തിരുവനന്തപുരം: പത്തനംതിട്ടയില് അനില് ആന്റണി തോല്ക്കണമെന്നും ആന്റോ ആന്റണി ജയിക്കണമെന്നും മുതിര്ന്ന കോണ്ഗ്രസ് നേതാവും പ്രവര്ത്തക സമിതി അംഗവുമായ എ.കെ. ആന്റണി. കോണ്ഗ്രസ് നേതാക്കളുടെ മക്കള് ബി.ജെ.പിക്കൊപ്പം ചേരുന്നതു തെറ്റാണെന്നും അദ്ദേഹം പത്രസമ്മേളനത്തില് വ്യക്തമാക്കി.
'കുടുംബം വേറെ, രാഷ്ട്രീയം വേറെ എന്നതാണ് തുടക്കം മുതല് എന്റെ നിലപാട്. ഞാന് പ്രചാരണത്തിനു പോകാതെതന്നെ ആന്റോ ആന്റണി വലിയ ഭൂരിപക്ഷത്തില് ജയിക്കും. കോവിഡിനുശേഷമുള്ള ആരോഗ്യപ്രശ്നങ്ങള് കാരണമാണ് പ്രചാരണത്തിനു പോകാത്തത്.
മക്കളെപ്പറ്റി എന്നെക്കൊണ്ട് അധികം പറയിപ്പിക്കരുത്. ആ ഭാഷ ശീലിച്ചിട്ടില്ല. എന്റെ മതം കോണ്ഗ്രസാണ്. കേരളത്തില് ബി.ജെ.പിയുടെ സുവര്ണകാലം കഴിഞ്ഞു. ശബരിമല പ്രശ്നമുണ്ടായപ്പോഴായിരുന്നു അവരുടെ സുവര്ണകാലം. ബി.ജെ.പി ഇക്കുറി എല്ലായിടത്തും മൂന്നാം സ്ഥാനത്താകും' -ആന്റണി പറഞ്ഞു.
എ.കെ. ആന്റണിയെ കാണുമ്പോള് സഹതാപംമാത്രമാണു തോന്നുന്നതെന്നും ചന്ദ്രനെ നോക്കി കുരയ്ക്കുന്ന പട്ടികളെ പോലെ കാലഹരണപ്പെട്ട കോണ്ഗ്രസ് നേതാക്കള് കുരച്ചുകൊണ്ടേയിരിക്കുമെന്നും പത്തനംതിട്ടയിലെ എന്.ഡി.എ. സ്ഥാനാര്ഥി അനില് കെ. ആന്റണി. പിതാവും കോണ്ഗ്രസ് പ്രവര്ത്തക സമിതി അംഗവുമായ എ.കെ. ആന്റണി തിരുവനന്തപുരത്തു പത്രസമ്മേളനത്തില് അനില് ആന്റണി പത്തനംതിട്ടയില് തോല്ക്കണമെന്നു പറഞ്ഞതിനു പിന്നാലെയായിരുന്നു ഈ പ്രതികരണം.
'രാഷ്ട്രവിരുദ്ധമായി പ്രവര്ത്തിക്കുന്ന ഗാന്ധികുടുംബത്തിനു വേണ്ടിയാണ് അദ്ദേഹം സംസാരിക്കുന്നത്. അദ്ദേഹം പഴയ പ്രതിരോധ മന്ത്രിയാണ്. പാകിസ്താനെ വെള്ളപൂശാന് ശ്രമിച്ച ഒരു എം.പിക്കുവേണ്ടി സംസാരിച്ചപ്പോള് എനിക്കു വിഷമമാണ് തോന്നിയത്. ജൂണ് നാലിനു നരേന്ദ്രമോദി വീണ്ടും പ്രധാനമന്ത്രിയാകും. ഇതു കണ്ട് ചന്ദ്രനെ നോക്കി കുരയ്ക്കുന്ന പട്ടികളെ പോലെ കാലഹരണപ്പെട്ട കോണ്ഗ്രസ് നേതാക്കള് കുരച്ചു കൊണ്ടേയിരിക്കും. ഈ തെരഞ്ഞെടുപ്പിലും കോണ്ഗ്രസിനു പ്രതിപക്ഷ സ്ഥാനംപോലും ലഭിക്കില്ലെന്നും അനില് പറഞ്ഞു.
