ഓള്ഡ് ട്രാഫോര്ഡ്: ഒരു ദശാബ്ദം നീണ്ടു നിന്ന സേവനത്തിനൊടുവില് വിഖ്യാത ഗോള്കീപ്പര് ഡീ ജിയ ഇംഗ്ളീഷ് വമ്പന്മാരായ മാഞ്ചസ്റ്റര് യുണൈറ്റഡ് വിടുന്നു. 12 വര്ഷം ടീമിന്റെ വലയ്ക്ക് മുന്നില് നിന്ന താരം ഈ സമ്മറോടെ ക്ലബ്ബ് വിടുമെന്നാണ് സൂചനകള്. ഈ മാസം അവസാനിക്കുന്നതോടെ മാന് യു വുമായുള്ള ഡി ജിയയുടെ കരാര് അവസാനിക്കും. താരത്തിന് പിന്നെ ഫ്രീ ട്രാന്സ്ഫറോടെ പോകാനാകും.
സ്പാനിഷ് താരവുമായുള്ള കരാര് പുതുക്കാന് മാഞ്ചസ്റ്റര് യുണൈറ്റഡിന് താല്പ്പര്യം ഉണ്ടെങ്കിലും ടീമില് തുടരേണ്ട എന്ന അഭിപ്രായത്തിലാണ് താരമെന്ന് മിറര് പത്രം റിപ്പോര്ട്ട് ചെയ്യുന്നു. ആഴ്ചയില് 375,000 പൗണ്ടാണ് താരത്തിന്റെ ഓള്ഡ്ട്രാഫോര്ഡിലെ ആഴ്ചശമ്പളം. എന്നാല് ഈ കുറഞ്ഞ ശമ്പളത്തില് തുടരേണ്ടതില്ലെന്ന നിലപാടാണ് താരം എടുത്തിരിക്കുന്നതെന്നും പത്രം പറയുന്നു.
2013/24 സീസണില് ടീമില് നിലനിര്ത്തേണ്ട താരങ്ങളുടെ പട്ടിക യുണൈറ്റഡ് വെള്ളിയാഴ്ച പുറത്തിറക്കിയിരുന്നു. അതില് ഡി ജിയയുടെ പേര് ഇല്ലായിരുന്നു. എന്നാല് കരാര് പുതുക്കുന്നതുമായി താരവുമായി ചര്ച്ച നടക്കുന്നുണ്ടെന്നാണ് ക്ലബ്ബ് വൃത്തങ്ങള് പറയുന്നത്. അതേസമയം റീട്ടെയ്ന്ഡ് പട്ടികയില് ഗോള്കീപ്പര് ടോം ഹീറ്റണെ യുണൈറ്റഡ് നിര്ത്തിയിട്ടുണ്ട്. ഡിജിയ ടീം വിട്ടാല് യുണൈറ്റഡിന് നമ്പര് വണ് സ്ഥാനത്തേക്ക് പുതിയൊരാളെ കൊണ്ടുവരികയോ ഹീറ്റണോ യുവതാരം നതാന് ബിഷപ്പിനെ അടുത്ത സീസണ് വലയ്ക്ക് മുന്നില് നിയോഗിക്കുകയേ രക്ഷയുള്ളൂ.
അതേസമയം ഡിജിയയെ നിര്ത്തിക്കൊണ്ടു തന്നെ മറ്റൊരു കീപ്പറെ സൈന് ചെയ്യാന് മാഞ്ചസ്റ്റര് പരിശീലകന് എറിക് ടെന്ഹാഗ് ശ്രമിച്ചിരുന്നു. എവര്ട്ടന്റെ ജോര്ദാന് പിക്ഫോര്ഡ്, ഇന്ററിന്റെ ആന്ദ്രേ ഒനാനാ പോര്ട്ടോയുടെ ഡീഗോ കോസ്റ്റ എന്നിവരെല്ലായിരുന്നു ടെന്ഹാഗിന്റെ കണ്ണിലുടക്കിയത്.
മാഞ്ചസ്റ്റര് യൂണൈറ്റിഡിന് ദീര്ഘകാലം സേവനം ചെയ്ത താരങ്ങളുടെ പട്ടികയിലാണ് ഡീ ജിയയുള്ളത്. അത്ലറ്റിക്കോ മാഡ്രിഡില് നിന്നും 2011 ല് 18.9 ദശലക്ഷം പൗണ്ടിന് മാഞ്ചസ്റ്റര് യൂണൈറ്റഡ് കരാര് ചെയ്ത ഡീ ജിയ ചെമ്പടയ്ക്കൊപ്പം 545 കളികളിലാണ് വലകാത്തത്. പ്രീമിയര് ലീഗ് നേട്ടത്തിനൊപ്പം യൂറോപ്പാ ലീഗും എഫ്എ കപ്പും രണ്ടു ലീഗ് കപ്പുകളും മൂന്ന് കമ്യൂണിറ്റി ഷീല്ഡുകളും ഓള്ഡ് ട്രാഫോര്ഡിലെ അലമാരയില് എത്തിച്ചു.
ഏറ്റവും കൂടുതല് ക്ലീന്ഷീറ്റുകളുള്ള യുണൈറ്റഡ് ഗോള്കീപ്പര്മാരുടെ പട്ടികയിലുള്ളയാളാണ് ഡീ ജിയ. 190 മത്സരങ്ങളിലാണ് ക്ലീന്ഷീറ്റ്. പീറ്റര് ഷ്മിഷേലിന്റെ 180 മത്സരങ്ങളുടെ റെക്കോഡും താരം തിരുത്തിയിരുന്നു. ക്ലബ്ബിനായി ഏറ്റവും കൂടുതല് മത്സരം കളിച്ചവരുടെ പട്ടികയില് ഏഴാമതും താരമുണ്ട്. ഡീ ജിയ ശമ്പളം കുറയ്ക്കാന് തയ്യാറാകുമെന്നും ക്ലബ്ബിനൊപ്പം ഉണ്ടാകുമെന്നും കരുതുന്നതായി കഴിഞ്ഞമാസമാണ് മാഞ്ചസ്റ്റര് യുണൈറ്റഡ് പരിശീലകന് ടെന്ഹാഗ് പറഞ്ഞത്.
