കല്പ്പറ്റ: പൂക്കോട് വെറ്റിനറി സര്വകലാശാലയിലെ രണ്ടാം വര്ഷ ബിരുദവിദ്യാര്ഥി ജെ.എസ്. സിദ്ധാര്ഥന്റെ മരണവുമായി ബന്ധപ്പെട്ട് യൂട്യൂബിലൂടെ മതപരമായി വിദ്വേഷപ്രചാരണം നടത്തിയ സംഭവത്തില് വ്ളോഗര്ക്കെതിരേ കേസെടുത്തു.
കെ. ജാമിദ എന്ന വ്ളോഗര്ക്കെതിരേയാണ് വൈത്തിരി പോലീസ് കേസെടുത്തിരിക്കുന്നത്. ജാമിദ ടീച്ചര് ടോക്സ് എന്ന യൂട്യൂബ് ചാനലിലൂടെയാണ് ജാമിദ വിദ്വേഷം കലര്ത്തുന്ന രീതിയിലുള്ള അഭിപ്രായ പ്രകടനം നടത്തിയതെന്ന് പോലീസ് പറഞ്ഞു.
സൈബര് പട്രോളിങ്ങിനിടെ വൈത്തിരി എസ്.ഐ പ്രശോഭ്. പി.വി ജാമിദയുടെ വിദ്വേഷം കലര്ന്ന വീഡിയോ കാണാന് ഇടയാകുകയായിരുന്നു. ഉള്ളടക്കത്തില് വിദ്വേഷ പ്രചാരണം ഉണ്ടെന്ന് മനസിലായതോടെ ഐ.പി.സി 153എ പ്രകാരം സ്വമേധയാ കേസെടുത്തു.
ജാമിദയുടെ വ്യാജ പ്രചാരണത്തിലൂടെ ഇരുമതവിഭാഗങ്ങള് തമ്മില് ഐക്യം തകര്ക്കാനുള്ള ശ്രമം നടത്തിയതായി പോലീസ് എഫ്.ഐ.ആറില് പറയുന്നു. അതേസമയം സര്വകലാശാല ഹോസ്റ്റല് ശുചിമുറിയില് തൂങ്ങി മരിച്ച നിലയില് കണ്ടെത്തിയ സിദ്ധാര്ഥന് തുടര്ച്ചയായുള്ള റാഗിങ്ങിനും വിചാരണയ്ക്കും ഇരയായിരുന്നതായി കഴിഞ്ഞ ദിവസം പുറത്തുവന്ന ആന്റി റാഗിങ് സ്ക്വാഡിന്റെ അന്തിമ റിപ്പോര്ട്ടില് പറയുന്നു.
മര്ദനം, തടഞ്ഞുവയ്ക്കല്, ആത്മഹത്യ പ്രേരണ എന്നീ കുറ്റങ്ങളാണ് പ്രതികള്ക്കെതിരേ ചുമത്തിയിരിക്കുന്നത്. കേസിന്റെ അന്വേഷണം സംസ്ഥാന സര്ക്കാര് സി.ബി.ഐക്ക് കൈമാറിയിട്ടുണ്ട്.
