കന്യാകുമാരി: വിവാഹം കേവലം അഞ്ചു ദിവസങ്ങള് മാത്രം ബാക്കി നില്ക്കേ കല്യാണപ്പെണ്ണിനെ യുവാവ് പള്ളിക്കു മുന്നിലിട്ട് കുത്തി. 25 കാരിയായ പെണ്കുട്ടിക്ക് പിന്നാലെ പ്രണയാഭ്യര്ത്ഥനയുമായി നടന്നിരുന്ന 27 കാരന് യുവാവിനെ സ്ഥലത്ത് ഉണ്ടായിരുന്നവരെല്ലാം ചേര്ന്ന് നന്നായി പെരുമാറി പോലീസിന് കൈമാറി. ചിന്നത്തുറൈ എന്ന സ്ഥലത്തെ മത്സ്യബന്ധന തൊഴിലാളിയായ എസ് ഫെഗി കാസ്ട്രോ എന്ന യുവാവാണ് പിടിയിലായത്.
ഞായറാഴ്ച രാത്രി നിത്രൈലിയിലെ പള്ളിയുടെ പ്രവേശന കവാടത്തിവെച്ചായിരുന്നു കുത്തിയത്. പള്ളികഴിഞ്ഞ് ഇറങ്ങി വരുമ്പോള് യുവതിയെ യുവാവ് കുത്തുകയായിരുന്നു. തുടര്ന്ന് യുവതി അബോധാവസ്ഥയില് ആയതോടെ ഇയാളെ യുവതിയുടെ ബന്ധുക്കളും ഓടിക്കൂടിയാ നാട്ടുകാരും ചേര്ന്ന് നന്നായി മര്ദ്ദിച്ച ശേഷം പോലീസിന് കൈമാറി. പിന്നീട് ആശുപത്രിയില് പ്രവേശിപ്പിക്കപ്പെട്ട യുവതിയുടെ നില മെച്ചപ്പെട്ടിട്ടുണ്ട്.
യുവാവിനെതിരേ പോലീസ് വധശ്രമത്തിന് കേസെടുത്തിട്ടുണ്ട്. ബിരുദാനന്തര ബിരുദധാരിയായ പെണ്കുട്ടി തിരുനെല്വേലിയിലെ ഒരു സ്വകാര്യ പോളി ടെക്നിക്കില് അധ്യാപികയാണ്. എന്നാല് സ്കൂളില് വെച്ചു തന്നെ പഠനം നിര്ത്തുകയും മത്സബന്ധന ജോലിയിലേക്ക് തിരിയുകയും ചെയ്തയാളാണ് ഫെഗി. മുമ്പ് ഇയാള് പിന്നാലെ നടന്നു ശല്യം ചെയ്യുന്നു എന്ന് കാണിച്ച് യുവതി പല തവണ പോലീസിന് പരാതി നല്കുകയും പോലീസ് യുവാവിന് മുന്നറിയിപ്പ് നല്കുകയും ചെയ്തിരുന്നു.
എന്നാല് ആറു മാസത്തിന് ശേഷം ഇപ്പോള് യുവതിക്ക് വിവാഹമായെന്ന് അറിഞ്ഞതിനെ തുടര്ന്നാണ് ആക്രമിച്ചത്. വിവാഹം നടക്കാന് കേവലം അഞ്ചു ദിനങ്ങള് കൂടി മാത്രം ബാക്കി നില്ക്കേയായിരുന്നു യുവാവിന്റെ ആക്രമണം. പോലീസ് വധശ്രമത്തിനും പൊതുവേദിയിലെ അസഭ്യ വര്ഷത്തിനുമാണ് കേസെടുത്തിരിക്കുന്നത്.
