ബെറെയ്ലി: ലൈംഗികാവശ്യം പരിഗണിക്കാതിരുന്ന പെണ്കുട്ടിയെ അക്രമി ട്രെയിന് മുന്നിലേക്ക് തള്ളിയിട്ടു. ബെറെയ്ലിയില് ചൊവ്വാഴ്ച നടന്ന സംഭവത്തില് 17 വയസ്സുള്ള പെണ്കുട്ടിയെ 19 കാരനാണ് അക്രമത്തിന് ഇരയാക്കിയത്. ഗുരുതരമായി പരിക്കേറ്റ പെണ്കുട്ടിയുടെ നില അപകടകരമാണ്. പെണ്കുട്ടിയുടെ രണ്ടുകാലുകളും ഇടതുകയ്യും നഷ്ടമായി. നീറ്റ് കോച്ചിംഗിന് പോയി മടങ്ങിവരുമ്പോഴായിരുന്നു സംഭവം.
പെണ്കുട്ടിയെ ഒരു സ്വകാര്യ ആശുപത്രിയില് പ്രവേശിപ്പിച്ചിരിക്കുകയാണ്. രണ്ടുകാലും മുട്ടിന് മുകളില് വെച്ച് മുറിഞ്ഞ നിലയിലാണ് പെണ്കുട്ടിയെ ആശുപത്രിയിലേക്ക് കൊണ്ടുവന്നതെന്ന് പെണ്കുട്ടിയെ ചികിത്സിച്ച ഡോക്ടര് പറഞ്ഞതായി ടൈംസ് ഓഫ് ഇന്ത്യ റിപ്പോര്ട്ട് ചെയ്യുന്നു. ഇടതുകയ്യും നഷ്ടമായി. ശരീരമാകസകലം ഒടിവുകളും മുറിവുകളുമാണ്. ശരീരത്തില് നിന്നും വലിയ അളവില് രക്തവും നഷ്ടമായി. ആറു യൂണിറ്റ് രക്തമാണ് കയറ്റേണ്ടി വന്നത്. സംഭവത്തില് പോക്സോ അടക്കം വിജയ് മൗര്യ എന്നയാള്ക്കെതിരേയാണ് കേസ് എടുത്തിട്ടുണ്ട്.
സംഭവത്തിന് പിന്നാലെ മുഖ്യമന്ത്രി യോഗി ആദിത്യനാഥ് കൃത്യനിര്വ്വഹണത്തില് വീഴ്ച വരുത്തിയ മൂന്ന് പോലീസുകാര്ക്ക് എതിരേ നടപടിയെടുത്തു. ജിയ്യാ മജിസ്ട്രേറ്റ് രവീന്ദ്രകുമാര്, എസ്എസ്പി സുശീല് ചന്ദ്രാഭന് ഗൂലേ ഉള്പ്പെടെയുള്ളവര് ആശുപത്രിയില് പെണ്കുട്ടിയെ സന്ദര്ശിക്കാന് എത്തി. പെണ്കുട്ടിയുടെ മാതാപിതാക്കള്ക്ക് അഞ്ചുലക്ഷം രൂപ അടിയന്തിര സഹായം നല്കിയിട്ടുണ്ട്.
പെണ്കുട്ടിയെ കൂടുതല് സൗകര്യമുള്ള ആശുപത്രിയിലേക്ക് ചികിത്സയ്ക്കായി മാറ്റുമെന്നും അതിന്റെ ചെലവ് സര്ക്കാര് വഹിക്കുമെന്നും യോഗി ആദിത്യനാഥ് പ്രഖ്യാപിച്ചു. സംഭവത്തില് പോലീസ് അന്വേഷണം നടത്തുമെന്നും കുറ്റവാളിക്കെതിരേ ശക്തമായ നടപടിയെടുക്കുമെന്നും പറഞ്ഞു. കഴിഞ്ഞ ഏതാനും ദിവസമായി വിജയ് മകളെ പിന്തുടര്ന്ന് ശല്യം ചെയ്യുകയായിരുന്നു എന്ന് പെണ്കുട്ടിയുടെ പിതാവ് പറഞ്ഞു.
പഠിക്കാന് കോളേജിലേക്കു പോകുമ്പോഴും തിരിച്ചുവരുമ്പോഴും ഇയാള് പെണ്കുട്ടിയെ തടഞ്ഞു നിര്ത്തുമായിരുന്നു എന്നും ഇങ്ങിനെ തടഞ്ഞപ്പോള് എതിര്ത്തതിനാണ് പെണ്കുട്ടിയെ ട്രെയിന്റെ മുന്നിലേക്ക് തള്ളിയിട്ടത്. മണിക്കൂറുകള്ക്ക് ശേഷം തൊട്ടടുത്തുള് ഖടാവു റെയില്വേ ക്രോസിംഗിന് സമീപത്ത് നിന്നും പെണ്കുട്ടിയെ കണ്ടെത്തുകയായിരുന്നെന്നും പിതാവ് പോലീസിനോട് പറഞ്ഞു.
