ബുഡാപെസ്റ്റ്: ലോക അത്ലറ്റിക് ചാംപ്യന്ഷിപ്പില് സ്വര്ണ്ണം നേടി ഇന്ത്യന് പതാക പാറിച്ച ജാവലിന് താരം നീരജ് ചോപ്ര ദേശീയപതാകയില് ഓട്ടോഗ്രാഫ് ചോദിച്ച ആരാധികയ്ക്ക് ഒപ്പിട്ടുകൊടുത്തത് ആരാധികയുടെ കുപ്പായത്തിന്റെ കയ്യില്. ഒളിമ്പിക്സിന് പിന്നാലെ ലോക അത്ലറ്റിക് ചാംപ്യന്ഷിപ്പിലും സ്വര്ണ്ണം നേടിയ ആദ്യ ഇന്ത്യാക്കാരനായതിന് പിന്നാലെ നീരജിന് ആരാധകര് ഏറിയിരിക്കുകയാണ്.
അതിനിടയിലാണ് ആരാധികയുടെ ആവശ്യം താരം സ്നേഹപൂര്വ്വം നിരസിച്ചത്. ഇന്ത്യന് പതാകയെ ബഹുമാനിക്കുന്നതുമായി ബന്ധപ്പെട്ട് 2002 ല് കൊണ്ടുവന്ന ചട്ടപ്രകാരം മൂവര്ണ്ണക്കൊടിയില് ഏതെങ്കിലും തരത്തിലുള്ള എഴുത്തുകള് അനുവദിക്കുന്നില്ല. ഇന്ത്യന് പതാകയെ ബഹുമാനിക്കുന്നത് മുന്നിര്ത്തിയായിരുന്നു തന്നെ സമീപിച്ച ആരാധികയെ സ്നേഹത്തോടെ ലോകതാരം പിന്തിരിപ്പിച്ചത്. എന്നാല് അവരെ ഒട്ടും നിരാശപ്പെടുത്താതെ അവര് ധരിച്ചിരുന്ന വസ്ത്രത്തിന്റെ കൈകളില് ഒപ്പിട്ടുകൊടുക്കുകയും ചെയ്തു. ലോക് അത്ലറ്റിക് ചാംപ്യന്ഷിപ്പിലെ ആദ്യ സ്വര്ണ്ണമാണ് ധീരജ് നേടിയത്.
ഇന്നലെ ജാവലിന് ത്രോയില് 88.17 മീറ്റര് എറിഞ്ഞാണ് നീരജ് സ്വര്ണം നേടിയത്. രണ്ടാമത്തെ ത്രോയിലാണ് നീരജ് നേട്ടം ഉണ്ടാക്കിയത്. ഒളിമ്പിക്സിലും ലോക അത്ലറ്റിക് ചാമ്പ്യന്ഷിപ്പിലും സ്വര്ണ മെഡല് കരസ്ഥമാക്കുന്ന അത്യപൂര്വ്വനേട്ടമാണ് നീരജ് സ്വന്തമാക്കിയിരിക്കുന്നത്. പാകിസ്താന് താരം അര്ഷാദ് നദീമാണ് വെള്ളി നേടിയത്. ചെക്ക് റിപ്പബ്ലിക്കിന്റെ ജാക്കുബ് വാദ്ലെ വെങ്കലം കരസ്ഥമാക്കി. ഇന്ത്യന് താരങ്ങളായ കിഷോര് കുമാര് ജെനയും ഡി പി മനുവും മികച്ച പ്രകടനം കാഴ്ചവെച്ചിരുന്നു. കിഷോറിന് അഞ്ചാം സ്ഥാനത്തും മനു ആറാം സ്ഥാനത്തും എത്തി.
