ബംഗലൂരു: മുഖ്യമന്ത്രിയുടെ മകള് വീണാ വിജയന്റെ എക്സാലോജിക് കമ്പനിയും സിഎംആര്എല്ലും തമ്മിലുള്ള ഇടപാടുകളില് SFIO അന്വേഷണം ശരിവച്ചുകൊണ്ടുള്ള കര്ണാടക ഹൈക്കോടതി ഉത്തരവിന്റെ വിശദാംശങ്ങള് പുറത്തുവന്നു. SFIO അന്വേഷണം തീര്ത്തും നിയമപരവും വസ്തുതകള് കണ്ടെത്താന് അനിവാര്യവുമാണെന്ന് സിംഗിള് ബെഞ്ച് ജസ്റ്റീസ് എം.നാഗപ്രസന്നയുടെ 46 പേജുള്ള വിധിന്യായത്തില് പറയുന്നു. അന്വേഷണം SFIOയ്ക്ക് കൈമാറിയത് കാര്യകാരണങ്ങളോടെയാണ്. അന്വേഷണം റദ്ദാക്കണമെന്ന് ആവശ്യപ്പെട്ട് വീണ ഉന്നയിച്ച വാദങ്ങള് സ്വീകാര്യമല്ലെന്നും വിധിയില് ചൂണ്ടിക്കാട്ടുന്നു.
അന്വേഷണത്തിനെതിരെ നിയമപരമായി ഒരു തടസ്സവും നിലവില് ഉന്നയിക്കാനാവില്ല. ഏത് ഘട്ടത്തിലാണ് അന്വേഷണം SFIO യ്ക്ക് കൈമാറേണ്ടതെന്ന് നിയമത്തില് പറയുന്നുണ്ട്. നിലവില് എക്സാലോജിക്കിനെതിരായി പ്രഖ്യാപിച്ച അന്വേഷണം റദ്ദാക്കണമെന്നുള്ള ഹര്ജി തള്ളുകയാണെന്നും വിധിന്യായത്തില് പറയുന്നു.
അന്വേഷണം പ്രാഥമിക ഘട്ടത്തിലാണെന്നും അന്വേഷണ ഏജന്സി ഹര്ജിക്കാരിയില് നിന്ന് വിവരങ്ങള് തേടുക മാത്രമാണ് ചെയ്തിരിക്കുന്നതെന്നും വിധിയില് പറയുന്നു. ഈ ഘട്ടത്തില് ഹര്ജിക്കാരിക്ക് സ്വാഭാവിക നീതിയുടെ നിഷേധം ഉണ്ടായിട്ടില്ല. സംശയകരമായി ഒന്നും അന്വേഷണം പ്രഖ്യാപിച്ചുകൊണ്ടുള്ള ഉത്തരവില് ഇല്ലെന്നും സമാനമായ കേസുകളില് സുപ്രീം കോടതികളിലും വിവിധ ഹൈക്കോടതികളിലും ഉണ്ടായ വിധികള് പരാമര്ശിച്ചുകൊണ്ടുള്ള ഉത്തരവില് പറയുന്നു.
അന്വേഷണം റദ്ദാക്കണമെന്ന ഹര്ജി ഇന്നലെ തള്ളിയ ഹൈക്കോടതി ഒറ്റവരിയിലുള്ള വിധിപ്രസ്താവമാണ് നടത്തിയത്. വിശദമായ വിധിപ്പകര്പ്പ് ഇന്നാണ് കൈമാറിയത്.
