തൃശൂര് : സി.പി.ഐ. സംസ്ഥാന സെക്രട്ടറി കാനം രാജേന്ദ്രനു പകരം ബിനോയ് വിശ്വമോ കെ. പ്രകാശ് ബാബുവോ വരുമെന്നു സൂചന. കാനത്തിന്റെ ആരോഗ്യപ്രശ്നങ്ങളെത്തുടര്ന്ന് അടുത്ത സംസ്ഥാന സമ്മേളനം വരെ സെക്രട്ടറിയുടെ ചുമതല വഹിക്കാന് മുതിര്ന്നവരെ നിയോഗിക്കണമെന്നാണു പൊതുവായ അഭിപ്രായം.
അസി. സെക്രട്ടറിമാരായ ഇ. ചന്ദ്രശേഖരനെയോ പി.പി. സുനീറിനെയോ ചുമതല ഏല്പ്പിക്കുമെന്നും ഇക്കാര്യത്തില് 30 ന് ചേരുന്ന സംസ്ഥാന നിര്വാഹകസമിതി യോഗം തീരുമാനമെടുക്കമെന്നും നേരത്തെ റിപ്പോര്ട്ടുണ്ടായിരുന്നു. എന്നാല് സീനിയറായ നേതാവുതന്നെ സെക്രട്ടറിയാകണമെന്നാണ് പ്രവര്ത്തകര് ആവശ്യപ്പെടുന്നത്. പൊതുമണ്ഡലത്തില് സ്വീകാര്യതയുള്ള മുഖങ്ങളായി ബിനോയ് വിശ്വവും പ്രകാശ് ബാബുവും ഉയര്ന്നുവന്നതും അങ്ങനെയാണ്. പാര്ട്ടി പ്രവര്ത്തകര്ക്കും മറ്റു വിഭാഗങ്ങള്ക്കുമിടയില് കൂടുതല് സ്വീകാര്യത ബിനോയ് വിശ്വത്തിനാണെന്ന അഭിപ്രായവും ശക്തമാണ്. അതിനാല് അദ്ദേഹത്തിനാണ് സാധ്യത കൂടുതല്.
പാര്ട്ടി ദേശീയ സെക്രട്ടറിമാരില് ഒരാളും എ.ഐ.ടി.യു.സി. വര്ക്കിങ് പ്രസിഡന്റുമാണ് ബിനോയ് വിശ്വം. ഒപ്പം രാജ്യസഭാ എം.പിയെന്ന നിലയില് പാര്ട്ടിയുടെ ദേശീയമുഖവുമാണ്. സംസ്ഥാനത്തെ മുന്മന്ത്രിയെന്ന നിലയിലും മികച്ച പാര്ലമെന്റേറിയന് എന്ന നിലയിലും ഭേദപ്പെട്ട പ്രവര്ത്തനം കാഴ്ചവച്ചിട്ടുണ്ട്. ദേശീയ എക്സിക്യൂട്ടീവ് അംഗമായ പ്രകാശ് ബാബു മുന് എം.എല്.എയും മുന് സംസ്ഥാന അസി. സെക്രട്ടറിയുമാണ്.
2022 ഒകേ്ടാബറിലാണ് കാനം രാജേന്ദ്രന് സംസ്ഥാന സെക്രട്ടറിയായി മൂന്നാം തവണയും തെരഞ്ഞെടുക്കപ്പെട്ടത്. പ്രമേഹത്തെത്തുടര്ന്ന് വലതുകാല്പാദം മുറിച്ചുമാറ്റിയ അദ്ദേഹം ആശുപത്രിയില് ചികിത്സയിലാണ്. അണുബാധയ്ക്കു കുറവുണ്ടാകാത്ത സാഹചര്യത്തിലാണ് കാല്പാദം മുറിച്ചു കളയേണ്ടി വന്നതെന്ന് കാനം പറഞ്ഞിരുന്നു. ലോകസഭാ തെരഞ്ഞെടുപ്പ് അടുത്ത സാഹചര്യത്തില് ഓടിനടന്ന് സംഘടനയെ ചലിപ്പിക്കാന് കാനത്തേപ്പോലെ കഴിവുള്ള സെക്രട്ടറിതന്നെ വേണമെന്നതാണ് പാര്ട്ടിപ്രവര്ത്തകരുടെ ആവശ്യം. എന്തായാലും 30 ന് ചേരുന്ന യോഗത്തില് അന്തിമ തീരുമാനമുണ്ടാകും.
