ആലെപ്പോ- അതൊരു ചരിത്രനഗരമായിരുന്നു. ഇന്നാകട്ടെ അക്ഷരാര്ഥത്തില് പ്രേതനഗരവും. സിറിയയില് ആഭ്യന്തരസംഘര്ഷം പൊട്ടിപ്പുറപ്പെടുന്നതിനുമുമ്പ് ഏറ്റവും വലിയ ജനസംഖ്യയുള്ള നഗരമായിരുന്നു അത്. 'ഹലാബ്' എന്ന് അറബിയില് അറിയപ്പെടുന്ന ആലെപ്പോ സംസ്കാരങ്ങളുടെ കളിത്തൊട്ടിലായാണ് വിവക്ഷിക്കപ്പെടുന്നത്. നൂറ്റാണ്ടുകളുടെ പഴക്കമുള്ള ഒരു നഗരമാണ് സിറിയന് സംഘര്ഷത്തിന്റെ കേന്ദ്രഭൂമി. സിറിയയുടെ വടക്ക്-പടിഞ്ഞാറായി സ്ഥിതിചെയ്യുന്ന ഈ നഗരം ബഷര് അല് അസദിന്റെയും വിമതരുടെയും നിരന്തരാക്രമണത്തില് തകര്ന്നടിഞ്ഞിരിക്കുക തന്നെയാണ്. റഷ്യയുടെയും ഇറാന്റെയും സൈന്യം കൂടി അസദിനോടൊപ്പം ചേര്ന്ന് പോരടിക്കുമ്പോള് തകര്ന്നടിയുന്നത് മനുഷ്യകുലത്തോളം പഴക്കമുള്ള ഒരു സംസ്കാരിക ഭൂമിക കൂടിയാണ്. ഇസ്ലാമിക് സ്റ്റേറ്റിന്റെ (IS) സാന്നിധ്യവും നാമമാത്രതോതില് ആലെപ്പോയിലുണ്ട്.
അഞ്ചു വര്ഷങ്ങള് പിന്നിട്ട സിറിയന് സംഘര്ഷത്തിലെ ഏറ്റവും സംഘര്ഷഭരിതമായ പ്രദേശമായാണ് ആലെപ്പോ കണക്കാക്കപ്പെടുന്നത്. അസദ് ഭരണകൂടത്തിനെതിരെ അറബ് വസന്തത്തിന്റെ പശ്ചാത്തലത്തില് പ്രക്ഷോഭം പൊട്ടിപ്പുറപ്പെട്ടപ്പോള് മുതല് (2011- 12) ആലെപ്പോയും സംഘര്ഷവേദിയായി മാറുകയായിരുന്നു.
2012 ഫ്രെബ്രുവരിയായപ്പോഴേക്കും പൂര്ണമായും ഈ നഗരം അസദ് വിരുദ്ധര് പിടിച്ചെടുത്ത് കഴിഞ്ഞിരുന്നു. 2015 മുതല് ഏറെ രക്തക്കറ ആലെപ്പോ തെരുവുകളില് വീണിട്ടുണ്ട്. തെരുവോരങ്ങളില് നിന്ന് വെടിയൊച്ചകള് പതിവായി. സംഘര്ഷവും ദൈന്യതയും ജീവിതചര്യയുടെ ഭാഗമായി മാറി. 2015 ഒക്ടോബര് മുതല് റഷ്യയുടെ നേതൃത്വത്തില് വ്യോമാക്രമണം തുടങ്ങിയത് മുതലാണ് സംഘര്ഷം അതിന്റെ പാരമ്യത്തിലെത്തുന്നത്. ഇതോടൊപ്പം 2000 ത്തിലധികം വരുന്ന ഇറാഖില് നിന്നുള്ള ഷിയാ പിന്തുണയുള്ള ഹിസ്ബുല്ലേകളും, കുര്ദുകളും, ഇറാനില് നിന്നുള്ള ഇസ്ലാമിക് റെവല്യൂഷണറി ഗാര്ഡുകളുമൊക്കെച്ചേര്ന്ന് ആലെപ്പോ നിയന്ത്രണത്തിനായുള്ള സംഘര്ഷത്തില് ചോരച്ചാലുകള് തന്നെയാണൊഴുകിയത്. അല്നുസ്രയും അല്ക്വെദയും ഒക്കെ കുളം കലക്കാന് ശ്രമിക്കുന്നുണ്ട്.
2016 ജൂലൈയില് റഷ്യന് വ്യോമാക്രമണത്തിന്റെ ഫലമായി 2.5 ലക്ഷത്തോളം ആലെപ്പോ നിവാസികളുടെ പുറംലോകവുമായുള്ള ബന്ധമാണ് മുറിക്കപ്പെട്ടത്. ഓഗസ്റ്റ്, സെപ്തംബര് മാസങ്ങളോടെ അസദിന്റെ സിറിയന് സൈന്യം ആലെപ്പോ തിരികെ പിടിച്ചപ്പോള് ലഭിച്ചതാകട്ടെ ആലെപ്പോ എന്ന പ്രേതനഗരത്തിന്റെ നിയന്ത്രണവും. സിറിയന് സംഘര്ഷം ഇപ്പോള് അതിന്റെ എല്ലാ സീമകളും ലംഘിച്ചുകൊണ്ട് ഒരു അമേരിക്കന്- റഷ്യന് ശീതസമരമായി പരിണമിച്ചിരിക്കുകയാണ്.
ആലെപ്പോയില് മാത്രമല്ല സിറിയയില് ആകമാനവും സംഘര്ഷത്തിന്റെ ഫലമായി കടുത്ത അരാജകാവസ്ഥയിലേക്ക് നീങ്ങുകയാണ്. ഭക്ഷണത്തിനും മരുന്നിനും മറ്റ് അവശ്യവസ്തുക്കള്ക്കുമായി ജനങ്ങള് പരക്കംപായുകയാണ്. 2.75 ലക്ഷത്തിനും 3.20 ലക്ഷത്തിനുമിടയില് ജനങ്ങള് ആലെപ്പോ എന്ന ദുരന്തനഗരത്തില് കുടുങ്ങിക്കിടക്കുകയാണ്. ഇതില് ഒരു ലക്ഷത്തിലധികം കുട്ടികളാണ്. നൂറുകണക്കിനാളുകള്ക്കാണ് കഴിഞ്ഞദിവസങ്ങള് റഷ്യ, അമേരിക്ക എന്നിവരുടെ നേതൃത്വത്തിലുള്ള അക്രമണങ്ങളില് ജീവന് നഷ്ടപ്പെട്ടിട്ടുള്ളത്.
