പിന്വലിക്കല് പ്രഖ്യാപിച്ച് 30 ദിവസത്തിനുള്ളില് 2,000 രൂപ നോട്ടുകളുടെ 70 ശതമാനവും തിരിച്ചെത്തിയതായി ആര്ബിഐ. 3.62 ലക്ഷം കോടി രൂപയുടെ മൊത്തം നോട്ടുകളുടെ മൂന്നില് രണ്ട് ഭാഗവും ബാങ്കുകളില് തിരിച്ചെത്തിയതായി ആര്ബിഐ ഗവര്ണര് ശക്തികാന്ത ദാസ്. 2000 രൂപ നോട്ട് നിരോധനം സമ്പദ്വ്യവസ്ഥയെ പ്രതികൂലമായി ബാധിക്കില്ലെന്നും അദ്ദേഹം പറഞ്ഞു. നോട്ടുകള് പിന്വലിക്കുന്നത് സമ്പദ്വ്യവസ്ഥയെ എങ്ങനെ ബാധിക്കുമെന്ന് ചോദ്യത്തോട് 'തീരുമാനം സമ്പദ്വ്യവസ്ഥയെ ബാധിക്കില്ലെന്നും പ്രതികൂല ഫലമൊന്നും ഉണ്ടാകില്ലെന്നും' അദ്ദേഹം മറുപടി നല്കി.
ക്ലീന് നോട്ട് നയത്തിന്റെ ഭാഗമായി 2023 മെയ് 19 നാണ് അപ്രതീക്ഷിത നീക്കത്തിലൂടെ 2000 രൂപ നോട്ടുകള് കേന്ദ്രം പിന്വലിക്കുന്നത്. തുടര്ന്ന് നോട്ടുകള് മാറ്റിയെടുക്കാനും നിക്ഷേപിക്കാനുമായി സെപ്റ്റംബര് 30വരെയാണ് സമയം അനുവദിച്ചിട്ടുള്ളത്. പ്രചാരത്തിലുണ്ടായിരുന്ന 2000 രൂപയുടെ കറന്സികളുടെ മൂല്യത്തില് നോട്ട് പിന്വലിക്കുന്നതിന് മുമ്പേ കാര്യമായ കുറവുണ്ടായിരുന്നു.
മാര്ച്ച് 31 വരെ 3.62 ലക്ഷം കോടി രൂപമൂല്യമുള്ള 2,000 രൂപയുടെ നോട്ടുകളാണ് പ്രചാരത്തിലുണ്ടായിരുന്നത്. 85 ശതമാനം നോട്ടുകളും ബാങ്ക് അക്കൗണ്ടുകളിലേയ്ക്ക് നിക്ഷേപമായാണ് തിരിച്ചെത്തിയത്. ജൂണ് എട്ടിന് നടന്ന ധനനയ അവലോകനത്തിന് ശേഷം 1.8 ലക്ഷം കോടി രൂപയുടെ 2000 രൂപ നോട്ടുകള് തിരിച്ചെത്തിയതായി ആര്ബിഐ ഗവര്ണര് പറഞ്ഞിരുന്നു. ആകെ പ്രചാരത്തിലുള്ള 2000 രൂപ നോട്ടുകളുടെ 50 ശതമാനമായിരുന്നു ഇത്.
