ബംഗലുരു: ഐടി കമ്പനിയുടെ മുന് ജീവനക്കാരന് മലയാളി സിഇഒ യേയും മാനേജിംഗ് ഡയറക്ടറേയും വെട്ടിക്കൊന്ന സംഭവത്തിന് പിന്നില് ബിസിനസ് വൈരമെന്ന് സൂചന. പ്രതികളായ മൂന്ന് പേരെ പോലീസ് അറസ്റ്റ് ചെയ്തു. ജോക്കര് ഫെലിക്സ് എന്ന ശബരീഷ്, വിനയ്റെഡ്ഡി, സന്തോഷ് എന്നിവരാണ് പിടിയിലായത്. സാമൂഹ്യമാധ്യമങ്ങളില് കൊലപാതക വാര്ത്ത പങ്കുവെച്ചതിന് പിന്നാലെയായിരുന്നു പ്രതികള് അറസ്റ്റിലായത്.
ഇന്നലെ വൈകിട്ട് നാലു മണിയോടെ ബംഗലുരുവില് നടന്ന സംഭവത്തില് കൊല്ലപ്പെട്ടത് കോട്ടയം പനച്ചിക്കാട് കുഴിമറ്റം രുക്മണി വിലാസത്തില് ആര് വിനുകുമാര് (47) ആണ്. ബംഗലുരുവിലെ ഇന്ര്നെറ്റ് സേവന കമ്പനിയായ എയറോണിക്സ് മീഡിയയുടെ സിഇഒ യാണ് വിനുകുമാര്. ഇദ്ദേഹത്തിനൊപ്പം മാനേജിംഗ് ഡയറക്ടര് ഫണീന്ദ്ര സുബ്രഹ്മണ്യയും കൊല്ലപ്പെട്ടു. രണ്ടുപേര്ക്കും കുത്തും വെട്ടുമേല്ക്കുകയായിരുന്നു. കൊല്ലപ്പെടുമ്പോള് വിനുകുമാര് ഒന്നാം നിലയിലും ഫനീന്ദ്ര മൂന്നാം നിലയിലുമായി ജോലി ചെയ്യുകയായിരുന്നു.
പ്രതികള് മയക്കുമരുന്നിന് അടിമയായിരുന്നു എന്ന് പോലീസ് പറയുന്നു. ബിസിനസ് സംബന്ധിച്ച തര്ക്കമാണ് കൊലപാതകത്തിന് കാരണമായി പുറത്തുവരുന്ന പ്രാഥമിക വിവരം. കമ്പനി വിട്ട മുന് ജീവനക്കാരനായ ശബരീഷ് എയറോണിക്സ് മീഡിയയുടെ തൊട്ടടുത്ത് തന്നെ മറ്റൊരു ഇന്റര്നെറ്റ് കമ്പനിയ്ക്ക് രൂപം കൊടുത്തത് ഇരുകമ്പനികളും തമ്മിലുള്ള വൈരത്തിന് കാരണമായി മാറിയിരുന്നു.
പരസ്പരം ബിസിനസ് തട്ടിയെടുക്കുന്നു എന്ന ആരോപണം ഉയര്ത്തി വാക്കു തര്ക്കവും ഏറ്റുമുട്ടലുകളും പതിവായിരുന്നു. ഇതിനെ തുടര്ന്നായിരുന്നു കഴിഞ്ഞ ദിവസം ശബരീഷും മറ്റു രണ്ടുപേരും ചേര്ന്ന് വിനുകുമാറിനെയും ഫണീന്ദ്ര സുബ്രഹ്മണ്യത്തേയും കൊലപ്പെടുത്തിയത്. പിന്നാലെ കൊലപാതക വിവരം ഇയാള് സാമൂഹ്യമാധ്യമങ്ങളിലും പങ്കുവെച്ചിരുന്നു. പോലീസ് തെരച്ചില് നടത്തുന്നതിനിടയില് നഗരത്തില് നിന്നു തന്നെ പിടിയിലായി.
അമൃതഹളളി പമ്പാ എക്സ്റ്റന്ഷനിലെ കമ്പനി ഓഫീസില് കയറി ഫെലിക്സ് രണ്ടുപേരെയും വാളുപയോഗിച്ച് വെട്ടിക്കൊല്ലുകയായിരുന്നു. ആശുപത്രിയിലേക്ക് കൊണ്ടുപോകും വഴിയാണ് രണ്ടുപേരും മരിച്ചത്. ഒളിവില് പോയിരിക്കുന്ന ഫെലിക്സിനായി പോലീസ് തെരച്ചിലിലാണ്. ഒരു വര്ഷം മുമ്പാണ് എയ്റോണിക്സ് കമ്പനി തുടങ്ങിയത്. കമ്പനി ഫെലിക്സിന്റെ ബിസിനസില് ഇടപെട്ടതാണ് കാരണമായതെന്നാണ് സൂചന. കൊല്ലപ്പെട്ട വിനുകുമാര് ആപ്പിള് ട്രീ മണിചെയിന് തട്ടിപ്പുമായി ബന്ധപ്പെട്ട കേസില് കുറ്റം ചുമത്തപ്പെട്ടിട്ടുള്ളയാളാണെന്ന് വിവരമുണ്ട്.
