ന്യൂഡല്ഹി: ജവഹര്ലാല് നെഹ്റു യൂണിവേഴ്സിറ്റിയില് ചരിത്രമെഴുതി ബീഹാറുകാരന് ധനജ്ഞയ്. ജെഎന്യുവില് ദളിത് സ്റ്റുഡന്റ് പ്രസിഡന്റായി തെരഞ്ഞെടുക്കപ്പെട്ടു. 1996 ന് ശേഷം ആദ്യമായിട്ടാണ് പദവിയിലേക്ക് ദളിത്പക്ഷത്ത് നിന്നും ഒരാള് എത്തുന്നത്. ഇടതുപക്ഷ പിന്തുണയുള്ള ഗ്രൂപ്പുകളില് നിന്നാണ് ധനജ്ഞയെ ഞായറാഴ്ച തെരഞ്ഞെടുത്തത്.
ജവഹര്ലാല് നെഹ്റു യൂണിവേഴ്സിറ്റിയിലെ സ്കൂള് ഓഫ് ആര്ട്സ് ആന്ഡ് എസ്തറ്റിക്സില് നിന്ന് പിഎച്ച്ഡി വിദ്യാര്ത്ഥിയാണ്. അഖില ഭാരതീയ വിദ്യാര്ത്ഥി പരിഷത്തിന്റെ (എബിവിപി) ഉമേഷ് സി അജ്മീരയ്ക്കെതിരെയാണ് ജയം നേടിയത്. ഓള് ഇന്ത്യാ സ്റ്റുഡന്റ്സ് അസോസിയേഷന്റെ ഭാഗമായി മത്സരിച്ച ധനജ്ഞയ് ഉമേഷിനേക്കാള് 2,598 വോട്ടുകള്ക്ക് മുന്നിലെത്തിയാണ് ജയം നേടിയത്.
1996-97ല് തിരഞ്ഞെടുക്കപ്പെട്ട ബട്ടിലാല് ബൈര്വയ്ക്ക് ശേഷം ഇടതുപക്ഷത്തില് നിന്നുള്ള ആദ്യ ദളിത് ജെഎന്യു എസ്യു പ്രസിഡന്റാണ് ധനഞ്ജയ്. ജെഎന്യു എസ്യു പ്രസിഡന്ഷ്യല് ഡിബേറ്റിനിടെ, സര്വകലാശാലകള് എടുത്ത ഉന്നത വിദ്യാഭ്യാസ ഫണ്ടിംഗ് ഏജന്സി (എച്ച്ഇഎഫ്എ) വായ്പകള് കാരണം ഫീസ് വര്ദ്ധിപ്പിച്ചതിനെക്കുറിച്ച് അദ്ദേഹം ആശങ്ക ഉന്നയിച്ചു.
കാമ്പസിലെ വെള്ളം, ആരോഗ്യം, അടിസ്ഥാന സൗകര്യങ്ങള് എന്നിവയുമായി ബന്ധപ്പെട്ട പ്രശ്നങ്ങള് പരിഹരിക്കുമെന്ന് അദ്ദേഹം പ്രതിജ്ഞയെടുക്കുകയും രാജ്യദ്രോഹക്കുറ്റം ചുമത്തി തടവിലാക്കിയ വിദ്യാര്ത്ഥി നേതാക്കളെ മോചിപ്പിക്കണമെന്ന് ആവശ്യപ്പെടുകയും ചെയ്തു.
