കോട്ടയം: ഉപതെരഞ്ഞെടുപ്പില് പ്രചരണവുമായി കോണ്ഗ്രസിന്റെയും ഇടതുപക്ഷത്തിന്റെയും ബിജെപിയുടെയും സ്ഥാനാര്ത്ഥികള് തിരക്ക് പിടിച്ചോടുമ്പോള് പുതുപ്പള്ളിയില് കളം പൂര്ണ്ണമായും തെളിഞ്ഞു. മൂന്ന് സ്വതന്ത്ര സ്ഥാനാര്ത്ഥികള് ഉള്പ്പെടെ ഏഴു പേരാണ് മത്സരരംഗത്ത് ഉണ്ടാകുക.
പത്തുപേരുടെ പത്രികകളില് രണ്ടുപേര് പത്രിക പിന്വലിക്കുകയും ഒരാളുടെ പത്രിക വരണാധികാരി തള്ളുകയുമായിരുന്നു. ഡമ്മി സ്ഥാനാത്ഥികളായിരുന്ന സിപിഎമ്മിന്റെ റെജി സഖറിയയും ബിജെപിയുടെ മഞ്ജു എസ് നായരും പത്രിക പിന്വലിച്ചു. സ്വതന്ത്ര സ്ഥാനാര്ത്ഥിയായി നല്കിയ ഡോ. കെ പദ്മരാജന്റെ പത്രിക വരണാധികാരി തളളി. കേരളത്തില് വോട്ട് ഇല്ലാത്തതായിരുന്നു കാരണം.
കോണ്ഗ്രസിന്റെ ചാണ്ടി ഉമ്മന് സിപിഎമ്മിന്റെ ജെയ്ക്ക് സി തോമസ് ബിജെപിയുടെ ജി ലിജിന്ലാല്, ആംആദ്മിപാര്ട്ടിയുടെ ലൂക്ക് തോമസ് എന്നിവര്ക്ക് പുറമേ ഷാജി, സന്തോഷ് ജോസഫ്, പികെ ദേവദാസ് എന്നിവരാണ് പുതുപ്പള്ളിയില് മത്സര രംഗത്തുള്ള സ്വതന്ത്രന്മാര്.
പത്രിക പിന്വലിക്കാന് മൂന്ന് ദിവസം കൂടി ബാക്കിയുണ്ട്. ആഗസ്റ്റ് 17 നായിരുന്നു നാമനിര്ദ്ദേശ പത്രിക സമര്പ്പിക്കേണ്ട അവസാന തിയ്യതി. സെപ്തംബര് അഞ്ചിനാണ് വോട്ടെടുപ്പ് സെപ്തംബര് എട്ടിന് വോട്ടെണ്ണല് നടക്കും.
