ് ആരാധകര് പറയുന്നത്.
