അടിമാലി: പേരില് ഭൂമിയുണ്ടെന്നും മകള് വിദേശത്താണെന്നും നടത്തിയ വ്യാജ പ്രചരണത്തിനെതിരേ കോടതിയെ സമീപിക്കുമെന്ന് പറഞ്ഞതിന് പിന്നാലെ അടിമാലിയിലെ മറിയക്കുട്ടിയോട് ഖേദം പ്രകടിപ്പിച്ച് സിപിഎം മുഖപത്രം. മറിയക്കുട്ടിക്ക് ഒന്നരയേക്കര് ഭൂമിയുണ്ടെന്നും മകള് വിദേശത്താണെന്നും നടത്തിയ വാര്ത്ത പിശകാണെന്ന് വ്യക്തമാക്കി ഒറ്റക്കോളം വാര്ത്തയിട്ടിരിക്കുകയാണ് ദേശാഭിമാനി. വാര്ത്ത പിശകാണെന്നും ഈ രീതിയില് വാര്ത്തവരാന് ഇടയായതില് ഖേദിക്കുന്നെന്നുമാണ് പറഞ്ഞിരിക്കുന്നത്.
അഞ്ചുമാസമായി വിധവാപെന്ഷന് മുടങ്ങിക്കിടക്കുന്ന സാഹചര്യത്തില് മറിയക്കുട്ടി പിച്ചച്ചട്ടിയുമായി തെരുവില് ഇറങ്ങിയതിന് പിന്നാലെയാണ് മറിയക്കുട്ടിക്കെതിരേ സൈബര് പ്രചരണവും സിപിഎം പത്രത്തില് വാര്ത്ത വരികയും ചെയ്തത്. മറിയക്കുട്ടിക്ക് രണ്ടേക്കര് ഭൂമിയുണ്ട്. രണ്ടു വീടുകളുണ്ട്. ഇതില് ഒരെണ്ണം 5000 രൂപയ്ക്ക് വാടകയ്ക്ക് നല്കിയിരിക്കുകയാണെന്നും ഇളയ മകള് വിദേശത്താണെന്നും ഇങ്ങിനെ പലരീതിയില് വരുമാനവും സമ്പത്തുമുള്ള മറിയക്കുട്ടി പഞ്ചായത്ത് കോണ്ഗ്രസിന്റെ നിയന്ത്രണത്തിലാണ് സമരം നടത്തുന്നതെന്നുമായിരുന്നു ആരോപണം. എന്നാല് മറിയക്കുട്ടി തനിക്ക് ഭൂമിയോ സമ്പത്തോ ഇല്ലെന്ന് കാണിച്ച് വില്ലേജ് ഓഫീസില് നിന്നു തന്നെ എഴുതി വാങ്ങുകയും ചെയ്തതോടെ പാര്ട്ടി പ്രതിക്കൂട്ടിലാകുകയായിരുന്നു. പ്രശ്നത്തില് ഹൈക്കോടതിയെ സമീപിക്കാനൊരുങ്ങൂകയാണ് മറിയക്കുട്ടി.
വ്യാജപ്രചരണത്തില് പാര്ട്ടിപത്രം ഖേദം പ്രകടിപ്പിച്ചെങ്കിലും മറിയക്കുട്ടി കോടതിയെ സമീപിക്കാന് തന്നെ തീരുമാനിച്ചിരിക്കുകയാണ്. വിധവാപെന്ഷന് അഞ്ചുമാസമായി മുടങ്ങിക്കിടക്കുന്ന ഇളയ മകള്ക്കൊപ്പം വാടകവീട്ടില് താമസിക്കുന്ന കൂലിപ്പണിക്കാരിയായ അവര് തനിക്ക് ഉണ്ടെന്ന് പ്രചരിപ്പിച്ച സ്ഥലം കിട്ടിയാല് കൊള്ളാമെന്ന് പരിഹസിക്കുകയും ചെയ്തു.
'' വിധവാ പെന്ഷന് കിട്ടുന്നില്ലെന്ന് പറഞ്ഞ് യാചനാസമരം നടത്തിയ മറിയക്കുട്ടി താമസിക്കുന്ന വീടും പുരയിടവും ഇളയ മകള് പി.സി. പ്രിന്സിയുടെ പേരിലുള്ളത്. ഈ മകള് വിദേശത്താണെന്ന് രീതിയില് ദേശാഭിമാനിയില് വന്ന വാര്ത്ത പിശകാണ്. മറിയക്കുട്ടിയുടെ സഹോദരി റെയ്ച്ചല് വര്ഷങ്ങളായി അമേരിക്കയലാണ് താമസം. ഇതാണ് തെറ്റിദ്ധരിക്കനിടയായത്.
അടിമാലി പഞ്ചായത്ത് പതിമൂന്നാം വാര്ഡ് 200 ഏക്കര് പൊന്നടത്തുപാറ 486 -ാം നമ്പര് വീടിനും വീടിരിക്കുന്ന പുരയിടത്തിനും അടുത്തനാള് മുതല് പ്രിന്സിയുടെ പേരിലാണ് കരം അടകയ്ക്കുന്നത്. മറിയക്കുട്ടിക്ക് പഴംമ്പള്ളിച്ചാലില് ഭൂമി ഉണ്ടായിരുന്നു. എന്നാലിതിന് പട്ടയമില്ലായിരുന്നു. വര്ഷങ്ങള്ക്ക് മുമ്പ് ഇത് വിറ്റു. ഇപ്പോള് 200 ഏക്കര് എന്ന സ്ഥലത്താണ് താമസം. സാലി(ഡല്ഹി), ശാന്ത (വയനാട്), ജാന്സി വിജയന് (ആയിരമേക്കര്), പ്രിന്സി (അടിമാലി) എന്നിവരാണ് മക്കള്. (മറിയക്കുട്ടിക്ക് സ്വന്തമായി ഭൂമിയുണ്ടെന്നും ഇവരുടെ മകള് പ്രിന്സി വിദേശത്താണ് താമസിക്കുന്നതെന്നും വാര്ത്ത വരാനിടയില് ഖേദിക്കുന്നു.)'' ഇങ്ങിനെയായിരുന്നു പത്രത്തിന്റെ അഞ്ചാം പേജിലെ ഒറ്റക്കോളം വാര്ത്ത.
