ആലപ്പുഴ : കെ.ആര്. ഗൗരിയമ്മയെ മരണാനന്തരം ഏറ്റെടുത്തും മുന് ജെ.എസ്.എസ്. നേതാക്കളെ അടക്കം പാര്ട്ടിയിലേക്ക് തിരികെ എത്തിച്ചും സി.പി.എം. നീക്കം. സി.പി.എമ്മില് നിന്ന് പുറത്താക്കപ്പെട്ട ഗൗരിയമ്മയുടെ നേതൃത്വത്തില് 1994ല് രൂപീകൃതമായ ജെ.എസ്.എസിനൊപ്പം തുടക്കംമുതലുണ്ടായിരുന്ന മുന് എം.എല്.എ: കെ.കെ. ഷാജുവും ജെ.എസ്.എസ്. സംസ്ഥാന- ജില്ലാ നേതാക്കളും ഉള്പ്പടെ 700പേര് സി.പി.എമ്മില് ചേരാന് തീരുമാനിച്ചതായി സി.പി.എം. ആലപ്പുഴ ജില്ലാ സെക്രട്ടറി ആര്. നാസര് പത്രസമ്മേളനത്തില് അറിയിച്ചു.
12ന് െവെകിട്ട് അഞ്ചിന് ആലപ്പുഴ ടൗണ്ഹാളിന് മുന്നില് നടക്കുന്ന പൊതുസമ്മേളനം സി.പി.എം സംസ്ഥാന സെക്രട്ടറി എം.വി.ഗോവിന്ദന് ഉദ്ഘാടനം ചെയ്യും. കേന്ദ്രകമ്മിറ്റി അംഗം സി.എസ്.സുജാത അധ്യക്ഷത വഹിക്കും. കൊല്ലം, ആലപ്പുഴ, പത്തനംതിട്ട, തിരുവനന്തപുരം ജില്ലകളിലുള്ള ജെ.എസ്.എസ് പ്രവര്ത്തകരും നേതാക്കളുമാണ് സി.പി.എമ്മില് ചേരുന്നത്. കെ.കെ. ഷാജു, ജെ.െവെ.എസ്.എസ്. സംസ്ഥാന ജനറല് സെക്രട്ടറി അഡ്വ. ബി.ഗോപന്, ആലപ്പുഴ ജില്ലാ സെക്രട്ടറി സി.എം.അനില്കുമാര്, ജില്ലാ പ്രസിഡന്റ് നാലുകണ്ടത്തില് കൃഷ്ണകുമാര് എന്നിവരുടെ സാന്നിധ്യത്തിലായിരുന്നു പത്രസമ്മേളനം.
സി.പി.എമ്മില് നിന്ന് ജെ.എസ്.എസില് പോയ കെ.കെ ഷാജു പിന്നീട് കോണ്ഗ്രസില് എത്തുകയും ദളിത് കോണ്ഗ്രസ് സംസ്ഥാന പ്രസിഡന്റാകുകയും ചെയ്തിരുന്നു. അടുത്തിടെയാണ് കൊടിക്കുന്നില് സുരേഷ് എം.പിക്കെതിരെ രൂക്ഷ വിമര്ശനം ചൊരിഞ്ഞ് അദ്ദേഹം കോണ്ഗ്രസ് വിട്ടത്. കോണ്ഗ്രസ് ചില നേതാക്കളുടെ ഗ്രൂപ്പായി മാറിയെന്നും ദളിത് വിഭാഗങ്ങള്ക്ക് അവഗണയാണെന്നും ഷാജു പറഞ്ഞു. ആലപ്പുഴയില് നിന്ന് 19 കെ.പി.സി.സി അംഗങ്ങളെ നാമനിര്ദേശംചെയ്തപ്പോള് ഒരാള് പോലും ദളിത് വിഭാഗത്തില് നിന്ന് ഇല്ല. സി.പി.എമ്മില് ചേരുന്ന വിവരം അറിഞ്ഞ് തന്നെ കെ.പി.സി.സി പ്രസിഡന്റ് കെ. സുധാകരനും രമേശ് ചെന്നിത്തലയും വിളിച്ച് കോണ്ഗ്രസ് വിടരുതെന്ന് ആവശ്യപ്പെട്ടിരുന്നതായും ഷാജു പറഞ്ഞു.
അതേസമയം കെ.ആര്.ഗൗരിയമ്മയുടെ രണ്ടാം ചരവാര്ഷിക ദിനമായ നാളെ സി.പി.എം. നേതൃത്വത്തില് ആലപ്പുഴ വലിയ ചുടുകാട്ടില് അനുസ്മരണ സമ്മേളനം സംഘടിപ്പിക്കും. പുഷ്പാര്ച്ചനയും അനുസ്മരണ സമ്മേളനവും കേന്ദ്ര കമ്മിറ്റി അംഗം സി.എസ്. സുജാത ഉദ്ഘാടനം ചെയ്യും. സംസ്ഥാന കമ്മിറ്റി അംഗം സി.ബി. ചന്ദ്രബാബു അധ്യക്ഷനാകും. ഗൗരിയമ്മയുടെ സഹോദരീപുത്രി പുത്രി പി.സി. ബീനാകുമാരിയുടെ നേതൃത്വത്തിലും എ.എന്. രാജന്ബാബുവിന്റെ നേതൃത്വത്തിലും രണ്ട് ജെ.എസ്.എസ് വിഭാഗങ്ങള് നിലവിലുണ്ട്.
