വ്യത്യസ്തത ഉണര്ത്തുന്ന ഒട്ടനവധി വാര്ത്തകള് സമൂഹ മാധ്യമങ്ങളിലൂടെ ശ്രദ്ധനേടാറുണ്ട്. ഇവയില് പലതും നമ്മുക്ക് വിചിത്രമായി തോന്നാം. സമാനമായ ഒരു വാര്ത്തയാണ് ഇപ്പോള് സോഷ്യല് മീഡിയയില് ശ്രദ്ധ നേടുന്നത്. മിയാമിയിലെ ന്യൂയര്പാര്ട്ടിക്കിടയില് ഏലിയന് ഉണ്ടെന്ന തരത്തില് ഒരു വീഡിയോ സമൂഹ മാധ്യമങ്ങളില് പ്രചരിച്ചുക്കൊണ്ടിരിക്കുകയാണ്. എന്നാല് ഈ വീഡിയോകള്ക്ക് എല്ലാം ഇപ്പോള് വിശദീകരണവുമായി രംഗത്തെത്തിയിരിക്കുകയാണ് മിയാമി പോലീസ്.
മിയാമിയിലെ ഷോപ്പിംഗ് മാളില് കൗമാരക്കാരുടെ ന്യൂഇയര് പാര്ട്ടിക്കിടെയാണ് പത്ത് അടി നീളമുള്ള അന്യഗ്രഹജീവിയെ കണ്ടെന്ന പ്രചാരണം ഉണ്ടായത്. ന്യൂഇയര് പാര്ട്ടിക്കിടെ കൗമാരക്കാര് തമ്മില് ഷോപ്പിംഗ് മാളില് സംഘര്ഷം നടന്നിരുന്നു. ഇതിനിടെ സംഭവസ്ഥലത്ത് പോലീസെത്തിയാണ് കുഴപ്പക്കാരെ പിടികൂടിയത്. സംഘര്ഷം നിരവധി അറസ്റ്റുകള്ക്കും വഴിവെച്ചു. സംഭവസമയത്ത് പ്രദേശത്ത് ധാരാളം പോലീസ് വാഹനങ്ങളുണ്ടായിരുന്നതായി ഫോബ്സ് റിപ്പോര്ട്ട് ചെയ്തിരുന്നു. തത്സമയ വാര്ത്തകളില് പ്രദേശത്തെ വെടിവെപ്പിനെ കുറിച്ചും ശക്തമായ പോലീസ് സാന്നിധ്യത്തെ കുറിച്ച് സൂചിപ്പിച്ചു.
അതേ സമയം സാമൂഹിക മാധ്യമങ്ങളില് പ്രശ്നക്കാരായ കൗമാരക്കാരെ നേരിടാന് പോലീസിന് കഴിയുന്നില്ലെന്നും ഒപ്പം പ്രദേശത്ത് 8-10 അടി നീളമുള്ള ഒരു അന്യഗ്രഹജീവിയുടെ സാന്നിധ്യമുണ്ടെന്ന തരത്തിലും പ്രചാരണം ശക്തമായിരുന്നു. 'മിയാമി മാളിലെ അന്യഗ്രഹജീവികളെക്കുറിച്ചുള്ള സാമൂഹിക മാധ്യമ കുറിപ്പുകള് യഥാര്ത്ഥമാണോ എന്ന് എനിക്കറിയില്ല, പക്ഷേ ഇത്രയും പോലീസിനെ ഒരിടത്തും ഞാന് കണ്ടിട്ടില്ലെന്ന് എനിക്കറിയാം,' ഒരു എക്സ് (ട്വിറ്റര്) ഉപയോക്താവ് കുറിപ്പെഴുതി. ഹോളിവുഡ് നടന് വില്യം ഷാറ്റ്നര് തന്റെ എക്സ് അക്കൌണ്ടില് 'അപ്പോള് ബഹിരാകാശ അന്യഗ്രഹജീവികള് മിയാമിയിലെ ഒരു മാള് സന്ദര്ശിച്ചിട്ടുണ്ടോ?' എന്ന കുറിപ്പോടെ വീഡിയോ പങ്കുവച്ചു.
പ്രചരിക്കുന്ന വീഡിയോയില് മിയാമി ഷോപ്പിംഗ് മാളിന് സമീപത്തെ മാര്ക്കറ്റിന്റെ സമീപത്ത് വെളിപ്രദേശത്ത് പോലീസ് കാറുകള്ക്ക് നേരെ നടന്ന് നീങ്ങുന്ന അസാധാരണ നീളുള്ള ഒരു രൂപത്തെ കാണിച്ചു. പിന്നീട് വ്യക്തമായ ദൃശ്യങ്ങളോടെയുള്ള ഒരു വീഡിയോയില് പോലീസ് ഉദ്യോഗസ്ഥരെന്ന് തോന്നുന്ന മൂന്നോളം പേര് പോലീസ് കാറുകള്ക്കും മാര്ക്കറ്റ് പ്രദേശത്തേക്കും ഇടയിലുള്ള പ്രദേശത്ത് കൂടി നടന്ന് നീങ്ങുന്നതായിരുന്നു ഉണ്ടായിരുന്നത്. അവ്യക്തമായ ദൃശ്യങ്ങളിലെ പോലീസ് ഉദ്യോഗസ്ഥരുടെ രൂപം വ്യക്തമാല്ലാതിരുന്നതാണ് അത് അന്യഗ്രഹജീവിയാണെന്ന പ്രചാരണത്തിന് കാരണം.
എന്നാല് വീഡിയോ വ്യാപകമായി പ്രചരിച്ചതോടെ അത്തരം അന്യഗ്രഹ ജീവികളുടെ സാന്നിധ്യം പ്രദേശത്ത് ഉണ്ടായിരുന്നില്ലെന്ന് പോലീസും പറയുന്നു. എന്നാല് സാമൂഹിക മാധ്യമങ്ങളില് ഇത്തരമൊരു തെറ്റായ വിവരം ഇത്രയെറെ വേഗം പ്രചരിച്ചതെങ്ങനെ എന്നത് പോലീസിനെ കുഴക്കുന്നു. സാമൂഹിക മാധ്യമങ്ങളില് വെടിവെയ്പ്പ് നടന്നെന്ന് പ്രചരിച്ചിരുന്നു. എന്നാല് അത് വെടിവെയ്പ്പ് അല്ലായിരുന്നെന്നും ന്യൂഇയറിന്റെ പടക്കമായിരുന്നു എന്നും പോലീസ് വ്യക്തമാക്കി.
Miami mall incident
Just people walking around
Not the aliens pic.twitter.com/l3QOmQIhvf— Zuculo_ (@szuculo) January 5, 2024
