ലിസ്ബേന്: ലോകഫുട്ബോളിലെ സൂപ്പര്താരം ക്രിസ്ത്യാനോ റൊണാള്ഡോ തന്റെ ടീമിലെ അവിഭാജ്യഘടകമെന്ന് പോര്ച്ചുഗലിന്റെ പുതിയ പരിശീലകന് റോബര്ട്ടോ മാര്ട്ടീനസ്. യൂറോ 2024 യോഗ്യതാ മത്സരങ്ങള്ക്കായി ഒരുങ്ങുന്ന തന്റെ ടീമിലേക്ക് 38 കാരനായ അല് നസര് താരത്തെ റോബര്ട്ടോ മാര്ട്ടീനസ് ഉള്പ്പെടുത്തിയിരുന്നു. ഇത് താരത്തിന് യൂറോ 2024 ലേക്ക് അവസരമാകുമോയെന്നാണ് ആരാധകര് ഉറ്റുനോക്കുന്നത്.
ഖത്തര് ലോകകപ്പില് ക്വാര്ട്ടറില് പോര്ച്ചുഗല് പുറത്തായ അവസാന മത്സരത്തില് ദേശീയ ടീമില് പരിശീലകന് സാന്റോസ് ക്രിസ്ത്യാനോയെ ഉള്പ്പെടുത്തിയിരുന്നില്ല. എന്നാല് യൂറോ യോഗ്യതാ മത്സരങ്ങള്ക്ക് മുന്നോടിയായി മാര്ച്ച് 23 ന് ലക്സംബര്ഗിനെതിരേയുള്ള മത്സരത്തില് പോര്ച്ചുഗല് കളിക്കാനിരിക്കുമ്പോള് താരത്തെ ടീമില് ഉള്പ്പെടുത്തിയിരിക്കുകയാണ് പുതിയ പരിശീലകന്.
എന്തുകൊണ്ടാണ് താന് ക്രിസ്ത്യാനോയെ ടീമില് ഉള്പ്പെടുത്തിയതെന്ന് മാര്ട്ടീനസ് വ്യക്തമാക്കുകയും ചെയ്തു. ''അദ്ദേഹത്തിന്റെ പ്രായം ഞാന് കാര്യമാക്കുന്നില്ല. ക്രിസ്ത്യാനോ വളരെ അര്പ്പണ മനോഭാവമുള്ള കളിക്കാരനാണ്. അദ്ദേഹത്തിന്റെ പരിചയസമ്പന്നത ടീമിന് മുതല്ക്കൂട്ടാകും. അദ്ദേഹം ടീമിലെ പ്രധാന മുഖങ്ങളില് ഒന്നാണ്.'' മാര്ട്ടീനസ് പറഞ്ഞു. അതേസമയം യൂറോപ്പില് നിന്നും സൗദി പ്രോലീഗിലേക്ക് എത്തിയ ക്രിസ്ത്യാനോ ഒമ്പതു കളികളില് എട്ടു ഗോളുകള് നേടി നില്ക്കുകയാണ്. കഴിഞ്ഞ രണ്ടു മത്സരങ്ങളിലും താരത്തിന് ഗോള് നേടാനോ അസിസ്റ്റ് നല്കാനോ കഴിഞ്ഞിട്ടില്ല.
അതേസമയം ഏറ്റവും കൂടുതല് അന്താരാഷ്ട്ര ഗോളുകള് നേടിയ താരമാണ് ക്രിസ്ത്യാനോ. 196 കളികളില് പോര്ച്ചുഗല് ജഴ്സി അണിഞ്ഞ താരം 118 ഗോളുകളും നേടിയിട്ടുണ്ട്. താരത്തിന്റെ നിലവിലെ ഫോം ഒരങ്കത്തിന് കൂടി ബാല്യമുണ്ടെന്ന നിലയിലാണ് കാര്യങ്ങളെ കാണിക്കുന്നത്. ലോകകപ്പില് ക്വാര്ട്ടറില് മൊറോക്കോയോട് തോറ്റാണ് പോര്ച്ചുഗല് പുറത്തായത്. ഇതിന് പിന്നാലെ സാന്റോസ് പരിശീലക സ്ഥാനത്ത് നിന്നും മാറുകയും പുതിയ പരിശീലകനായി റോബര്ട്ടോ മാര്ട്ടീനസ് വരികയുമായിരുന്നു. മുമ്പ് ബല്ജിയം പരിശീലകനായിരുന്നു മാര്ട്ടീനസ്.
