കോഴിക്കോട് : കെ.കരുണാകരന്റെ മകള് പത്മജ പാര്ട്ടിവിടുമെന്ന് കെപിസിസി നേരത്തേ തന്നെ അറിഞ്ഞിരുന്നതായും അനുനയിപ്പിക്കാന് മദ്ധ്യസ്ഥനെ അയച്ചതായും മുല്ലപ്പള്ളി രാമചന്ദ്രന്. പത്മജ പോകുമെന്ന് അറിഞ്ഞിരുന്നില്ലെന്ന വാദത്തെ തള്ളുന്നതാണ് മുല്ലപ്പള്ളിയുടെ പ്രതികരണം. ഒരു ചാനലിന് നല്കിയ അഭിമുഖത്തിലായിരുന്നു കോണ്ഗ്രസ് മുന് സംസ്ഥാന അദ്ധ്യക്ഷന്റെ പ്രതികരണം.
കെപിസിസി നേതൃത്വം അനുനയിപ്പിക്കാന് ശ്രമം നടത്തിയെന്നും മദ്ധ്യസ്ഥനെ വെച്ചിട്ടും പത്മജ വഴങ്ങിയില്ലെന്നും പറഞ്ഞു. തന്നെ പാര്ട്ടി തൃശൂരില് കഴിഞ്ഞ നിയമസഭാ തെരഞ്ഞെടുപ്പില് പരാജയപ്പെടുത്തിയെന്നത് ഉള്പ്പെടെ അനേകം ആരോപണങ്ങള് ഉന്നയിച്ച് മാര്ച്ച് 7 നായിരുന്നു പത്മജ കോണ്ഗ്രസ് വിട്ടത്. പിന്നീട് ബിജെപിയിലേക്ക് ചേക്കേറിയ അവര് പത്തനംതിട്ടയില് നരേന്ദ്രമോദി പങ്കെടുത്ത ബിജെപി സ്ഥാനാര്ത്ഥി അനില് ആന്റണി മത്സരിക്കുന്ന മണ്ഡലത്തില് പരിപാടിയില് പങ്കെടുക്കുകയും ചെയ്തു.
അതേസമയം പത്മജ പോകുന്ന വിവരം പാര്ട്ടി അറിഞ്ഞിരുന്നില്ല എന്നായിരുന്നു കെപിസിസി സീനിയര് നേതാക്കന്മാര് പ്രതികരിച്ചിരുന്നത്. ഇത് തള്ളിക്കൊണ്ടാണ് മുല്ലപ്പള്ളി രംഗത്ത് വന്നത്. രാഷ്ട്രീയകാര്യ സമിതിയംഗം കൂടിയായിട്ടും തന്നെ പല പരിപാടികളിലും പങ്കെടുപ്പിക്കാറില്ലെന്നും കോണ്ഗ്രസ് പാര്ട്ടിയില് സ്ത്രീകളോട് അവഗണനയാണെന്നും പാര്ട്ടിയിലെ സമുന്നതനായ നേതാവായിട്ടും കെ. കരുണാകരന്റെ സ്മാരകം സ്ഥാപിക്കുന്നതിലും കോണ്ഗ്രസ് പരാജയമായെന്നും അവര് ആരോപിച്ചു.
