കൊച്ചി: സംസ്ഥാന മനുഷ്യാവകാശ കമ്മിഷനു പുതിയ ചെയര്മാനെ തെരഞ്ഞെടുക്കാന് ഇന്നു യോഗം ചേരും. മുഖ്യമന്ത്രി പിണറായി വിജയനും പ്രതിപക്ഷ നേതാവ് വി.ഡി. സതീശനും ചേര്ന്ന കമ്മിറ്റിയാണു ചെയര്മാനെ തെരഞ്ഞെടുക്കുന്നത്. റിട്ട ചീഫ് ജസ്റ്റീസുമാരായ എസ്. മണികുമാറും ആന്റണി ഡൊമനിക്കുമാണു സര്ക്കാരിന്റെ പട്ടികയില്.
ജസ്റ്റീസ് ആന്റണി ഡൊമിനിക് സ്ഥാനമൊഴിഞ്ഞ ഒഴിവിലേക്കാണു നിയമനം. ആന്റണി ഡൊമനിക്കിനു ഒരു ടേം കൂടി നീട്ടിക്കൊടുക്കുന്നതും പരിഗണനയിലുണ്ട്. എന്നാല്, പുതിയൊരാള്ക്കു നല്കണമെന്ന അഭിപ്രായത്തിനാണു മുന്തൂക്കം. ഇക്കാര്യത്തില് പ്രതിപക്ഷ നേതാവിന്റെ തീരുമാനം നിര്ണായകമാകും. എതിര്പ്പുവന്നാല്, റിട്ട. ചീഫ് ജസ്റ്റീസ് പി.ആര്. രാമചന്ദ്രമേനോനും സാധ്യതയുണ്ട്.
പ്രതിപക്ഷനേതാവിന്റെ അസൗകര്യത്തെത്തുടര്ന്നു നേരത്തെ രണ്ടുതവണ മാറ്റിവച്ച യോഗമാണു ഇന്നു ചേരുന്നത്. നിയമസഭാ സമ്മേളനമുള്ളതിനാല്, മുഖ്യമന്ത്രിയും പ്രതിപക്ഷ നേതാവും തലസ്ഥാനത്തുണ്ടാകുമെന്നതു കണക്കിലെടുത്താണു ഇന്നത്തേക്കു മാറ്റിയത്.
ചെയര്മാനാകാന് താല്പര്യമുണ്ടെന്നു ജസ്റ്റീസ് എസ്. മണികുമാര് സര്ക്കാരിനെ അറിയിച്ചിരുന്നു. ജസ്റ്റീസ് മണികുമാറിനെ നിയമിക്കുന്നതില് സര്ക്കാരും മുഖ്യമന്ത്രിയും അനുകൂലമാണ്. വിരമിക്കും മുമ്പുതന്നെ സര്ക്കാരിന്റ താല്പര്യം സൂചിപ്പിച്ചപ്പോള് അദ്ദേഹം നിരസിച്ചിരുന്നില്ല.
എന്നാല്, പ്രതിപക്ഷത്തിന്റെ എതിര്പ്പിനു സാധ്യതയുണ്ടെന്ന വിലയിരുത്തലും സര്ക്കാരിനുണ്ട്. എസ്. മണികുമാറിനെ സംസ്ഥാനത്തു നിലനിര്ത്തുന്നതിലൂടെ തമിഴ്നാട് സര്ക്കാരുമായുള്ള ബന്ധം കൂടുതല് ഊഷ്മളമാക്കാന് കഴിയുമെന്നാണു വിലയിരുത്തല്.
അറുപത്തേഴുകാരനായ ജസ്റ്റീസ് ആന്റണി ഡൊമിനിക്കിനു ഒരു ടേം കൂടി തുടരാന് തടസമില്ല. ഒരു ടേം കൂടി തുടരാന് താല്പര്യമുണ്ടെന്നു ജസ്റ്റീസ് ആന്റണി ഡൊമനിക്കും സര്ക്കാരിനെ അറിയിച്ചിട്ടുണ്ട്. ജസ്റ്റീസ് ആന്റണി ഡൊമനിക്കിനോടു മുഖ്യമന്ത്രിക്കും സി.പി.എമ്മിനും എതിര്പ്പില്ല.
പ്രതിപക്ഷ നേതാവിനും എതിര്പ്പില്ലെങ്കില് ജസ്റ്റീസ് ആന്റണി ഡൊമനിക്കിന് ഒരവസരം കൂടി നല്കാനാണു സാധ്യതയെങ്കിലും ഇത്തവണ ചെയര്മാന് സ്ഥാനത്തേക്കു ഹൈക്കോടതി റിട്ട. ജഡ്ജിമാരെയും പരിഗണിക്കണമെന്ന ആവശ്യം സര്ക്കാരിന്റെ പരിഗണനയിലുണ്ട്.
മൂന്നുവര്ഷ കാലാവധി പൂര്ത്തിയായതിനേ തുടര്ന്നു ചെയര്മാന് സ്ഥാനത്തുനിന്നു ജസ്റ്റീസ് ആന്റണി ഡൊമനിക്ക് കഴിഞ്ഞാഴ്ച വിരമിച്ചിരുന്നു. മൂന്നു വര്ഷമോ 70 വയസോ ആണു ചെയര്മാന്റെ കാലാവധി.
ഹൈക്കോടതി റിട്ട. ചീഫ് ജസ്റ്റീസുമാര്ക്കും സുപ്രീം കോടതി റിട്ട. ജഡ്ജിമാര്ക്കുമാണു സംസ്ഥാന മനുഷ്യാവകാശ കമ്മിഷന് ചെയര്മാനാകാന് യോഗ്യത ഉണ്ടായിരുന്നത്. എന്നാല്, 2019 ലെ മനുഷ്യാവകാശ സംരക്ഷണ (ഭേദഗതി) നിയമപ്രകാരം ഹൈക്കോടതി റിട്ട. ജഡ്ജിമാര്ക്കും ഇനിമുതല് അവസരമുണ്ട്.
