തൊടുപുഴ: മുപ്പത്തഞ്ചാം വയസ്സില് തോന്നാത്ത ഭയം ഇപ്പോഴുമില്ലെന്നും അഞ്ചു തവണ തനിക്ക് നേരെ വധശ്രമം ഉണ്ടായിട്ടുണ്ടെന്നും ഗവര്ണര് ആരിഫ് മുഹമ്മദ്ഖാന്. ഇപ്പോള് നേരിടുന്ന ഭീഷണിയേക്കാള് വലിയത് നേരിട്ടിട്ടുണ്ടെന്നും അപ്പോഴൊന്നും തോന്നിയിട്ടില്ലാത്ത ഭയം ഇപ്പോഴുമില്ലെന്നും ഗവര്ണര് വ്യാപാരി വ്യവസായി ഏകോപന സമിതിയുടെ പരിപാടി ഉദ്ഘാടനം ചെയ്തു പറഞ്ഞു.
35 ാം വയസ്സില് തോന്നാത്ത ഭയം 72 ാം വയസ്സിലുണ്ടാകുമോ എന്നും ചോദിച്ചു. ആയുര്ദൈര്ഘ്യത്തിന്റെ ദേശീയ ശരാശരി പിന്നിട്ടു കഴിഞ്ഞു. അധികമായി കിട്ടിയ സമയത്താണ് ജീവിക്കുന്നത് എന്നാണ് ഇപ്പോള് ഭീഷണിയുണ്ടോ എന്ന ചോദ്യത്തോട് പറയാനുള്ളത്. അഞ്ചു തവണ തനിക്ക് നേരെ വധശ്രമം നടന്നിട്ടുണ്ട്. 1990 ല് നടന്ന ഒരു വധശ്രമത്തില് തലയ്ക്ക് ഇരുമ്പ് ദണ്ഡുകൊണ്ടുള്ള അടി വരെ ഏറ്റതാണ്. 1985,86,87 കാലഘട്ടത്തിലായിരുന്നു ശരിക്കുമുള്ള ഭീഷണി നേരിട്ടതെന്നും പറഞ്ഞു. 35 ാം വയസ്സില് കേന്ദ്ര മന്ത്രിസഭയില് നിന്നും രാജി വെച്ചയാളാണ് താനെന്നും പറഞ്ഞു. ഗവര്ണര് ഇന്ന് തൊടുപുഴയില് എത്തിയ സാഹചര്യത്തില് ഇടതു യുവജനസംഘടനകള് വലിയ പ്രതിഷേധവുമായി എത്തിയിരുന്നു.
ഗവര്ണര് പോകുമ്പോഴും പരിപാടി കഴിഞ്ഞ് തിരികെ വരുമ്പോഴും എസ്എഫ്ഐ, ഡിവൈഎഫ്ഐ, യൂത്ത്ഫ്രണ്ട് (എം) പ്രവര്ത്തകര് കരിങ്കൊടി കാട്ടുകയും ഗോബാക്ക് എന്നെഴുതിയ കറുത്ത ബാനറുമായി പ്രതിഷേധിക്കുകയും ചെയ്തിരുന്നു. കടുത്ത വാക്കുകളില് മുദ്രാവാക്യം മുഴക്കിയെത്തിയ ഇവരെ പോലീസ് തടഞ്ഞിരുന്നു. പരിപാടിക്ക് ശേഷം റെസ്റ്റ് ഹൗസിലേക്ക് മടങ്ങുമ്പോള് ഗവര്ണര് ഇടയ്ക്കുവെച്ച് വാഹനത്തില് നിന്നും പുറത്തിറങ്ങി ആള്ക്കാരെ അഭിവാദ്യം ചെയ്തിരുന്നു. കുട്ടികളെ ചേര്ത്തുപിടിക്കുകയും റോഡിലൂടെ നടക്കുകയും ചെയ്തിരുന്നു.
