കൊച്ചി: മലയാളികളായ മുഴുവന് ഫുട്ബോള് പ്രേമികളെയും ഷൂട്ടൗട്ടില് നിരാശപ്പെടുത്തി കേരളാ ബ്ളാസ്റ്റേഴ്സ് ഇന്ത്യന് സൂപ്പര്ലീഗ് ഫുട്ബോളിന്റെ മൂന്നാം സീസണില് തിരശീല ഇട്ടെങ്കിലും ആരാധകര്ക്ക് ടീം ഉടമ സച്ചിന്റെയും ഗാംഗുലിയുടേയും ആദരം. കൊച്ചിയില് ടീമിന് കിട്ടിയത് അവിശ്വസനീയമായ പിന്തുണയെന്ന് സച്ചിന് പ്രതികരിച്ചു. കളിക്ക് പിന്നാലെ മാധ്യമങ്ങളെ കാണാന് വിസമ്മതിച്ച സച്ചിന് ഹോട്ടലിലേക്ക് മടങ്ങുന്നതിന് മുമ്പായിട്ടാണ് ഇങ്ങിനെ പ്രതികരിച്ചത്.
കളി തോറ്റതോടെ കൊച്ചിയിലെ സ്റ്റേഡിയം നിറഞ്ഞു നിന്ന ആരാധകരും നിരാശരായി. അതേസമയം കൊച്ചിയിലെ കാണികള് അമ്പരപ്പിക്കുന്നതാണ് എന്നതായിരുന്നു മുന് ഇന്ത്യന് നായകന് സൗരവ് ഗാംഗുലിയെ അമ്പരപ്പിച്ചത്. അവിശ്വസനീയമായ ആരാധകര് എന്നായിരുന്നു ഗാംഗുലി വിശേഷിപ്പിച്ചത്.
അതേസമയം കിരീടം കൈവിട്ടതില് പരിശീലകന് സ്റ്റീവ് കോപ്പല് ആരാധകരോട് മാപ്പു പറഞ്ഞു. നിങ്ങള് നല്കിയ പിന്തുണയ്ക്ക് മതിയായ പ്രതിഫലം നല്കാന് കഴിയാത്തതില് ഖേദമുണ്ടെന്ന് പറഞ്ഞു. തങ്ങള് തോറ്റില്ല. മത്സരം സമനിലയിലാക്കി പെനാല്റ്റിയിലാണ് നഷ്ടമായതെന്നും കോപ്പല് പറഞ്ഞു. ക്ഷീണിതരായ രണ്ടു ടീമുകളുടെ ഏറ്റുമുട്ടലാണ് ഫൈനലില് കണ്ടത്. എന്നിരുന്നാലും കൊല്ക്കത്തയെ അഭിനന്ദിക്കുന്നതായും കോപ്പല് പറഞ്ഞു. മത്സരക്രമത്തിലെ തിരക്കിട്ട ഷെഡ്യൂള് മൂലം തങ്ങള്ക്ക് വേണ്ടവണ്ണം പരിശീലിക്കാനുള്ള സമയം കിട്ടിയില്ലെന്നും കഴിഞ്ഞ കളിയ്ക്കും യാത്രയ്ക്കും ഇടയിലെ മൂന്ന് ദിവസം കളിക്കാരെ ക്ഷീണിപ്പിച്ചു കളഞ്ഞെന്നും അദ്ദേഹം വ്യക്തമാക്കി. ഏഴു ദിവസത്തിനിടയില് കളിക്കേണ്ടി വന്നത് മൂന്ന് മത്സരങ്ങളാണ്. ഇതിന് പുറമേ ഡല്ഹിയിലേക്കുള്ള നീണ്ട യാത്രകളും.
ഡല്ഹിയിലെ കളി കഴിഞ്ഞ ശേഷം ഉടന് മടങ്ങാന് വിമാനം കിട്ടിയില്ല. ഇതേ തുടര്ന്ന് ഡല്ഹിയില് തന്നെ ഒരു ദിവസം കഴിയേണ്ടി വന്നു. പിന്നേറ്റ് രണ്ടായിട്ടാണ് ടീം കൊച്ചിയിലേക്ക് തിരിച്ചെത്തിയത്. പുലര്ച്ചെ അഞ്ചു മണിയോടെ ഡല്ഹി വിട്ട ടീമിന് രാവിലെ എട്ടു മണിയോടെയാണ് മടങ്ങിയെത്താനായത്. ഈ ദുരിതത്തിനിടയിലും ടീം നന്നായിട്ടാണ് കളിച്ചത്. കിരീടം നേടാന് പരമാവധി അവര് യത്നിച്ചു. ലീഗില് ഉടനീളം ഒപ്പം നിന്ന കാണികള്ക്ക് എല്ലാവിധ നന്ദിയും അറിയുക്കുന്നു. ട്രോഫി കൊണ്ടുവരാന് കഴിഞ്ഞില്ലെങ്കിലും മഹത്തായ അനുഭവമായിരുന്നു ഇതെന്നും കോപ്പല് പറഞ്ഞു.
ഡല്ഹിക്കെതിരേ പരുക്കിലായ ഹ്യൂസിനെ ആദ്യപകുതിയില് വലിക്കേണ്ടി വന്നതിനെ കുറിച്ചും കോപ്പല് പറഞ്ഞു. ഹ്യൂസിനെ ടീമില് നിലനിര്ത്താന് നിര്ബ്ബന്ധിതമാകുകയായിരുന്നു. അതേസമയം അദ്ദേഹത്തിന് സ്വതസിദ്ധമായ കളി കളിക്കാന് കഴിയാതെ വന്നപ്പോഴാണ് പകരക്കാരനെ വേണ്ടി വന്നതെന്നും പറഞ്ഞു. അടുത്ത സീസണില് എത്തുമോയെന്ന കാര്യം ഇപ്പോള് പറയാനാകില്ലെന്നും ടീം ഉടമകളുമായി കൂടിക്കാഴ്ച നടത്തി ഒട്ടേറെ കാര്യങ്ങള് ചര്ച്ച ചെയ്യാനുണ്ടെന്നും ഇപ്പോള് അടുത്ത സീസണില് ഉണ്ടാകുമെന്ന് പറയാനാകില്ലെന്നും കോപ്പല് പറഞ്ഞു.
