തിരുവനന്തപുരം: വീണ്ടും സര്ക്കാരിനെ രൂക്ഷമായി വിമര്ശിച്ച് കേരളാഗവര്ണര് ആരിഫ് മുഹമ്മദ് ഖാന്. പ്രതിസന്ധി കാലത്തും ധൂര്ത്തിന് ഒരു കുറവുമില്ലെന്നും സംസ്ഥാനത്തിന്റെ സാമ്പത്തീക പ്രതിസന്ധിക്ക് കാരണം സര്ക്കാര് തന്നെയാണെന്നും ഗവര്ണര് പറഞ്ഞു.
വര്ഷങ്ങളോളം സര്ക്കാരിനെ സേവിച്ചവര്ക്ക് പെന്ഷനും ഒന്നുമില്ല. രണ്ടുവര്ഷം മാത്രം മന്ത്രിമാരുടെ സ്റ്റാഫായി സേവിച്ചവര്ക്ക് പെന്ഷനും മറ്റ് ആനുകൂല്യങ്ങളുമെന്ന് ഗവര്ണര് വിമര്ശിച്ചു. നവകേരളയാത്രയുടെ ലക്ഷ്യം എന്താണെന്ന് ചോദ്യം ഉന്നയിച്ച ഗവര്ണര് നവകേരളാ സദസ്സ് ധൂര്ത്താണെന്നും യാത്രയില് പരാതികള്ക്ക് പരിഹാരമുണ്ടാകുന്നില്ലെന്നും പറഞ്ഞു.
എസ്എഫ്ഐ പ്രവര്ത്തകര് കരിങ്കൊടി കാണിച്ച് പ്രതിഷേധിച്ച സംഭവം തനിക്കെതിരെ നടന്ന് എസ്എഫ്ഐ ആക്രമണമാണെന്നും അതിന് പിന്നില് ഗൂഢാലോചന നടത്തിയത് മുഖ്യമന്ത്രി പിണറായി വിജയനാണെന്നും ഗവര്ണര് ആരോപിച്ചു. വിവരം പ്രതിമാസ റിപ്പോര്ട്ടില് രാഷ്ട്രപതിയെ അറിയിക്കാനൊരുങ്ങുകയാണ് ഗവര്ണര്.
സംഭവത്തില് എസ്എഫ്ഐ പ്രവര്ത്തകരുടെ ജാമ്യാപേക്ഷയില് ഇന്ന് കോടതി വിശദമായി വാദം കേള്ക്കും. കേസില് ആറു പേരെ രണ്ടാഴ്ചത്തേക്ക് കോടതി റിമാന്ഡ് ചെയ്തിരുന്നു. ഒരാള്ക്ക് ഇന്ന് വൈകിട്ട് അഞ്ചുവരെ ഇടക്കാല ജാമ്യം അനുവദിച്ചിട്ടുണ്ട്. പരീക്ഷ നടക്കുന്ന സാഹചര്യത്തിലാണ് ഇടക്കാല ജാമ്യം അനുവദിച്ചിരിക്കുന്നത്.
ഇന്ത്യന് ശിക്ഷാ നിയമം 124 വകുപ്പ് ചുമത്തിയതില് പൊലീസ് കോടതിയില് വിശദീകരണം നല്കും. ഇന്നലെ കോടതി പൊലീസിനോട് വിശദീകരണം ചോദിച്ചിരുന്നു. രാഷ്ട്രപതി, ഗവര്ണര് എന്നിവരെ വഴിയില് തടയുമ്പോഴാണ് 124 വകുപ്പ് ചുമത്തുക.
