പത്തനംതിട്ട: രാഷ്ട്രീയ കാരണങ്ങളാല് മെട്രോമാന് ഇ. ശ്രീധരനെ മാറ്റിനിര്ത്തി സില്വര്ലൈന് പദ്ധതി വിഭാവനം ചെയ്ത കേരള സര്ക്കാര്, ഒടുവില് കാര്യസാധ്യത്തിനായി ഇ. ശ്രീധരന്റെ അടുത്തേക്ക് ദൂതനെ അയച്ചത് കേന്ദ്ര റെയില്വേ മന്ത്രാലയത്തിന്റെ സമ്മര്ദം കാരണം. അതിവേഗ പാതയ്ക്കുള്ള ശ്രീധരന്റെ നിര്ദേശം സംസ്ഥാനം അംഗീകരിച്ചാല് വൈകാതെ കേന്ദ്രം പച്ചക്കൊടി കാട്ടും.
എങ്ങനെയെങ്കിലും റെയില്വേ മന്ത്രാലയത്തെ അനുനയിപ്പിച്ച് സില്വര്ലൈന് പദ്ധതി നടപ്പാക്കുകയായിരുന്നു സംസ്ഥാന സര്ക്കാരിന്റെ ലക്ഷ്യം. ഇതിനായി ഡല്ഹിയിലുള്ള കേരളത്തിന്റെ പ്രത്യേക പ്രതിനിധി കെ.വി. തോമസ് നിരവധി തവണ റെയില്വേ മന്ത്രാലയവുമായി ചര്ച്ച നടത്തി. മെട്രോമാന് ഇ. ശ്രീധരന് സില്വര്ലൈന് പദ്ധതി രേഖ പരിശോധിച്ച് വിയോജിപ്പ് അറിയിച്ച വിവരം മന്ത്രാലയം തോമസിനെ ധരിപ്പിച്ചു.
അദ്ദേഹത്തിന്റെ നിര്ദേശം സ്വീകരിച്ച് ഡി.പി.ആറില് ആവശ്യമായ വ്യത്യാസം വരുത്തണമെന്ന മന്ത്രാലയത്തിന്റെ ശിപാര്ശ ശിരസാവഹിച്ചാണ് കെ.വി. തോമസ് ഒടുവില് ഇ. ശ്രീധരന്റെ അടുത്തെത്തിയത്.
അര്ധഅതിവേഗ പാത ഭാവിക്ക് ഉതകുന്നതല്ലെന്നും അതിവേഗ പാതയാണ് അനുയോജ്യമെന്നും ഇ. ശ്രീധരന് തുടക്കത്തില്തന്നെ അറിയിച്ചു. മണിക്കൂറില് കേവലം 135 കിലോ മീറ്റര് ഓപ്പറേഷണല് വേഗമുള്ള സില്വര്ലൈനിന് ആവശ്യമായ വളവുകളുടെ റേഡിയസ് 1850 മീറ്ററാണ്. മണിക്കൂറില് 300 കിലോ മീറ്ററില് അധികം വേഗതയുള്ള അതിവേഗ പാതയുടെ വളവുകളുടെ റേഡിയസ് 6250 ആയി വര്ധിക്കേണ്ടതുണ്ട്.
അതിനാല് സില്വര് ലൈന് പദ്ധതിക്കായി കണ്ടെത്തിയ അെലെന്മെന്റ് പൂര്ണമായി മാറ്റിവരയ്ക്കേണ്ടിവരും. അര്ധഅതിവേഗ പാതയായി ആരംഭിക്കുന്ന പദ്ധതി ഭാവിയില് അതിവേഗ പാതയായി പരിവര്ത്തനം ചെയ്യുക എന്ന ലക്ഷ്യത്തോടെയാണ് ഇ. ശ്രീധരന് ഇക്കാര്യം കെ.വി. തോമസിനെ ധരിപ്പിച്ചത്.
യഥാര്ഥത്തില് കേന്ദ്ര സര്ക്കാര് കേരളത്തെ ഉള്പ്പെടുത്തി രണ്ടു വര്ഷം മുമ്പ് വിഭാവനം ചെയ്ത ചെെന്നെ-ബംഗളുരു- തിരുവനന്തപുരം അതിവേഗ റെയില് പദ്ധതി പ്രാവര്ത്തികമാക്കാനാണ് ഇ. ശ്രീധരന്റെ ശ്രമം. ഇത്തരത്തിലുള്ള ഏഴ് പദ്ധതികളിലൂടെ രാജ്യത്ത് പൂര്ണമായി അതിവേഗ പാത നിര്മിക്കുക എന്ന ലക്ഷ്യമാണ് കേന്ദ്രത്തിനുള്ളത്.
ഇതിനായി 10 വര്ഷം മുമ്പ് ഇ. ശ്രീധരന്റെ നേതൃത്വത്തില് ഡി.എം.ആര്.സി. പഠനം നടത്തി തയാറാക്കിയ ഡി.പി.ആര്. സംസ്ഥാന സര്ക്കാരിന്റെ പക്കലുണ്ട്. തിരുവനന്തപുരത്തുനിന്നും കണ്ണൂര് വരെമാത്രമാണ് പാത നിര്മിക്കുക. ഭാവിയില് കര്ണാടകത്തില് നടപ്പാക്കുന്ന ബുള്ളറ്റ് ട്രെയിന് പദ്ധതിയുടെ അെലെന്മെന്റുകൂടി കണക്കാക്കിമാത്രമേ പാതയുടെ കാസര്ഗോഡ് അെലെന്മെന്റ് നിശ്ചയിക്കൂ.
സില്വര്ലൈന് പ്രതികൂലമായി ബാധിക്കുന്ന ആയിരക്കണക്കിന് കുടുംബങ്ങള്ക്ക് ഇ. ശ്രീധരന്റെ നിലപാട് ആശ്വാസമാകും. പുതിയ അെലെന്മെന്റ് പ്രകാരം ഭൂമി നഷ്ടമാകുന്നവരുടെ എണ്ണം കുറയും. 12 അടി ഉയരത്തില് നിര്മിക്കുന്ന ആകാശപാതയായതിനാല് കെട്ടിടനിര്മ്മാണത്തിന് മാത്രമാണ് വിലക്കുള്ളത്. കൃഷിക്ക് തടസമില്ല. ഭൂഗര്ഭ പാതവരുന്നതിനാല് നിലവിലുള്ള നിര്മിതികള് പൊളിച്ചുമാറ്റേണ്ടതായും വരുന്നില്ല.
