അയോധ്യ: ബാലരൂപത്തില് പ്രതിഷ്ഠിക്കപ്പെട്ട രാംലല്ല വിഗ്രഹത്തിനു മുന്നില് വെള്ളിയില് പണികഴിപ്പിച്ച കളിപ്പാട്ടങ്ങളും. അഞ്ചു വയസുകാരന്റെ ഭാവമായതിനാല് ഭഗവാനു കളിക്കാനുള്ള ആന, കുതിര, ഒട്ടകം, കിലുക്കം തുടങ്ങിയവയാണ് ഗര്ഭഗൃഹത്തില് ഒരുക്കിയിട്ടുള്ളത്.
ഇവയുടെയും വിഗ്രഹം അലങ്കരിച്ചിരിക്കുന്ന ദിവ്യാഭരണങ്ങളുടെയും സൂക്ഷ്മവിവരങ്ങള് പ്രാണപ്രതിഷ്ഠാ ചടങ്ങിനുശേഷം ശ്രീരാമ ജന്മഭൂമി തീര്ഥ ക്ഷേത്ര ട്രസ്റ്റ് വെളിപ്പെടുത്തി. രാം ലല്ലയുടെ ഓരോ ആഭരണത്തിനും പ്രത്യേക പ്രാധാന്യമുള്ളതായി ട്രസ്റ്റ് പറയുന്നു. സൂര്യദേവന്റെ ചിഹ്നം വഹിക്കുന്നതാണ് ഭഗവാന്റെ സ്വര്ണക്കിരീടം. മാണിക്യവും മരതകവും വജ്രവും പതിച്ച ഈ കിരീടം ഉത്തരേന്ത്യന് പാരമ്പര്യത്തിലാണു നിര്മിച്ചിരിക്കുന്നത്. ഇതിന്റെ വലതുഭാഗം മുത്തുകളാല് ഇഴനെയ്ത് അലംകൃതമാക്കിയിട്ടുമുണ്ട്.
മാണിക്യവും വജ്രവുംകൊണ്ട് അലങ്കരിച്ച കൗസ്തുഭമണി വിഗ്രഹത്തിന്റെ ഹൃദയഭാഗത്തു ധരിച്ചിരിക്കുന്നു. വിഷ്ണുവിന്റെ എല്ലാ അവതാരങ്ങളും ഇത്തരത്തില് ഹൃദയഭാഗത്തു രത്നം ധരിക്കാറുള്ളതായി ലിഖിതങ്ങളുണ്ടെന്ന് ട്രസ്റ്റ് ഭാരവാഹികള് അറിയിച്ചു. വിജയത്തിന്റെ പ്രതീകമായ മാലയാണ് രാം ലല്ലയുടെ മറ്റൊരു പ്രത്യേകത. മാണിക്യം പതിച്ചിട്ടുള്ള സ്വര്ണമാലയാണ് വിഗ്രഹത്തെ അലങ്കരിക്കുന്ന ഏറ്റവും നീളമേറിയ ആഭരണം. െവെഷ്ണവ പാരമ്പര്യത്തിന്റെ ചിഹ്നങ്ങളായ സുദര്ശനചക്രം, താമര, ശംഖ്, മംഗളകലശം മുതലായവയും ഈ മാലയില് കാണാം.
രാം ലല്ല ധരിച്ചിരിക്കുന്ന മറ്റു മാലകളിലൊന്ന് ചന്ദ്രക്കലയുടെ ആകൃതിയിലാണ്. കാന്ത എന്നറിയപ്പെടുന്ന ഇത് സൗഭാഗ്യത്തെ സൂചിപ്പിക്കുന്നു. ഇതിന്റെ മധ്യഭാഗത്ത് സൂര്യദേവന്റെ ചിത്രം ആലേഖനം ചെയ്തിട്ടുണ്ട്. പൊക്കിളിനു മുകളില് ധരിക്കുന്ന അഞ്ചിഴകളുള്ള മറ്റൊരു രത്നമാലയാണു പാദിക. വജ്രവും മരതകവുമാണ് ഇതിന്റെ നിര്മാണത്തിനുപയോഗിച്ചിരിക്കുന്നത്.
രത്നങ്ങളും മുത്തുകളും പതിച്ച വിസ്തൃതമായ സ്വര്ണഅരക്കെട്ടാണു കാഞ്ചി. വിശുദ്ധിയുടെ പ്രതീകമായ ചെറിയ മണികളും ഇതിലുണ്ടെന്ന് ട്രസ്റ്റ് ഭാരവാഹികള് അറിയിച്ചു. കൂടാതെ ഭുജ്ബന്ധ്, കങ്കണ് (വളകള്) തുടങ്ങിയവയൂം വിഗ്രഹത്തിലുണ്ട്.
