ലോകത്തെ ഏറ്റവും മികച്ച ഫാസ്റ്റ് ബൗളര്മാര് തങ്ങളാണെന്ന് ധരിച്ചുവെച്ചിരിക്കുന്ന ചില പാകിസ്താന് താരങ്ങള്ക്ക് ലോകകപ്പിലെ തന്റെ വിജയം ദഹിക്കുന്നതായിരുന്നില്ലെന്ന് ഇന്ത്യന് ഫാസ്റ്റ് ബൗളര് മുഹമ്മദ് ഷമി. തന്റെ അഭിപ്രായത്തില് ടീമിന് ഏറ്റവും വേണ്ടസമയത്ത് മികച്ച പ്രകടനം നടത്തുന്നയാളാണ് ഏറ്റവും മികച്ച കളിക്കാരനെന്നും ഷമി പറഞ്ഞു. ലോകകപ്പില് ഏഴു കളികളില് നിന്നും 24 വിക്കറ്റ് വീഴ്ത്തി ഏറ്റവും കൂടുതല് വിക്കറ്റുകള് നേടിയ താരം ലോകകപ്പിന് പിന്നാലെയാണ് തന്നെ പരിഹസിച്ച പാക് താരങ്ങള്ക്ക് മറുപടിയുമായി എത്തിയത്.
ഷമിക്ക് വ്യത്യസ്തമായ പന്തുകള് നല്കി ഇന്ത്യ വഞ്ചന കാട്ടുകയായിരുന്നു എന്ന മുന് താരം ഹസന് റാസയുടെ വിമര്ശനത്തിനാണ് ഷമി മറുപടി പറഞ്ഞത്. തങ്ങള്ക്ക് വ്യത്യസ്ത തരത്തിലുള്ള പന്തുകള് നല്കുന്നു എന്നാണ് പാക് താരങ്ങള് പറഞ്ഞത്. എന്നാല് അവരുടെ ഏറ്റവും മികച്ച ബൗളറായ വാസീം അക്രം ഒരിക്കല് തന്റെ ഒരു ഷോയില് പന്ത് തിരഞ്ഞെടുക്കുന്നതിന്റെ മുഴുവന് പ്രക്രിയയും വിശദീകരിച്ചിട്ടുണ്ട്. ഇതുവരെ കളിച്ചിട്ടില്ലാത്ത ഒരാളാണ് ഇത് പറയുന്നതെങ്കില് മനസ്സിലാക്കാം. എന്നാല് നിങ്ങളെ പോലുള്ള ഒരു മുന്താരം ഇങ്ങിനെ പറയുന്നത് ശരിയല്ലെന്നും ഇതൊക്കെ അനാവശ്യ വിവാദങ്ങള് സൃഷ്ടിക്കുകയാണെന്നും താരം പറഞ്ഞു.
''ഞാന് നടത്തിയതിന് സമാനമായ പ്രകടനവുമായി 10 ബൗളര്മാരെങ്കിലും വരണമെന്നാണ് ഞാന് ദൈവത്തോട് പ്രാര്ത്ഥിക്കുന്നത്. എനിക്ക് ആരോടും അസൂയയില്ല. മറ്റുള്ളവരുടെ വിജയം നിങ്ങള് ആസ്വദിക്കാന് തുടങ്ങിയാല് നിങ്ങള് മികച്ച കളിക്കാരനാകും.'' ഷമി പറഞ്ഞു.
''കഴിഞ്ഞ രണ്ട് ദിവസങ്ങളായി ഞാന് ഒരുപാട് കേള്ക്കുന്നു. ആദ്യ മത്സരങ്ങളില് ഞാന് പ്ലെയിംഗ് ഇലവന്റെ ഭാഗമേ ആയിരുന്നില്ല. എന്നാല് ടീമില് എടുത്തപ്പോള് മികച്ച പ്രകടനം നടത്തി. ഞാന് 5 വിക്കറ്റ് വീഴ്ത്തി. അടുത്ത രണ്ട് മത്സരങ്ങളില് ഞാന് 4 എണ്ണം നേടി. പിന്നാലെ അഞ്ചു ബാറ്റര്മാരെ പുറത്താക്കി. ചില പാകിസ്താന് കളിക്കാര്ക്ക് ഇതൊന്നും ദഹിക്കാനായില്ല. അദ്ദേഹം കൂട്ടിച്ചേര്ത്തു.
2023 ലോകകപ്പ് ക്രിക്കറ്റില് ഏഴു മത്സരങ്ങളില് നിന്ന് 24 വിക്കറ്റുകളാണ് ഷമി വീഴ്ത്തിയത്. പന്ത് ഉപയോഗിച്ചുള്ള അദ്ദേഹത്തിന്റെ വീരോചിതമായ പ്രകടനങ്ങള് ഇന്ത്യയെ ഇവന്റിന്റെ ഫൈനല് വരെ എത്തിച്ചു. ഇന്ത്യ മുഴുവന് ഷമിയുടെ വിജയം ആഘോഷിച്ചപ്പോഴാണ് ഹസന് റാസ വിമര്ശനവുമായി എത്തിയത്. എതിര് ടീമിനെ അപേക്ഷിച്ച് ഷമിക്കും ഇന്ത്യന് ബൗളര്മാര്ക്കും വ്യത്യസ്ത പന്തുകളാണ് നല്കിയതെന്ന് റാസ അഭിപ്രായപ്പെട്ടു. ആരോപണങ്ങള് പ്രതിഫലിപ്പിച്ച്, ഷമി തല ചൊറിയുകയായിരുന്നു.
