കൊച്ചി: എസ്.എഫ്.ഐ. നേതാവ് നിഖില് തോമസ് ഹാജരാക്കിയ വ്യാജ സര്ട്ടിഫിക്കറ്റിന്റെ ബുദ്ധികേന്ദ്രം അബിന് രാജ് എന്നു പോലീസ്. തിരുവനന്തപുരത്തു പഠിക്കുമ്പോള് മറ്റു സര്വകലാശാലകളില് പ്രവേശനം തേടുന്ന വിദ്യാര്ഥികളെ സഹായിക്കാനായി അബിന് ഒരു ഏജന്സി നടത്തിയിരുന്നു. ഇതോടൊപ്പം വ്യാജ സര്ട്ടിഫിക്കറ്റുകളും നിര്മിച്ചു നല്കിയെന്നാണ് ആരോപണം.
കായംകുളം എസ്.ഐ: ഉദയകുമാറിന്റെ നേതൃത്വത്തിലുള്ള പോലീസ് സംഘം നെടുമ്പാശ്ശേരിയില് എത്തിയാണ് അബിന് രാജിനെ കസ്റ്റഡിയില് എടുത്തത്. അബിന്രാജിന്റെ അമ്മയും മാലിദ്വീപില് ജോലിചെയ്യുകയായിരുന്നു. അവര് കഴിഞ്ഞദിവസം നാട്ടിലെത്തിയിരുന്നു. അബിനാണ് തനിക്ക് വ്യാജസര്ട്ടിഫിക്കറ്റ് സംഘടിപ്പിച്ച് നല്കിയതെന്നും ഇതിനായി രണ്ടു ലക്ഷം രൂപ നല്കിയിരുന്നെന്നും നിഖില് നേരത്തെ മൊഴി നല്കിയിരുന്നു.
നിഖില് തോമസിന്റെ വീട്ടില് നടത്തിയ പരിശോധനയില് കലിംഗ സര്വകലാശാലയുടെ വ്യാജ ബിരുദ സര്ട്ടിഫിക്കറ്റ്, പ്രൊവിഷണല് സര്ട്ടിഫിക്കറ്റ്, മൂന്നുവര്ഷത്തെ മാര്ക്ക് ലിസ്റ്റ്, െമെഗ്രേഷന് സര്ട്ടിഫിക്കറ്റ് എന്നിവ കണ്ടെടുത്തു. കായംകുളം എം.എസ്.എം. കോളജിലെ പ്രവേശനവുമായി ബന്ധപ്പെട്ട രേഖകളെല്ലാം പിടിച്ചെടുത്തിട്ടുണ്ട്. നിരവധി പേര്ക്ക് അബിന് വ്യാജ ഡിഗ്രി സര്ട്ടിഫിക്കറ്റ് നല്കിയിട്ടുണ്ടെന്നാണു വിവരം.
മുന്പ് എസ്.എഫ്.ഐയുടെ ആലപ്പുഴ ജില്ലാ സെക്രട്ടേറിയറ്റ് അംഗവും കായംകുളം എസ്.എഫ്.ഐയുടെ ഏരിയ പ്രസിഡന്റുമായിരുന്നു അബിന്. രണ്ടു വിദ്യാര്ഥിനികളുടെ പരാതിയെത്തുടര്ന്നു പാര്ട്ടി ഇയാള്ക്കെതിരേ അച്ചടക്ക നടപടിയെടുത്തിരുന്നു.
വ്യാജ ഡിഗ്രി സര്ട്ടിഫിക്കറ്റ് നല്കി എം.കോമിന് പ്രവേശനം നേടിയ എസ്.എഫ്.ഐ. നേതാവ് നിഖില് തോമസിന് കേരള സര്വകലാശാല ആ ജീവനാന്ത വിലക്ക് ഏര്പ്പെടുത്തി. നിഖില് തോമസിന് ഇനി കേരള സര്വകലാശാലയിലെ ഒരു കലാലയത്തിലും പഠിക്കുന്നതിനോ പരീക്ഷ എഴുതുന്നതിനോ കഴിയില്ല.
ഇതരസംസ്ഥാനങ്ങളില്നിന്നുള്ള ബിരുദങ്ങള് പരിശോധിക്കാന് ഒരു ഉന്നതതല സമിതിക്കും സര്വകലാശാല സിന്ഡിക്കേറ്റ് യോഗം രൂപം നല്കി. കഴിഞ്ഞ മൂന്നു വര്ഷത്തിനിടെ കേരളത്തിനു പുറത്തുനിന്നുള്ള സര്ട്ടിഫിക്കറ്റുകള് സമര്പ്പിച്ച് കേരള സര്വകലാശാലയില് പ്രവേശനം നേടിയവരുടെ രേഖകള് സെല് പരിശോധിക്കും.
നിഖിലിന് എം.കോമിനു പ്രവേശനം നല്കിയ എം.എസ്.എം കോളജിലെ അധ്യാപകരെയും അധികൃതരെയും വിളിച്ചുവരുത്തി വിശദീകരണം തേടും. സര്വകലാശാല രജിസ്ട്രാറിന്റെ നേതൃത്വത്തില് പ്രത്യേക സമിതിയായിരിക്കും ഇവരില് നിന്നും വിശദീകരണം തേടുക.
ബി.കോം പാസാകാതെ കലിംഗ സര്വകലാശാലയില്നിന്നുള്ള വ്യാജ സര്ട്ടിഫിക്കറ്റ് നല്കിയാണ് നിഖില് കായംകുളം എം.എസ്.എം. കോളജില് എം.കോമിനു ചേര്ന്നത്. രേഖകള് വ്യാജമാണെന്നു കേരള സര്വകലാശാല െവെസ് ചാന്സലറും കലിംഗ സര്വകലാശാല രജിസ്ട്രാറും എം.എസ്.എം. കോളജ് പ്രിന്സിപ്പലും സ്ഥിരീകരിച്ചിരുന്നു.
