കൊച്ചി: കേസുകള് കൊണ്ട് രാഹുല് ഗാന്ധിയെ തകര്ത്താനാവില്ലെന്ന് എഐസിസി ജനറല് സെക്രട്ടറി കെ.സി വേണുഗോപാല്. മോദിയെ വിമര്ശിച്ചതിന്റെ പേരില് അപകീര്ത്തികേസിനാണ് രാഹുലിന്റെ പാര്ലമെന്റ് അംഗത്വം റദ്ദാക്കുന്ന വിധത്തില് ശിക്ഷ വിധിച്ചത്. അദ്ദേഹത്തിനെതിരെ നിരവധി ക്രിമിനല് കേസുകളുണ്ടെന്ന് പറയുന്നത് ആരെയും കൊന്നതിന്റെയോ ആക്രമിച്ചതിന്റെയോ പേരിലല്ല, അപകീര്ത്തി കേസുകളിലാണ്. അദാനിയും മോദിയും തമ്മിലുള്ള ബന്ധം ചൂണ്ടക്കാട്ടിയതിനാണ് അദ്ദേഹത്തെ നിശബ്ദനാക്കാന് ശ്രമിക്കുന്നത്. കേസുകളില് അദ്ദേഹം തളരില്ല. കുടുതല് കരുത്തനായി തുടരുമെന്നൂം അദ്ദേഹം പറഞ്ഞു.
പൊതുവ്യക്തി നിയമത്തില് കോണ്ഗ്രസിന് നിലപാടില്ലെന്ന് പറയുന്ന സിപിഎം സംസ്ഥാന സെക്രട്ടറി എം.വി ഗോവിന്ദന് ഇടയ്ക്കൊക്കെ സ്വന്തം മുഖം കണ്ണാടിയില് നോക്കണം. ഗോവിന്ദന്മാഷ് കുറച്ചുകാലമായി കണ്ണാടി നോക്കാറില്ല. അതിന്റെ പ്രശ്നമാണ്. സിപിഎം ബിജെപിയുമായി അത്താഴവിരുന്ന് നടത്തുകയും ഇപ്പോഴും കര്ട്ടനു പിന്നിലിരുന്ന ചര്ച്ച നടത്തുകയും ചെയ്യുകയാണല്ലോ. ഇന്നലെ വരെ പൊതു വ്യക്തി നിയമത്തിനു വേണ്ടി വാദിച്ചവര് ഇന്ന് പെട്ടെന്ന് നിലപാട് മാറ്റുമ്പോള് അതിനു പിന്നിലുള്ള ലക്ഷ്യം മുസ്ലീം ലീഗിന് മനസ്സിലാകും. ലീഗ് നിലപാട് അവര് വ്യക്തമാക്കിയിട്ടുണ്ടെന്നും കെ.സി വേണുഗോപാല് പറഞ്ഞു.
