പാലക്കാട്: ഗസ്റ്റ് ലക്ചറര് നിയമനത്തിനു വ്യാജ സര്ട്ടിഫിക്കറ്റ് തയാറാക്കിയില്ലെന്ന മൊഴിയിലുറച്ചുനിന്ന് പ്രതി കെ. വിദ്യ പോലീസിനെ വലയ്ക്കുന്നു. വിദ്യ ഉപയോഗിച്ചിരുന്ന രണ്ട് മൊെബെല് ഫോണുകള് പോലീസ് പരിശോധിച്ചു. ഒളിവില്ക്കഴിഞ്ഞ കാലയളവില് പല ഇ-മെയിലുകളും ഡിലീറ്റ് ചെയ്തതായി ബോധ്യപ്പെട്ടു. ഇവ വീണ്ടെടുക്കാന് സൈബര് വിദഗ്ധരുടെ സഹായംതേടും.
അട്ടപ്പാടി കോളജില് താന് സമര്പ്പിച്ചെന്നു പറയപ്പെടുന്ന പ്രവൃത്തിപരിചയ സര്ട്ടിഫിക്കറ്റ് പ്രിന്സിപ്പലിനു മറ്റാരോ കൈമാറിയതാണെന്നും എസ്.എഫ്.ഐക്കാരിയായതിനാല് തന്നെ കുടുക്കാനുള്ള ആസൂത്രിതശ്രമമാണെന്നും ചോദ്യംചെയ്യലില് വിദ്യ ആരോപിച്ചു. കോണ്ഗ്രസ് അനുകൂല അധ്യാപകസംഘടനയില് പ്രവര്ത്തിക്കുന്ന മഹാരാജാസിലെ അധ്യാപകരും ഗൂഢാലോചനയ്ക്കു പിന്നിലുണ്ട്. അട്ടപ്പാടി കോളജ് പ്രിന്സിപ്പലിനെ ചോദ്യംചെയ്താല് ഗൂഢാലോചനയുടെ വഴി മനസിലാകും. കരിന്തളം കോളജിലും ജോലിക്കായി വ്യാജരേഖ സമര്പ്പിച്ചിട്ടില്ലെന്നു വിദ്യ മൊഴി നല്കി.
പോലീസ് കസ്റ്റഡിയില് ദേഹാസ്വാസ്ഥ്യത്തേത്തുടര്ന്ന് വിദ്യയെ ആശുപത്രിയില് പ്രവേശിപ്പിച്ചു. ഭക്ഷണവും വെള്ളവും കൃത്യമായി കഴിക്കാത്തതിനാല് നിര്ജലീകരണമുണ്ടെന്നു ഡോക്ടര് വ്യക്തമാക്കിയതോടെയാണു കോട്ടത്തറ ഗവ. ട്രൈബല് സ്പെഷാലിറ്റി ആശുപത്രിയിലേക്കു മാറ്റിയത്. വ്യാജ സര്ട്ടിഫിക്കറ്റിന്റെ ഉറവിടം, സഹായികള് എന്നിവ സംബന്ധിച്ച ചോദ്യംചെയ്യലിനോടു സഹകരിച്ചില്ലെന്നാണു സൂചന.
തുടര്ന്ന് അട്ടപ്പാടി കോളജ് പ്രിന്സിപ്പല്, ഇന്റര്വ്യൂ ബോര്ഡിലുണ്ടായിരുന്ന അധ്യാപകര് എന്നിവരുടെ സാന്നിധ്യത്തില് ചോദ്യംചെയ്യാന് പദ്ധതിയിട്ടെങ്കിലും അതിനു മുമ്പ് വിദ്യ അവശത പ്രകടിപ്പിച്ചു. രണ്ടുദിവസത്തെ പോലീസ് കസ്റ്റഡി അവസാനിക്കുന്ന ഇന്ന് ഉച്ചയോടെ വിദ്യയെ മണ്ണാര്ക്കാട് ജുഡീഷ്യല് ഫസ്റ്റ് ക്ലാസ് മജിസ്ട്രേ് കോടതിയില് ഹാജരാക്കും. പ്രതിയുടെ ജാമ്യാപേക്ഷയും കോടതി ഇന്ന് പരിഗണിക്കും.
